ළමා වියෙන් තාරුණ්‍යයට එළඹෙන අපි කෙමෙන් කෙමෙන් වියපත් වීම ස්වභාව ධර්මයේ නියමයයි. කාන්තාවන් තරුණ වියේදී තරුණ පෙනුම වැඩි දියුණු කර ගනිමින් පවත්වා ගැනීමටත් කෙමෙන් කෙමෙන් තාරුණ්‍යයෙන් ඔබ්බට යන විට තරුණ පෙනුම තව දුරටත් පවත්වාගෙන යාමටත් ආශාවන් දක්වනවා මෙන්ම කටයුතු කරයි. රුව රැක ගැනීමේ ප්‍රයන්තය වර්තමානයේ පමණක් නොව ඈත අතීතයේ රෝම, ඊජිප්තු ශිෂ්ඨාචාර වල කාන්තාවන් ඔවුන්ගේ සිරුර පිරිසිදු කිරීමට, සුවඳවත් කිරීමට හා වර්ණවත් කිරීමට, තාරුණ්‍ය රැක ගැනීමට, ආලේපන වර්ග ගල්වා තිබෙන බවත් ලංකා ඉතිහාසය තුල කාන්තාව දේශීය වෙදකම හා බැඳුණු රූපලාවන්‍ය සත්කාර ක්‍රමවේද හා රුව රැක ගැනීමේ ශිල්ප ක්‍රම බහුලව භාවිත කර තිබෙන බවටත් සාක්ෂි ඇත.
ආයුර්වේද වෛද්‍ය විද්‍යාවෙහි ස්ත්‍රී රෝග තන්ත්‍රයෙහි තරුණ කාන්තාව රාජෝමතී අවුරුදු දොළෙහ් සිට අවුරුදු දාසය දක්වා වයස් කාලයට අයත් අතර විවාහයට සුදුසු දරුවකු ලැබීමට උචිත කාලය අවුරුදු දහසයක් බව දක්වා තිබේ. එහිදී ක්‍රමයෙන් වයස වැඩි වන විට තරුණ කාන්තාවගේ පිත දෝෂය ද ක්‍රමයෙන් වැඩිවේ. ඇය ගිතෙල් පිරුණු කළයකට උපමා කොට තිබේ. එයට හේතුව කාන්තා හෝමෝන උපරිම වයස් කාලයයි. ඇයගේ චවිකල්‍යාණිය එනම් සමයෙහි පැහැපත් බව, අඛණ්ඩව නීරෝගීව පවතින්නේ ශරීරයේ සප්ත ධාතුවල රස ධාතුව මගින් සමයෙහි පෝෂණය, නිරෝගී කම රැක දීම තුලින්ය. තරුණ කාන්තාවකගේ රූ සපුව ආකර්ෂණීය වන්නෙ ඇගේ නීරෝගී සෞඛ්‍ය සම්පන්න සම අනුවය. එය ඇය ලබා ගන්නා පෝෂ්‍ය පදාර්ථ මත තවදුරටත් රැක ගත හැකි බවත් යුවති කාලයේ අවසන් භාගයේ එම යෞවනත්වය, ප්‍රජනන ශක්තිය රැක ගැනීම රසායන ක්‍රම ප්‍රතිකාර කාන්තාවන්ට නිර්දේශ කර තිබේ. එයට හේතුව අවුරුදු 35 න් පසු ශරීරයේ පවතින පිත දෝෂ ක්‍රමයෙන් අඩුවීමත් වාත දෝෂ ක්‍රමයෙන් වැඩිවීමත් නිසා සම වයසට යාම ආරම්භ වන බැවිනි.
විශේෂයෙන්ම වර් තමනානයේ ලංකාව තුළ අපේ කාන්තාවන් සිහින් සිරුරක සහ සුදු පැහැති සම සුන්දරත්වයේ හා තාරුණ්‍යයේ ආභරණයක් ලෙස සැකීමට පුරුදුව ඇත. ලංකාවේ වෙළඳපොළ තුළ වැඩිම ඉල්ලු‍මක් ඇත්තේ සම සුදු කරන, පැහැය වැඩි කරන ක්‍රීම් වර්ග වලට සහ ඇඟ සිහින් කරන ප්‍රතිකර්ම වෙතය. ඊට අමතරව සමේ තාරුණ්‍යය රැක ගැනීමට, ශරීරයේ අනවශ්‍ය මේදය ඉවත් කිරීමට, කෙස් හා නියපොතුවල වර්ධනයට අවශ්‍ය ක්ෂුද්ර පෝෂක කොටස් පෙති වශයෙන් සිරප් වර්ග වශයෙන් හෝ එන්නත් මාර්ගයෙන් හෝ අභ්‍යන්තරයට ලබා ගැනීම විලාසිතාවක්ව ඇත. විශේෂයෙන් බයොටීන්, එනම් විටමින් – B7, β-කැරොටීන්, විටමින් – A, විටමින් – E සහිතව නිෂ්පාදිත පෙති වර්ග, කරල් වර්ග අලෙවිය බහුලව සිදු වේ
ඉහත ක්ෂුද්ර පෝෂක කොටස් රූපය රැක ගැනීමේදී සැලකිය යුතු මෙහෙයක් සිදු කරන අතර, ගැටලු‍ව වන්නේ එළවළු, පලා වර්ග හා පළතුරු මගින් නොව පෙති, කරල් හරහා ඉක්මනින් සුදු වීමට, ඉක්මන් ලස්සනකට, මාත්‍රාවන් ඉක්මවාද මේවා ලබා ගැනීමෙන් ශරිරයට සිදුවන හානිය පිළිබඳ අවධානය යොමු නොකිරීමය.
විශේෂයෙන් “බයොටින්” නම් විටමිනය දිගු කාලීනව අධිමාත්‍රයෙන් ශරීරයට ලබා ගත් විට අග්න්‍යාශයේ ලැන්ගහැන් දීපිකා වල ඇති සෛල වලට හානි සිදුවේ. මේ නිසා ඉන්සියුලින් හෝමෝනය නිෂ්පාදනය අඩාල වීමක් සිදු වී අවසානයේදී දියවැඩියා රෝගියෙකු බවට පත් වීම සිදු විය හැක.
හම රන්වන් පාට කර ගැනීම අරමුණු කර ගෙන “β-කැරොටින්” වැඩි මාත්‍රාවෙන් ලබා ගැනීම නිසා හිස කෙස් වැටීම, තොල් පැලීම, විදුරු මස් ඉදිමීම, ආහාර දිරවීමේ ගැටලු ඇතිවෙන්න පුළුවන්.
මුහුණේ හැඩය වෙනස් වන විට එනම් ඩබල් චින් වැනි මුහුණෙහි මාංශ පේශී ආශ්‍රිතව පවතින අනවශ්‍ය මේද ස්ථර හා ශරීරයේ උදරය, අත්වල හා ඉණට ඉහළ පෙදෙස් වල අනවශ්‍ය මේදය දහනය කරලීමට රසායනික සංයෝගයක් වන deoxycholic acid එන්නතක් ලෙස ලබාදීම ද අද වන විට ප්‍රචලිතව ඇත. ඒ මගින් මෙම අනවශ්‍ය මේදය ශරීරයට අවශෝෂණ කරවීමක් සිදු කරයි. බෙල්ලෙහි ජෝ ලයින් මාංශ පේශී ලිහිල් බවට ද මෙම ප්‍රතිකාරය යොදා ගනියි. දීර්ඝ කාලයක් තිස්සේ මෙම ප්‍රතිකාරය නිතර නිතර ලබා ගැනීමෙන් සමෙහි ස්වභාවික කොලජන් ස්තරය ක්ෂයවී සම තවදුරටත් ලිහිල්වීමකට ලක් විය හැකිය.
වෙළඳපොළේ පවතින රූපලාවන්‍ය නිෂ්පාදන ශරීරයට ලබා ගැනීමෙන් කොලෙජන් නිෂ්පාදනය වැඩි වීමත් එමඟින් තරුණ බව රැක ගැනීමත් සිදුවන බව දක්වයි. නමුත් එම ඖෂධ වල කෘතිමව නිපදවන ලද කොලජන් synthetic collagen boosters හා හෝමෝන පවතී. මෙම ඖෂධ භාවිතයෙන් ක්ෂණිකව ශීඝ්‍ර ප්‍රතිඵල පෙන්නුම් කළද පසුකාලීනව වයසට වඩා මහලු පෙනුමක්, සමයෙහි ඝණකම අඩුවීම, මෙන්ම සංවේදී සම නිතර නිතර රෝග වලට ගොදුරු වන වියලි සමක් බවට පරිවර්තනය විය හැකිය. එසේම අභ්‍යන්තර ඖෂධ වල පවතින කෘතිම හෝමෝන වර් ග විෂ ලෙස රුධිරයට එක්වීම නිසා ඉහතදී අවධාරණය කළා සේම වකුගඩු අක්මාවට හානි පමුණුවන අතර සමෙහි පිළිකාකාරක සෛල උත්තේජනය සිදුවන අතර චර්ම රෝග ආසාදන ඇතිවීමේ ප්‍රවණතාවය බහුල වේ. මේවා පශ්චාත් උපද්‍රව ලෙස හැඳින්විය හැකිය.
ආයුර්වේද වෛද්‍ය විද්‍යාවේ තරුණකම නිරෝගි බව රැක ගැනීම සඳහා නීරෝගී පුද්ගලයාට ආහාර විහරණ ඖෂධ දක්වා තිබේ. ඒවා ස්වස්ත වෘත්ත ලෙස හඳුන්වයි. එම උපදෙස් පිළිපැදීමෙන් නීරෝගී තරුණ සමක් සහ නීරෝගී ශරීරයකටද හිමිකම් කිව හැකිය. මිල අධික කෘතීම අලේපන, ඖෂධ ක්‍රම මගින් තාවකාලික විසඳුම ලබා ගැනීමට උත්සහ කිරීම තුලින් ඔබ සදාකාලික රෝගී තත්ත්වයන් නොමිලේම ලබා ගන්නවාද නැද්ද යන්න ඔබම තීරණය කළ යුතුය.
තරුණ කාන්තාවන් නිතර ගිතෙල් ආහාරයට ගැනීම මාංශ රස (මස් සුප්) , කොල්ලු තැම්බූ වතුර, හාතවාරිය කොළ කැඳ, හකුරු මිශ්‍ර මුං කිරිබත්, ආහාරයට ගැනීම යෝග්‍ය වේ. තවද ඖෂධ ලෙස ඵලසෘතු, කුෂ්මාණ්ඩාවලේහය, ශතාවරි කල්පය, පුෂ්පා නුග චූර්ණය දක්වා ඇත.
පැලවෙන ධාන්‍ය, බඩඉරිඟු, සලාද කොළ, තද කොළ පාට පලා වර්ග වල විටමින් – E බහුලව ඇත. විටමින් E යනු ඉතාම ඉහළ ප්‍රතිඔක්සිකාරකයකි. ශරීරයේ පරිවෘත්තීය ක්‍රියාවලියේදී හේතුවෙන් නිෂ්පාදනය වන විෂ කොටස් (Free radicals) ඉවත් කිරීමට විටමින් E වලින් විශාල දායකත්වයක් ලබාදෙයි.
එසේම ශරීරයේ තෙල් ගැල්වීම සුදුසු බව ද ආයුර්වේදයේ දක්වා ඇත. මාංශපේෂී ස්තබ්දතාවය එනම් කොලෙජන් තන්තුවල ලිහිල්වීම වැළැක්වීම සහ සමයෙහි වර්ණය පැහැපත් කිරීමේ හැකියාවක් එහි පවතියි. මෙම ආහාර හා ඖෂධ මගින් මෙන්ම මුහුණකට බෙල්ල හා උදරයට විශේෂිත යෝග ව්‍යායාම මඟින් ද කාන්තාවන්ගේ තරුණ පෙනුම රැක ගැනීම හා එම තරුණ පෙනුම වියැකී සම රැළි වැටීම මුහුණෙහි රැලි ඇතිවීම, උදරය වටා පේෂි එල්ලා වැටීම වළක්වා ගැනීම හා පාලනය කරගත හැකිය.
බොහෝ විට කාර් යය බහුලත්වය නිසා සහ නිසි අවදානය යොමු නොකිරීම හේතුවෙන් අප ව්‍යායාම සිදු කරන්නෙ නැත. එහෙත් ව්‍යායාම රෝග වළක්වාගැනීම, ශරීරය තරබාරු වීමෙන් වළක්වා ගැනීමට හා ශරීරය ශක්තිමත් කරමින් තුරුණු බව ආරක්ෂා කිරීමටත් හේතුවේ. විනාඩි 35ක පමණ කාලයක් අඩුම වශයෙන් සතියකට දින තුනක් මෙම ව්‍යායාමවල යෙදීම ප්‍රමාණවත්ය. විශේෂයෙන්ම යෝග අභ්‍යාසවල සඳහන් සුමට ආසන කීපයක් පුහුණුවීම තුලින් ව්‍යායාම කිරීමෙන් බලාපොරොත්තුවන සියලු ප්‍රතිඵල ලැබේ. විශේෂයෙන් පැහැපත් හැඩැති සිරුරක් ලබා ගැනීමට යෝග අභ්‍යාස ඉහවල් වේ.
ආයුර්වේදයේ සඳහන් ”වයස්ථාන” ඖෂධ අඩංගු විවිධ රසායන ඖෂධ ක්‍රමානුකූලව ගැනීමෙන්ද ශරීරය තිරිහන් කරන හෝමෝන ස්‍රාවය යථා තත්ත්වයට පත් කළ හැකි බව විවිධ පරීක්ෂණවලින් සොයාගෙන ඇත. විශේෂයෙන්ම නෙල්ලි හා හාතාවාරිය අඩංගු ඖෂධ කාන්තාවන්ගේ මාස් ශුද්ධිය නතරවීමත් සමග ඇතිවන හෝමෝන අසමතුලිතතාව මගහරවා එමගින් ඇතිවන විවිධ අපහසුතා පාලනය කරගැනීමට හේතුවේ.
තුරුණු නීරෝගී පැහැපත් සමක් හා නීරෝගී හැඩැති සිරුරක් සැමදා පවත්වා ගැනීමට අප කාගේත ආශාව හා කැමැත්තයි. ඒ සඳහා යහපත් ජීවන පැවැත්ම, ආහාරපාන මෙන්ම මානසික නිරවුල්බාවයද හේතුවේ. මානසික ආවේග අපේ රූපය ක්ෂණිකව වෙනස් කරයි. “තරහා ගියෝතින් ඉක්මණින්ම වයසට යයි” කියන කියමන සියයට සියයක්ම නිවැරදිය. පුද්ගලයෙකුට යාමත් සමඟම මුහුණේ මාංශ පේශීන් දික් අතට ඇදීමකට ලක් වෙයි. නිතර නිතර කේන්ති ගන්න කෙනෙක්ගේ කම්බුල් ආශ්‍රිත සම දික් අතට එල්ලා වැටීමකට ලක් වන නිසා මූහුණ අකලට මහලු වූ බවක් දිස්වේ. නිතරම ප්‍රීතිමත්ව සිටින විට මුහුණේ කම්මුල් ආශ්‍රිතව තියෙන පේශීන් තිරස් අතට ඇදීමට ලක් වන නිසා සම එල්ල වැටීමට ලක් වීඹ අවම කර තරුණ බවක් රැක දෙයි.
එසේ නම් අද පටන් ස්වභාවිකව ඔබේ රුව රැක ගන්නට කටයුතු කරන්න ඔබත් සූදානම් වන්න. ඔබේ නීරෝගී බව හා තාරුණ්‍ය බව රැක ගන්නට කළ යුතු කටයුතු පිළිබඳ මී ළඟ ලිපියෙන් දැනුවත් කරන්නට අපි අපේක්ෂා කරන්නෙමු.
දැනුවත් කිරීම
ආයුර්වේද වෛද්‍ය ශිරෝමි විජේසිංහ මහත්මිය
දියතලාව ආයුර්වේද මහ රෝහල.
Leave feedback about this