ඕනෑම ව්‍යාපාරික හෝ වෘත්තීය ගමනකදී, අසාර්ථකත්වය අප දකින්නට අකමැති වුවත් එය නොවැළැක්විය හැකි යථාර්ථයකි. සාර්ථක ව්‍යවසායකයන්ගේ සහ වෘත්තිකයන්ගේ කතා අප අසන විට, ඔවුන්ගේ ජයග්‍රහණ පමණක් ඉස්මතු වන නිසා, අසාර්ථක වීම යනු අවසානයක් හෝ පෞද්ගලික අඩුපාඩුවක් ලෙස හැඟෙන්නට පුළුවන. එහෙත්, වැටී නැවත නැඟිටින අය සතු සුවිශේෂී ශක්තිය පවතින්නේ, අසාර්ථකත්වය දෙස ඔවුන් බලන කෝණය තුළයි.
අසාර්ථකත්වයට මුහුණ දීමේදී, එය හුදෙක් සිදුවීමක් පමණක් නොව, එයින් උපරිම ප්‍රයෝජන ගෙන, පෙරට වඩා ශක්තිමත්ව නැඟී සිටීමට අවශ්‍ය මානසික වටපිටාව සකසා ගන්නේ කෙසේද යන්න පිළබඳව දැනුවත් වීම වඩාත් වැදගත් වන්නේ ඒ නිසාමය.
අසාර්ථක වීමෙන් පසු අපව ඉදිරියට ගෙන යන පළමු පියවර වන්නේ, අසාර්ථකත්වය යනු කුමක්ද යන්න පිළිබඳ අපගේ අර්ථකථනය වෙනස් කිරීමයි.
- අසාර්ථකත්වය යනු අවසානයක් නොවේ, එය තොරතුරු රැස් කිරීමකි
සාම්ප්‍රදායිකව, අසාර්ථකත්වය යනු ව්‍යාපෘතියක හෝ ඉලක්කයක අවසානය ලෙස සැලකුණ ද සාර්ථක ව්‍යාපාරිකයෙකු එය දකින්නේ දත්ත ලෙසයි. එනම් ව්‍යාපාරයක අසාර්ථක වීමක් සිදුවූ විට, චිත්තවේගී ප්‍රතිචාර වෙනුවට, මෙය සිදු වූයේ ඇයි? සහ මීළඟට අප වෙනස් කළ යුත්තේ කුමක්ද? යන්න පිළිබඳව තාර්කිකව විශ්ලේෂණය කළ යුතුය. නව උපාය මාර්ග සඳහා යොදා ගත හැකි වටිනා තොරතුරු ලෙස ද ව්‍යාපාරික පරිසරයක් තුළ, සෑම නව අදහසක්ම අත්හදා බැලීමක් ලෙස ද සැලකිය යුතුය. අත්හදා බැලීමක් අසාර්ථක වුවහොත්, එහි අරමුණ වූයේ ඉගෙනීම වන බැවින්, එය සම්පූර්ණ අසාර්ථකත්වයක් ලෙස නොදැකිය යුතුය.
- අසාර්ථකත්වය, පෞද්ගලිකත්වය හා එක් නොකරන්න
බොහෝ දෙනා අසාර්ථක වූ විට, එය තම පෞද්ගලික හැකියාවන්ගේ හෝ වටිනාකමේ අඩුපාඩුවක් ලෙස දකී. මෙය ආත්ම අභිමානයට දැඩි හානියක් සිදු කරයි. තමා අසාර්ථකයි වෙනුවට උත්සාහය අසාර්ථක වුණා යන්න ඔබටම මතක් කරන්න, අසාර්ථක වූයේ ඔබ නොවන බවත්, ඔබ ක්‍රියාත්මක කළ උපාය මාර්ගය හෝ ව්‍යාපෘතිය පමණක් බවත් ඔබටම මතක් කරන්න. මෙලෙස සිදුවීම පෞද්ගලිකත්වයෙන් වෙන් කිරීමෙන්, මානසිකව නැවත යථා තත්ත්වයට පත්කර ගැනීමට පහසු වේ. මෙවැනි අසීරු අවස්ථාවලදී ඔබටම දඬුවම් කිරීම වෙනුවට, මෙය සාර්ථකත්වයට යන ගමනේ කොටසක් බව වටහාගෙන, ඉදිරියට යෑමට අවශ්‍ය මානසික සුවය ලබා ගන්න.
අසාර්ථකත්වය පිළිබඳ මානසික කෝණය වෙනස් කරගත් පසු, ඊළඟට අවශ්‍ය වන්නේ වේදනාකාරී අත්දැකීමක් ධනාත්මක වර්ධනයක් බවට පත් කර ගැනීමට උපකාර වන ක්‍රියාකාරී සැලසුමකි.
- අසාර්ථකත්වයට හේතු වූ කරුණු ගැන විධිමත් සමාලෝචනයක් සිදුකරන්න
චිත්තවේගයන් පහව ගිය පසු, අසාර්ථකත්වයට හේතු වූ මූලික කරුණු සොයා බැලීම අත්‍යවශ්‍ය වේ. ගැටලුවේ මූල හේතුව සොයා ගැනීම සඳහා, සිදුවීමට හේතුව කුමක්දැයි කිහිප වරක් විමසන්න. එසේ ප්‍රශ්න කිරීම මගින් මතුපිට හේතු වෙනුවට ගැඹුරුම මූලික හේතු හඳුනා ගැනීමට උපකාරී වේ. උදාහරණයක් ලෙස නිෂ්පාදනය අසාර්ථක වූයේ ඇයි? ගනුදෙනුකරුවන් මිල දී නොගැනීම, එසේ නම් ගනුදෙනුකරුවන් මිල දී නොගත්තේ ඇයි? නිෂ්පාදනයට වෙළඳපොලේ ඉල්ලුමක් නොතිබීම යනාදී වශයෙන් ප්‍රශ්න කරමින් හේතුව සොයන්න. සමාලෝචනය අවසානයේ, මෙම ව්‍යාපෘතියට නැවත ආයෝජනය කළ යුතුද, නැතහොත් පාඩම් උකහාගෙන එය සම්පූර්ණයෙන්ම අත්හැරිය යුතුද යන්න තීරණය කරන්න. සියලුම අසාර්ථකත්වයන් යළි සකස් කළ නොහැකි බව වටහා ගැනීම ද මෙහිදී අත්‍යවශ්‍ය වේ.
- අවදානම් කළමනාකරණය සහ කුඩා පියවර
බිය නිසා විශාල අවදානම් ගැනීමෙන් වැළකී සිටීම සාර්ථකත්වයට බාධාවකි. අවදානම් කුඩා කොටස්වලට කඩන්න. විශාල ව්‍යාපෘතියක් හෝ ආයෝජනයක් එකවර සිදු කරනවා වෙනුවට, එය කුඩා, පරීක්ෂණාත්මක පියවර කිහිපයකට කඩා දමන්න. එක් පියවරක් අසාර්ථක වුවහොත්, සම්පූර්ණ ව්‍යාපාරයට හානියක් නොවන සේ ඉක්මනින් වෙනස්කම් සිදු කිරීමට මෙයින් හැකි වේ. තවද ව්‍යාපෘතියක් ආරම්භ කිරීමට පෙර, මෙය අසාර්ථක වුවහොත් සිදුවන නරකම දේ කුමක්ද? යන්න සැලසුම් කරන්න. එයට මුහුණ දීමට ඔබට හැකියාවක් තිබේ නම්, අවදානම ගැනීම පහසු වනු ඇත.
අසාර්ථක වූ විට තනිවීම සාමාන්‍ය දෙයකි. නමුත් ශක්තිමත් ව්‍යාපාරිකයෙකුට අවශ්‍ය වන්නේ එවැනි අවස්ථාවලදී උපකාර කරන බාහිර සහායකයන්ය.
- උපදේශකයන් සහ සම සමූහයන්
අත්දැකීම් බෙදා ගැනීමට සහ උපදෙස් ලබා ගැනීමට උපදේශකයන් සහ සමාන අරමුණු ඇති මිතුරු කණ්ඩායම් අත්‍යවශ්‍ය වේ. ඔබ චිත්තවේගීයව කඩා වැටී සිටින විට, උපදේශකයෙකුට ගැටලුව දෙස පැහැදිලි සහ අපක්ෂපාතී ඇසකින් බලා, නිවැරදි උපදෙස් දීමට පුළුවන. ව්‍යවසායකත්වය හුදෙකලා ගමනක් විය හැකිය. ඔබේ අසාර්ථකත්වය බෙදා ගැනීමට කෙනෙකු සිටීමෙන්, ඔබ තනිවම මේ අභියෝගවලට මුහුණ නොදෙන බවට සහනයක් ලැබේ.
- පෞද්ගලික සහයෝගය
ව්‍යාපාර ජීවිතයේ අසාර්ථකත්වයන් කළමනාකරණය කර ගැනීමට පෞද්ගලික ජීවිතයේ සහයෝගය ද අත්‍යවශ්‍ය වේ. ඔබේ අරමුණු සහ අභියෝග ඔබේ පවුලේ සාමාජිකයන් සමඟ අවංකව බෙදා ගන්න. ඔවුන්ගෙන් ලැබෙන චිත්තවේගීය සහයෝගය නැවත නැඟිටීමට අවශ්‍ය ශක්තිය සපයයි. ආතති සහගත කාලවලදී නිසි නින්ද, ව්‍යායාම සහ පෝෂණය පවත්වා ගැනීම, ශාරීරික සෞඛ්‍යය, මානසික ඔරොත්තු දීමේ හැකියාවට සෘජුවම සම්බන්ධ වේ.
සාර්ථකත්වය ළඟා කර ගැනීමේ ගමනේදී, ඔබ අසාර්ථක වන වාර ගණන නොව, අසාර්ථක වූ සෑම අවස්ථාවකම ඔබ කෙතරම් වේගයෙන් නැඟී සිටිනවාද යන්න වැදගත් වේ. වැටී නැවත නැඟිටින ව්‍යාපාරිකයෙකුගේ මානසික රහස පවතින්නේ අසාර්ථකත්වය පෞද්ගලික අඩුපාඩුවක් ලෙස නොදැක, එය වටිනාම පුහුණු පාඨමාලාවක් ලෙස සලකා, ඊළඟ වතාවට වඩාත් බුද්ධිමත්ව සහ ශක්තිමත්ව ඉදිරියට යෑමේ අභ්‍යන්තර අධිෂ්ඨානය තුළයි. මෙම මානසිකත්වය සහ අවංක සහායකයන් ඔබේ වෘත්තීය ගමනට සැබෑ සවියක් වනු ඇත.
