කිරි සිහිනය දිගේ – 1

දින සති මාස ගෙවී යන්නේ වේගවත්වය. සුපුරුදු ලෙසම විශ්ව ගේට්ටුවෙන් ඇතුල් වන විටම මන්දාකිණි ඉදිරියට දිව ගොස් ඔහුව පිළිගත්තාය. තම ආදරණීය බිරිඳගේ උණුසුම් පිළිගැනීමත් සමඟම තම වෙහෙස දියවන්නා සේ ඔහුට දැනෙන්නට විය. සාලයේ මන්දාකිණිගේ සැරසිලි දුටු විශ්ව ඇය දෙස බැලුවාය.අනතුරුව මේසය මත තිබූ කේක් ඒක දෙස බැලූ ඔහු විශ්ව දෙස හැරී

ෂා , ඔයා ලස්සනට කේක් එකක් හදලා සරසලා මොකද්ද අප්පේ විශේෂත්වය
අනේ ඔයාට මතක නැද්ද? විසල් වූ දෙනෙතින් මන්දාකිණි විශ්ව දෙස බැලුවේ සිතේ නොරිස්සුමෙන්ය.
නෑනේ, මගේ උපන් දිනෙත් නෙමෙයි, ඔයාගෙත් නෙමෙයි
තාම ගෙවිලා ගියේ අවුරුද්දයි, අපේ ඇනිවසරි එක ඔයාට මතක නෑ ඒවර ඇය පැවසුවේ දෑස් කඳුලකින් බොඳ වෙද්දි
ඒකනේ ඔයත් එක්ක ඉඳලා කාලය ගෙවිලා යනවා දැනුනෙ නෑනේ. මෙන්න මගෙන් ඔයාට පුංචි තෑග්ගක්
ඔයා නම් හරිම නරකයි රැවැට්ටුවා. කෝ දෙන්නකො ඔය තෑග්ග

මන්දාකිණිගේ මැලවුණු වත නැවත විකසිත විය. ජීවිතය සතුටින් පුරවාගන්නට ඇවසි වන්නේ පුංචි පුංචි දේවල් පමණක්මය. අනෙකා පිළිබඳ සැලකිලිමත් වීම , ඇහුම්කන් දීම තුල, ගරුකිරීම, විශ්වාසය හා එකිනෙකාට සහයෝගයෙන් කටයුතු කිරීම තුලත් විවාහයක් සාර්ථක කරගැනීමට හැකිය. ඉඳ හිට කරන පුදුම කිරීම් ද අපූරුය.

අනේ හරි ලස්සනයි මේ ඔයාලගේ අක්කගෙ පුතා ඉපදුනු අලුත ගත්ත එකක් නේද? ඔයා ඒක ලොකු කළාද? මේක අපේ කාමරේ එල්ලමු. අපිත් මේ වගේ පැටියෙක් හදමුකො

මන්දාකිණි අතොරක් නැතිව කියවද්දි විශ්ව ඇයව ළං කරගත්තේය. මන්දාකිණි ත් විශ්වත් විවාහ වී වසරකුත් ගෙවී ගොස්ය. දෙදෙනාම රැකියා වල නිරත වූ නිසා දරුවෙක් හදන්නට ඔවුන් හදිසි නොවුනාය. පසුගිය සතිය පුරාම මන්දාකිණි අසනීපයෙන් පසු වූ නිසා විශ්ව සිටියේ කනස්සල්ලෙන්ය. මෙම සතියම නිවසේ සිට රාජකාරී කටයුතු කරන්නට ඇය කාර්යාලයෙන් අවසර ගත්තේ අසනීප තත්ත්වය නිසාවෙන්මය.

දැන් කොහොමද ඔයාගේ ඇඟට?
හැම තිස්සෙම තෙහෙට්ටුවයි තමයි තියෙන්නෙ
අපි ඩොක්ටර් හම්බ වෙන්න යමු, මම ඔයාගේ බ්ලඩ් රිපෝට්ස් ටික ආවා
හ්ම්…ඒක හොඳයි, බලන්නකො මම හුඟක් මහත් වෙලා.
හරි හරි අපි අද ඩොක්ටර් හම්බවෙන්න ගිහින් රෑට එළියෙන් කාලා එමු.

විවාහය යනු දෙදෙනෙක් අතර ආදරය, විශ්වාසය, සහයෝගය මත පදනම් වූ සම්බන්ධතාවයකි. කොපමණ හැල හැප්පීම් ඇති වුවද විවාහයක් ගලපාගෙන යන්නට මේ කාරණා තිබේ නම් අපහසු වන්නේ නැත. මන්දාකිණිත් විශ්වත් ඔවුන්ගේ පවුලේ වෛද්‍යවරයා මුණ ගැසෙන්නට ගියෝය.

ආ මේ දෙන්නනේ, කොහොමද මිසිස් සිරිවරධන බ්ලඩ් රිපෝට්ස්ටික ගත්ත ද?
ඔව් ඩොක්ටර් මේ තියෙන්නෙ

වෛද්‍යවරයා වාර්තාව පරික්ෂා කරන තුර මන්දාකිණී සිටියේ බියෙන්ය.
කෙටි කාලයක් තුල බර වැඩිවීම, නිතරම නිදිමත ,වැඩිපුර කේන්ති යෑම, කොණ්ඩෙ යන එක, ඕවනේ රෝග ලක්ෂණ වුණේ. කලබල වෙන්න දෙයක් නැහැ තයිරොක්සීන් අඩුවීමත්, නිරක්තියත් තමයි ගැටලුව. අපි ඒකට ප්‍රතිකාර කරන කොට ඔය අපහසුතා මගඇරේවී.

ඩොක්ටර් එතකොට දැන්මම අපි බබෙක් හදන්න එපාද ?
මන්දාකිණි විමසුවේ විශ්ව දෙස බලමින්ය.

තයිරොක්සීන් හෝමෝනය ශරීරයේ හැම සෛලයකම පරිවෘත්තීය ක්‍රියාවකටම අත්‍යාවශ්‍යයි. තයිරොයිඩ් ඌණතාවයට ප්‍රතිකාර නොගෙනම දරුවෙක් හදන්න හිතන ඒක නම් අවදානම්. අම්මා කෙනෙක්ගේ කුසේ වැඩෙන කලලයක සති 12 ක් පමණ වෙන තුරු තයිරොයිඩ් ග්‍රන්ථිය ක්‍රියාත්මක වෙන්නෙ නැති නිසා දරුවාට තනිවම තයිරොයිඩ් හෝමෝන නිපදවීමට හැකියාව නැහැ. මේ සති 12 තුල අම්මගේ රුධිරයෙන් ලබා ගන්නා තයිරොයිඩ් හෝමෝනයෙන් තමයි දරු ගැබේ ක්‍රියාකාරිත්වය සිදු වෙන්නෙ. තයිරොක්සින් හෝමෝනය දරුවාගේ මොලය සහ බුද්ධිය වර්ධනය සඳහා ඉතා වැදගත් ඒ නිසා මේ කාල සීමාව තුල අම්මගේ රුධිරයේ තයිරොක්සින් හෝමෝන මට්ටම නියමිත ප්‍රමානයට තියෙන්න ඔ්නී.

තයිරොක්සීන් ඌණතාවයේදී ප්‍රතිකාර විදිහට තයිරොක්සින් කියන පුංචි පෙත්තක් උදේ නැගිටපු ගමන් හිස් බඩ බොන්න ඔ්නී. තයිරොක්සීන් ඌණතාවය තියෙන කොට කාන්තාවන්ට ගැබ් ගැනීම ප්‍රමාද වෙන්නත් ඉඩ තියෙනවා. ඒ නිසා නිසා ගැබ් ගන්න කලින්ම හරියට වෛද්‍ය ප්‍රතිකාර ගන්න ඔ්නීි

ගැබිනි මවක් මුලින් ම සිදු කරන රුධිර පරීක්ෂණ සමග TSH නම් පරීක්ෂණය කිරීමෙන් රුධිරයේ තයිරොයිඩ් හෝමෝන මට්ටම අඩු හෝ වැඩි වීම ඇති දැයි හඳුනා ගන්න පුළුවන්. එම පරීක්ෂණයේ ප්‍රතිඵල අනුව සුදුසු පරිදි ඖෂධ ලබා ගෙන තයිරොයිඩ් හෝමෝන වෙනස් වීම නිසා දරු ගැබට ඇතිවිය හැකි හානි අවම කර ගන්න හැකියාව තිබෙනව. Hypothyroid රෝග තත්වය ඇති කාන්තාවන් ගැබ් ගත් වහාම TSH පරීක්ෂණය සිදු කර සුදුසු පරිදි ඖෂධ මාත්‍රාව වෙනස් කිරීම අවශ්‍ය වෙනව.

නැවතත් වරින් වර මෙම පරීක්ෂණය සිදු කර හෝමෝන මට්ටම නිසා ප්‍රමාණයට පාලනය කර තබා ගැනීමට වෛද්‍ය උපදෙස් අනුව ඖෂධ භාවිතා කිරීම සුදුසුයි.
ශරීරයේ තයිරොයිඩ් හෝමෝනය වැඩි වීම තවත් රෝග තත්ත්වයක්. ඒක හයිපතයිරෝඩිසම් (hyperthyroidism). මේ තත්වය සඳහා ගන්නා සමහර ඖෂධ ගර්භණී කාලයේ දී එතරම් සුදුසු නැති නිසා ගැබ ගත් වහාම වෛද්‍ය වරයෙකු හමුවී ඖෂධ නිසි ලෙස නිර්දේශ කරවා ගැනීම අවශ්‍ය වෙනවා. මේ වගේ නිදන් ගත රෝග තියෙනවා නම් විශේෂඥ වෛද්‍ය උපදෙස් ලබා  ගැනීම වැදගත් වෙනවා.

ගර්භණී කාලේ අම්මට වැඩියෙන්ම සංකූලතා ඇති කරන නිරක්තිය, දියවැඩියාව, රුධිර පීඩනය, වගේම තයිරොයිඩ් පරික්ෂාවත් ගැබ් ගන්න පෙරම සිදු කරන එක හොඳයි. තයිරොයිඩ්, නිරක්තිය තියෙන නිසා මාස තුනෙන් තුනට මේ තත්ත්වය පරික්ෂා කරලා බෙහෙත් ප්‍රමාණය අඩු වැඩි කිරීමත් කරන්න ඕනි. ඒ වගේම දරු පිළිසිඳ ගැනීමකට මාස තුනකටවත් කලින් ෆෝලික් ඇසිඩ් ගන්න ඔ්නී

ඔව් ඩොක්ටර් දැන් මම මාස හතරක ඉඳන් ෆෝලික් ඇසිඩ් බොනවා. ඩොක්ටර් අපස්මාරය තියෙන කෙනෙකුට බබාලා හදන්න හොඳ නැද්ද?

එහෙම ගැටලුවක් නැහැ. නමුත් නීරෝගී ගර්භණී මවකට වඩා ,අපස්මාරය, අධික දියවැඩියාව, අධි රුධිර පීඩනය, හෘදයාබාධ වගේ රෝග තත්ත්වයන්ගෙන් පෙළෙන මවකට වඩා සංකූලතා වැඩියි. ඒවගේ මවක් මාස නවය පුරාම හුඟක් පරිස්සම් විය යුතුයි. ඒ රෝගයන්ට ගන්න සමහර ඖෂධ ප්‍රතිකාර කුස තුල වැඩෙන දරුවන්ගෙ කායික සහ මානසික වර්ධනය වගේම බුද්ධි වර්ධනයටත් කෙලින්ම බලපානවා. අම්මා ගන්න ඒ ඖෂධ නිසා දරුවට විවිධ සංකූලතා හා විකෘතිතා ඇති වෙන්න පුලුවන්.

අධිරුධිර පීඩනය, දියවැඩියාව, අපස්මාරය, හෘදරෝග, තයිරොයිඩ් සහ නිදන්ගත රෝගයන් සඳහා ප්‍රතිකාර ගත් අයෙක් නම් ඊට අදාලව ප්‍රතිකාර ගත් වෛද්‍යවරයාගෙන් ගර්භණී කාලය පුරාවට ප්‍රතිකාර සහ උපදෙස් ලබා ගන්න ඕනී. ඒ වගේම ගර්භණී මවගෙ හැම රෝගයක් ගැනම ප්‍රසව හා නාරී රෝග විශේෂඥ වෛද්‍යවරයාව දැනුවත් කිරීම අනිවාර්යෙන්ම කරන්න ඔ්නී. හරි මේ ලියල දීලා තියෙන විදිහට ෆෝලික් ඇසිඩ්, අයන්, තයිරොක්සීන් ගන්න.
ගොඩක් ස්තුතියි ඩොක්ටර් අපි එහෙනම් ගිහින් එන්නම්.

සටහන

දිශාන්ති වෙදගේ