ඔබේ ගෙවත්තටත් ඔසු උයනක්

නිවසේ අලංකාරයට මල් වගා කිරීමට අපි කව්රුත් කැමතියි. පුංචිම බිම් කඩක වුවද මල් පැලයක් සිටුවීමට අපේ ගෘහනියන් පුරුදු වී සිටිනවා. අලංකාරවත්, මල් පිපෙන මල් පැළ මෙන්ම අලාකාරවත්, මල් හටගන්නා ඖෂධ පැළෑටිද බොහෝ තිබෙනවා. මල් පැළයකින් අලංකාරය පමණක් ලැබුණද, ඖෂධ පැළෑටියකින් ඊට වඩා වැඩි වටිනාකමක් ලැබෙනවා.ඒ නිසා නිවසේම පුංචි ඔසු උයනක් සාදා ගැනීම හිතට සතුටක් වගේම පවුලේ හැමෝටම ප්‍රයෝජනවත් දෙයක්..හවසක වත්තේ තියෙන ඉගුරු කෑල්ලක් ගලවලා තේ එකක රසවිදින්න පුළුවන් නම් කොපමණ සතුටක්ගෙන දෙනවද?

ගෙවත්තේ ඔසු උයනක් සාදා ගනිමු……

ඔසු උයනක් සේ අපට සැලකිය හැක්කේ ඖෂධීය වටිනාකමින් යුත් ගස්, වැල්, පඳුරු, පැළෑටි හා අල වර්ග වලින් පිරැණු බිමක්. මෙම බිමේ ක්‍රමවත් ආකාරයෙන් ඒවා හඳුනාගැනීමට පහසුවන පරිදි පිළිවෙළකට වගා කරන්න හැකියි. එසේ නැතිනම් තිබෙන සීමිත ඉඩකඩක වුවද ඔසු පැළ වගා කකරන්න පුළුවන්. ඖෂධීය පැළෑටි වලද විසිතුරු මල් පිපේ. තවත් සමහරක් රසවත් පලතුරු සහිත ශාකයි. මේ නිසා ඔසු උයන මල් උයනක් හෝ පලතුරු උයනක් හෝ ලෙසද අපට පවත්වාගෙන යන්න පුළුවන්.

ගෙවත්තේ සුදුසු බිමක් තෝරාගැනීම

• බිම ජලය රුඳෙන ස්ථානයක නම් පාත්තිය වටා අඟල් 9 ක පමණ ගැඹුරට කාණු කපා ජලය බැස යාමට සැලැස්විය යුතුයි.
• පාත්තිය වියළි ප්‍රදේශයක සකසසන්නේ නම් ජලය රුඳෙන සේ ගැඹුරට හෑරූ පාත්ති සෑදීම සිදු කරන්න
• පාත්තිය වටා ආරක්ෂිත වැටක් ඉදිකිරන්නේ නම් වැටට ඖෂධීය ගසුත් පඳුරුත් භාවිතා කරන්න

ඔසු බීජයක් තවාන් කරන විට

• වැලි මාධ්‍යක ඖෂධ බීජ හෝ දඬු කැබලි තවාන් කිරීම සිදු කල යුතුයි .
• පහසුවෙන්ම සොයාගත හැකි ටින්, මුට්ටි, බෝතල්, පොල්ලෙලි, උණ බට, කෙසෙල් පතුරු ආදී දෙයක වගා කළ හැකියි
• වැලි, පස්, කොම්පෝස්ට් සමාන ප්‍රමාණ ගෙන කොහු බත් සුළු ප්‍රමාණයක් ඊට එකතු කර ඉහත බඳුන් සඳහා අවශ්‍ය මාධ්‍ය සාදා ගන්න
• අඩියක් පමණ උස්ව වැඩුණු විට පැළයට හා පැළයේ මුලට හානි නොවන සේ බඳුන්වල සිටුවාගත් පැළ ඉවත්කර සකස් කරගත් පාත්තිවල සිටුවීම

පැළයක් සිටුවන වළක ගැඹුර

• පැළ සිටුවීමේදී ගස් අතර පරතරය අඩි 15 හා 20 අතර විය යුතුය. වළක් අඩි 2x2x2 ප්‍රමාණයේ විය යුතුය.
• පඳුරු නම් අඩි 5 ත් 10 ත් අතර පරතරයන් තිබිය යුතුයි.
• පාත්ති වෙන් කිරීමේදී
  • කොළකැඳට ගන්නා පැළෑටි
  • සර්ප විෂ සඳහා ගන්නා පැළෑටි
  • ඔසු පැන් සඳහා ගන්නා පැළෑටි
  • කැඩුම් බිඳුම් සඳහා ගන්නා පැළෑටි
  • දුර්ලභ හා වඳ වී යාමේ තර්ජනයට මුහුණ පාන පැළෑටි යනාදී වශයෙන් වගාව වර්ග කළ හැකිය.
• පාත්ති සැකසීමේදී අලංකාර ලෙස රවුම්, හතරුස් හෝ ත්‍රිකෝණාකාර යන ඕනෑම ආකාරයකින් භූමියට අලංකාරයක් ගෙන දෙන ලෙස පාත්ති සාදා ගැනීම සිදු කල හැක.

නිවසේදී සාදාගත හැකි පොහොර වර්ගයක්

කොම්පෝස්ට්, කොහු බත්, ගොම පොහොර, ගැල් පොහොර, අළු වැනි දේ මිශ්‍රකර කාබනික පොහොර වර්ගයක් සාදාගත හැකිය. මෙම පොහොර මගින් පාංශු ව්‍යුහය, පෝෂණය වැඩිකරන අතර පසේ වෙසෙන ගැඩවිලුන් පණුවන් වැනි සතුන්ද විනාශ නොවේ.

ගෙවත්තේ වගා කළ හැකි පැළ කිහිපයක්

• කොළ කැඳ සඳහා ගන්නා ඖෂධ – ගොටුකොළ, මුකුණුවැන්න, හාතාවාරිය, කරපිංචා, කොහිල, කුප්පමේනිය, දිවුල්, නීරමුල්ලිය, රණවරා, පොල්පලා, වැල්පෙනෙල, මොනරකුඩුම්බිය, එළ බටු, යකි නාරං, හීං උඳුපියළිය, හීං බෝවිටියා, නිල් විෂ්ණු ක්‍රාන්ති, වැල් තිබ්බටු, කටු අනෝදා, කොක් මොට
• ඔසු පැන් සඳහා ගන්නා ඖෂධ පැළෑටි – ඉරමුසු, නෙල්ලි, බෙලි, රණවරා, රත්මල්, නිරමුල්ලිය, කොත්තමල්ලි, අක්කපාන, හීං බෝවිටියා, පොකුරු වදමල්, පිටවක්කා, පප්පාඩගම්, බක්මී
• සර්ප විෂ නැසීමට ගන්නා ඖෂධ පැළෑටි – කරපිංචා, කඩුපහර, කොහොඹ, දිවුල්, දෙහි, කහ, ඒකාවේරිය, කුප්පමේනිය, හීන්අරත්ත, දත්කැටියා, සස්සද, දිමි බිජු, කොට දිඹුලා, මහ අරත්ත, කිකිරිඳිය, දිවිපහුරැ, ඵල රත්තන, අහු, හීං දෙමට, හීං මදුරැතලා, පුපුල, මඟුල් කකරඳ
• කැඩුම් බිඳුම් වලදී ගන්නා ඖෂධ පැළෑටි – අංකෙන්ද, කහ, කැටකෑල, එරබදු, දෛඹ, කොහොඹ, බැලතණ, කොබ්බෑ, කැප්පෙටිය, කොට දිඹුලා, අඹ, ඇටඹුරැ, හීං උඳුපියළිය, එළබිංතඹුරැ, ගස් කැප්පෙට්ටිය, නව හංදිය, තොටිල, බලු දං, හීං බැවිල, මඟුල් කරඳ, මදටිය, රදලිය, සුදු වෙල්ලන්ගිරිය
• ලොකු බිම් ඉඩකඩක් ඇති ගෙවත්තක් නම් විශාල ලෙස වැඩෙන ඔසු ශාක වුවද සිටවා ගත හැකියි. නෙල්ලි, මඟුල්කරඳ, බුළු, දොඹ, කුඹුක්, නා, මාදං, මොර, බෙලි, අරළු, ඇහැළ, මී, මූණමල්, ඇත්දෙමට, පලොල්, බෝමි, ගිනිසපු, සුදු හඳුන්, දොරණ, ඇටඹ, ලුණු වරණ, තෙල් කැකුණ, බෝඹු, බෝමි, ගම්මාලු, කැටකැල, කොහොඹ, ගොරක.
• ඖෂධී පඳුරු ලෙස වගාකල හැකි පැලෑටි – මලිත, දෙළුම්, ආඩතෝඩ, නික, රණවරා, බටකිරිල්ල, එඬරු , රත්මල්, කපු, හීංඅරච්ච, ඇත්තේර, කටුවැල්බඩු, අනිත්ත, කටු කකරඬු, කොතල් හිඹුටු, අමුක්කරා, කොල්ලන් කොළ, හීං මිදි, කුඩු මිරිස, හීන් බැවිල, ඇට්ටේරිය.
• ඖෂධීය වැල්හා – තවාරිය, රසකිඳ, වෙනිවැල්, සමන්පිච්ච, පැල්පෙනෙල, තිප්පිලි, කටරොඩු, කිරිබදු, කිරි අඟුණ, වැල් තිබ්බටු, දිවි පහුරැ, වැල් මදට, හොඬල, හීං බෝවිටියා, විලඳ වැන්න, ගොනුකෑවැල, හීරැස්ස, බින් නුග, අස්වැන්න, වෙනිවැල්, කුඹුරුු , පුස්වැල්, ඔළිඳ, වැල් කහඹිලිය, බාඳුරා, ගොන් කැකිරි, එළ බිං තඹුරැ, තිරස්සවාලු, ආපසු මදු.
• ඖෂධීය පැළෑටි – ගොටුකොළ, ඉඟුරු, කහ, කෝමාරිකා, පිටවක්කා, මොනරකුඩුම්බිය, බිම්පොල්, අරූද, අක්මැල්ල, කප්පරවල්ලිය, ඉඟුරු පියලි, හින් මදුරැ තලා, බිං කොහොඹ, ඉරිවේරිය, කඩුපහර, කලාඳුරැ, එළ බටු, අක්කපාන, කී කිරිඳිය, කලු කම්මේරිය, ඒකාවේරිය, රත්නිටුල්, අසමෝදගම්, ගල් කරල් හැබ, හින් උඳුපියලිය.
• ඖෂධීට අල වර්ග – ඉඟුරු, කහ, හුලංකීරිය, සීනි අල, නිල් පුරුක්.

මේ ආකාරයට ඔබ දන්නා නොදන්නා ඖෂධීය ගුණයෙන් යුතු ඔසු පැල ඔබේ ගෙවත්තේ වගා කරන්න පුළුවන්. ඔබ නොදන්නා පැලෑටි වර්ග පිළිබඳව වැඩිහිටියන්ගෙන් අසා දැනගෙන පැල තවාන් වලින් ආදියෙන් ලබා ගෙන ඒවා බෝකරගන්න පුළුවන් . අපගේ ආහාර රටාවට මෙම ඔසු පැල වලින් ලබා ගන්නා කොළ , පොතු ,ගෙඩි ආදිය එක් කරගනිමින් පවුලේ සෞඛ්‍ය සම්පන්න සුවතාව පවත්වාගෙන යන්නත් පුළුවන්. ඒ වගේම නිවසේ වන අනතුරු ලෙඩ රෝග වලට අත්බෙහෙත් කිරීමට අවශ්‍ය ඔසු පැල නිවසෙන්ම ලබා ගැනීම සිදු කරන්නත් පුළුවන් .. ඒ සියල්ල තීරණය වන්නේ ඔබේ උත්සාහය මතයි.

සටහන

උදානි ජයසේන