අධික උෂ්ණත්වය සමග දරුවන් ගනුදෙනු කරන්නේ කොහොමද..?

මේ වගේ රස්නයක් නම් අපි අහලවත් නැහැ. අපේ කාලයේ පෑව්වෙත් ඔය ඉරම තමයි. ඒත් අපි ඉස්කෝලෙ ඇරිල ඔය කට්ට අව්වේම ආවා. දැන් නම් ගේ ඇතුලෙවත් ඉන්න බැහැ…

ඇත්තටම අද මේ කථාව ඊට වඩා වෙනස්.

කොහොම වුනත් කාලගුණයට අපිට අනුගත වෙන්නම වෙනවා. ඒ නිසාම දැන් පවතින අව්වෙන් ආරක්ෂා වීම ඉතාම වැදගත්. මේ නිසාම දැන් අධ්‍යාපන අමාත්‍යාංශයෙන් පවා පාසල් දරුවන් වෙනුවෙන් අව්වෙන් ආරක්ෂා වීම පිළිබඳ මාර්ගෝපදේශ නිකුත් කර තිබෙනවා. අපි බලමු මොනවද මේ මාර්ගෝපදේශ..

දහඩිය දැමීමෙන් ඇති විය හැකි ගැටලු මොනවාද…?

දහඩිය දැමීම නිසා විජලනය හා මස්පිඩු පෙරලෙන්න පටන් ගන්නවා. මෙය ඉතා වේදනාකාරී සිදුවීමක්. මේ වගේ මස්පිඩු පෙරෙලෙන තත්වයන් ඇති වුනොත් තව දුරටත් දරුවා නිතර කාර්යෙහි නියැලෙන්න ඉඩ දෙන්න එපා. දරුවා සිසිල් ස්ථානයක තබා විවේක ගැනීමට දෙන්න. විනාඩි 15 කට වරක් බැගින් සිරුර සජලනය වෙන තෙක් හොඳින් ජලය පානය කිරීමට සලස්වන්න. සිසිල් ජලයෙන් සිරුර තෙමන්න.

ඒ වගේම අධික උෂ්ණත්වය නිසා දරුවන්ට අධික ලෙස දහඩිය දැමීම සිදු වෙනවා. ඒ නිසා ක්ලාන්තය , ශරීරය අප්‍රාණික වීම වැනි අපහසුතාවයන් ඇති වෙනවා. මේ වගේ අවස්ථාවකදීත් දරුවා අදාල ක්‍රියාකාරකම් වලින් ඉවත් කර විවේකීව තබා මුලින් වගේම සෑම විනාඩි 15 කට වරක් වතුර ලබා දෙන්න. සිසිල් ජලයෙන් සිරුර තෙතමාත්තු කරන්න.

ඒ වගේම උෂ්ණත්වය නියාමන ක්‍රියාවලියේ ඇති වෙන ගැටළු නිසා දරුවා heat stroke තත්වයට වුවද ගොදුරු විය හැකියි. එවැනි අවස්ථාවකදී නාඩි වේගය වැඩි වීම , ශ්වසන වේගය වැඩි වීම වැනි අවදානමක් ඇති වීමට පුළුවන්. එවැනි අවස්ථාවක හැකි ඉක්මනින් වෛද්‍ය උපදෙස් ලබා ගැනීම ඉතාම වැදගත්. එතෙක් ඔබට ලබා දිය හැකි ප්‍රථමාධාර කීපයක් තිබෙනවා.

• සිසිල් සෙවන ඇති ස්ථානයකට රැගෙන යන්න
• ශරීරයේ අනවශ්‍ය ඇඳුම් ඉවත් කරන්න
• සිසිල් ජලයෙන් ශරීරය තෙතමාත්තු කරන්න.
• 1990 සුවසැරිය අමතා දරුවා හැකි ඉක්මනින් වෛද්‍ය ප්‍රතිකාර වෙත යොමු කරන්න.

පාසල් ක්‍රියාකාරකම්වල නිරත වීම.

• අධික උෂ්ණත්වය සහිත දිනවල සිසුන් එළිමහනේ ක්‍රියාකාරකම්වල නිරත කිරීම සුදුසු නැහැ
• පාසල් විවේක කාලයේදී දරුවන් එළිමහනේ ගත කිරීම සහ දැඩි හිරු එළියට නිරාවරණය වන සේ ක්‍රිඩා කිරීම වලක්වා ගත යුතුයි.
• වැඩිපුර ජලය පානය කිරීම සහ වෙහෙස නිවා ගැනීම වෙනුවෙන් කෙටි විවේක කාල දෙකක් ලබා දීම
• දහවල අධික උෂ්ණත්වය නිසා දරුවන් අනවශ්‍ය පරිදි හිරු එළියට නිරාවරණය වීමට ඉඩ නොදීම මෙය පාසලේ පමණක් නොව නිවසේදීත් සිදු කරන්න.
• ප්‍රාදේශීය වශයෙන් පවතින උෂ්ණත්ව කාලගුණ තත්වයන් ගැන සලකා බලා නිවාසන්තර ක්‍රිඩා තරග හා පුහුනුවීම් කටයුතු සැලසුම් කිරීම වඩාත් සුදුසු වේ.

පහසුකම් සැලසීම

• අවශ්‍ය තරම් බීමට ජලය සැපයීම සහ පිරිසිදු ජලය වැඩි වශයෙන් පානය කිරීමට දරුවන් යොමු කිරීම
• පාසලේ ප්‍රමාණවත් ජල පහසුකම් නොමැති නම් විකල්ප ක්‍රම භාවිත කරන්න. දිස්ත්‍රික් ආපදා කළමනාකරණ සම්බන්ධීකරණ නිළධාරීන් මගින් දිස්ත්‍රික් ලේකම්ගේ සහය මේ වෙනුවෙන් ලබා ගත හැක.
• පංති කාමරයේ වාතාශ්‍රය හොඳින් ලැබීම සඳහා දොර ජනේල විවෘතව තබන්න. විදුලි පංකා භාවිත කරන්නේ නම් පිරිසිදු වාතාශ්‍රය ලැබීම සඳහා දොර ජනේල අනිවාර්යෙන්ම විවෘතව තබන්න.
• මහල් හෝ ටකරන් සෙවිලි කරන ලද ගොඩනැගිලි නම් ඒවායේ පවත්වන පංති කාමර වෙනුවෙන් වෙනත් සුදුසු තැනක් තෝරා ගන්න.

සිසුන්ගේ පෙර සූදානමත් වැදගත්..

• අවශ්‍ය අවස්ථාවලදී ටයි පටිය නොපැලඳීම හෝ ටයිපටිය ලිහිල් කරන්න
• බඳපටි පැළඳීම හැකිතාක් අවම කිරීම
• අධික හිරු එළිය සහිත ප්‍රදේශවලදී හොඳින් හිස ආවරණය වෙන හිස්වැසුමක් හෝ කුඩයක් භාවිතා කරන්න
• තද වර්ණයෙන් යුතු ඇඳුම් පැළඳුම් භාවිතා නොකරන්න.
• නිවසෙන් බැහැර යන විට වතුර බෝතලයක් රැගෙන යන්න
• සාමාන්‍ය දිනවලට වඩා වතුර පානය කරන්න. ජලය වෙනුවට ආදේශක ලෙස තැඹිලි, කුරුම්බා වැනි පානවර්ග සුදුසු වේ. පැණි බීම භාවිතා කිරීම කිසිසේතම සුදුසු නැත.
• අධික උෂ්ණත්වය නිසා අහිතකර රෝග ලක්ෂණ ඇති වන්නේ නම් නොපමාව වෛද්‍ය උපදෙස් ලබා ගැනීම වැදගත් වේ.

එහෙමනම් එදා පායපු ඉරට වඩා අද පායන ඉර වෙනස් බැව් දැන් අපි දන්නවා. ඒ නිසා ඉරට මුවාවෙන් හිඳ ගෙන අපේ සෞඛ්‍ය වගේම දරුවන්ගේ නීරෝගී බවත් ආරක්ෂා කර ගැනීම ඉතාම වැදගත්.

සටහන

පුන්‍යා චාන්දනී ද සිල්වා