කතන්දරයක් අහනවා කියන්නේ වයස් භේදයකින් තොරව ලොකු පොඩි අපි හැමෝම ආස කරන අත්දැකීමක්. ඒත් ඉතින් ඉවරයක් නැති ජීවිත අරගලයක පැටලිලා ඉන්න වැඩිහිටියන්ට කතන්දර කියන්න අහන්න වෙලාවක් නැහැ තමයි. ඒත් ඒක පුංචි දරුවන්ගේ ලෝකයට අදාල නැහැ. ආච්චි අම්මට සීයට නැත්නම් අම්මට තාත්තට හරි නැත්නම් ලෙන්ගතු ඕනෑම කෙනෙකුට ලං වෙලා කතන්දරයක් අහනවා කියන්නේ පුංචි දරුවන්ගේ ආත්මයම නලවන රසබර අත්දැකීමක්. එය ඔවුන්ගේ මානසික සන්තුෂ්ටියට පමණක් සීමා නොවී ඔවුන්ගේ පෞරුෂත්ව වර්ධනය හා සම්බන්ධ බොහොමයක් ප්‍රතිලාභ ගෙන එන අත්දැකීමක් වගේම පවුලේ එකමුතුව සතුට වර්ධනය කරන වටිනා අත්දැකීමක් බව ඔබ දන්නවද? ඔබගේ හුරතල් දියණියව පුතුව ආදරෙන් ළං කරගෙන කතාවක් කියන අවස්තාව ඔබට මඟ හැරුණා නම් ඒ අත්දැකීමේ වටිනාකම හඳුනා ගන්නට අපි ඔබට ගෙන එන මේ කරුණු වැදගත් වේවි.
අනාදිමත් කාලයක ඉඳලා මිනිස්සු කතන්දර ලිව්වේ කිව්වේ වගේම ඇහුවෙ නිකම්ම නෙවෙයි. කතන්දරයක් කියන්නේ අපට යම් රසයක් වගේම පණිවිඩයක් ගෙන එන දෙයක්. ඒ වගේම ඒ තුළ විශ්වය, ලෝකය, මිනිසුන් හෝ ජීවිතය පිළිබඳ යම් දැනුමක් අන්තර්ගත වන්නා සේම ඒ සියල්ල මිශ්‍රව අපගේ මනස සුවපත් කරමින් මුහුකුරා යන්නට ඉඩ සැලසෙන අත්දැකීමක්. මානසිකව පමණක් නෙවෙයි භෞතික ශරීරය තුල වුවත් ඔක්සිටොක්සින් හෝමෝන ක්‍රියාකාරිත්වය උත්ප්‍රේරණය වීමට හොඳ කතන්දරයක් ඇසීමෙන් ලැබෙන මානසික සුවතාවය වැදගත් වෙනවා.
විශේෂයෙන් බහ තෝරන වයසේ සිටින දරුවන් හට භාෂා ඥානය වේගවත් ලෙස ග්‍රහණය කර ගැනීම සඳහා කතන්දර ඇසීම ඉතා ප්‍රයෝජනවත් වෙනවා. දරුවකු තමාගේ මව් බස ඉගෙනීම ආරම්භ කරන්නේ පාසලෙන් නොව නිවසේදීයි. කතන්දර හරහා ඔවුන් නව වචන, ප්‍රස්ථාපිරුළු, සමාන පද, වාක්‍ය රටා, වචන උච්චාරණය ආදී විශාල පරිමාවක් ලබා ගන්නවා. එසේම භාෂා දැනුමෙන් පොහොසත් දරුවෙකුට පාසලට ඇතුළත් වූ පසු අවධානයෙන් අධ්‍යාපන කටයුතු සාර්ථකව කරගෙන යෑමට එය වටිනා අඩිතාලමක් බවට පත්වනවා. එවැනි දරුවන් තමන්ට ඇසෙන දේ වඩා හොඳින් ග්‍රහණය කර අවබෝධ කරගැනීමට මෙන්ම තමාව වඩා ආකර්ෂණශීලී ලෙස ප්‍රකාශනයට ද දක්ෂ වෙනවා.
මිනිසුන්, ගහකොළ, පරිසරය, මිනිස් සබඳතා, විශ්වයේ, තාරකා පිළිබඳ කතන්දර තුළ අඩංගු තොරතුරු පුංචි දරුවන්ට විස්මයජනක අත්දැකීමක් වන අතරම ඒවා කතාන්දරයක් තුළින් ලැබෙන නිසා ඔවුන්ගේ මතකයට ද ඒ දැනුම තදින් කාවදිනවා. ඒ දැනුම ඔවුන්ව ජීවිතය යම් මට්ටමකට ඔසවා තබන අ ඒ කතන්දර හරහා ව්‍යංගයෙන් ඔවුන් තුළ සිදුවන ආකල්පමය වර්ධනය ද ඉතා වැදගත්. විශේෂයෙන්ම සතුන්ට ගහට කොළට ආදරේ කරන සංවේදී සිතක් නිර්මාණය වීමටත් ආදරය, කරුණාව, අනෙකාට ගෞරව කිරීම ආදී උතුම් මානුෂීය ගුණාංග කුඩා සිත්වලට කා වැදීම නිසා ඔවුන්ගේ මුළු මහත් ජීවිතයටම වැදගත්වන පෞරුෂත්ව ලක්ෂණ නිර්මාණය වීමටද කතන්දර ඉවහල් වනවා.
අප එතරම් අවධානයක් යොමු නොකරන නමුත් ශක්තිමත් සහ අත්මභිමානයෙන් යුත් පෞරුෂත්වයක් ගොඩ නැගීම සඳහා රටක ඉතිහාසය හා සංස්කෘතික වටිනාකම් පිළිබඳ ඔබ දරුවාට ලබා දෙන ආකල්ප ඉතාම තීරණාත්මකයි. එමනිසා අපේ ඉතිහාසයේ ප්‍රෞඪ බව කියවෙන සිද්ධි නිර්මාණ මෙන්ම අපගේ ජාතික වීරයන් පිළිබඳ කතාන්දර මෙන්ම අපේ සංස්කෘතියට අනන්‍ය සිරිත් විරිත් සාම්ප්‍රදායික අභිචාර විධි ඇඳුම් පැළඳුම්, ආහාර හා ජීවන රටා පිලිබඳ තොරතුරු නොදැනුවත්වම දරුවාගේ මනසට කා වදින අවස්ථාවක් ලෙස කතන්දර උපයෝගී කරගත හැක. විශේෂයෙන්ම අපගේ ජාතික වීරයන් පිළිබඳ කතා, ජාතක කතා සහ ජනප්‍රවාද ආදිය මේ සඳහා යොදාගත හැකියි.
කතන්දර අසන්නට පමණක් නොව කතන්දර කීමට ද ඔබ දරුවා උනන්දු කළ යුතුයි. කලින් දින ඔබ කියූ කතාවක් නැවත මතක් කිරීමට දරුවා උනන්දු කිරීම ඔහුගේ මතක ආවර්ජන අභ්‍යාසයක් වැනියි. එසේම රූපයක් බලා කතාවක් නිර්මාණය කිරීම, එදිනෙදා දවසේ විස්තර කතන්දරයක් ලෙස කීම මෙන්ම දරුවාට නිදහසේ කතාවක් ගොතන්නට අවස්ථාව ලබා දීමද වැදගත්. එවැනි අවස්ථාවලදී ඔවුන් පවසන සියලුම දේ විශ්වාසයෙන් යුතුව ඔබ අසන බවට මෙන්ම එය රසවත් බවත් ඔවුනට පසක් වන්නට ඉඩ හැරිය යුතුයි. එවිට දරුවාගේ නිර්මාණශීලී භාවය, ආත්ම විශ්වාසය වැනි ගුණාංග උත්ප්‍රේරණය වනු ඇත.
කතන්දර කීම හෝ ඇසීම එක් අයෙකු තනිව නොව දෙදෙනෙකු හෝ කිහිප දෙනෙකු එක්ව කරන විනෝදාත්මක අත්දැකීමක් නිසා මෙ සියල්ලටම වඩා පවුලේ සාමාජිකයින් අතර ළෙන්ගතුකම් හා බැඳීම් වඩාත් ශක්තිමත් වීමට මෙම විනෝදාංශය හේතුවක් වනු ඇත. ඉතින් ඔබේ දරුවා සංවේදී හදවතක් ඇති වටිනාකම් සහිත ශක්තිමත් පෞරුෂයක් ඇති පුද්ගලයෙකු ලෙස වර්ධනය කරන මෙවැනි විනෝදාංශ ඔබට මෙතෙක් කල් මග හැරී තිබුණා නම් නැවත ඒ ගැන සිතා බලන්නට මේ කාලයයි.
Leave feedback about this