පාඩම් අමතක දුවට පුතාට මේ පිළිවෙළ කියලා දෙන්න

කොච්චර පාඩම් කළත් විෂය කරුණු මතක නැති බව කියන දුවලා පුතාලාට මේ විදිහට පාඩම් කරන්න ඉගෙන ගත්තොත් තමන්ගේ අධ්‍යාපනය සාර්ථක විදිහට දිගටම අප්‍රසන්නතාවයක් නොමැතිව සිදු කර ගන්න පුලුවන්. එහෙම නම් මේ විදිහට පාඩම් කරන්න ඔබත් පටන් ගන්න.

සුදුසු පරිසරයක් තෝරා ගන්න

පාඩම් කිරීමට පෙරාතුව ඒ වෙනුවෙන් ගැලපෙන පරිසරයක් තෝරා ගන්න. මේ පරිසරය බොහොම නිරවුල් වීම වැදගත්. ඒ වගේම ඒ පරිසරය පාඩමට ගැලපිය යුත්තේ ඔබට නොව, දරුවාට බව මතක තබා ගන්න. ඔබ තෝරා ගත් පරිසරයම දරුවාට පාඩම් කිරීමට තෝරා ගැනීමට බල කරන්න එපා. ඒ නිදහස දරුවාට ලබා දෙන්න.

කාල සටහනක් සකස් කර ගන්න

පාඩම් කරනවා කියල පොත අතින් බිම නොතබා සිටීම එතරම් සාර්ථක ක්‍රමයක් නොවෙයි. අධ්‍යාපන පර්යේෂකයන් පෙන්වා දෙන අන්දමට පාඩම වෙනුවෙන් විරාමයක් අවශ්‍යයි. එකම දෙයක් වෙනුවෙන් දිගු කාලයක් අවධානය දක්වන්න අපහසු නිසා මේ වෙනුවෙන් හොඳම කාලය මිනිත්තු 30 සහ 40 අතර බව පර්යේෂකයන් විසින් පෙන්වා දෙනවා. ඒ කාලයේදී පාඩමෙන් මිදිල ගීතයක් ඇසීම, ඇවිදීම හෝ සිරුර උත්තේජනය වෙනුවෙන් උණුසුම් පානයක් ලබා ගැනීමෙන් පසුව නැවත පාඩමට යොමු වීමට පුලුවන්.

විෂය කරුණු මතක තබා ගන්න

මොන තරම් පාඩම් කළත් එයින් අපි ධාරණය කර ගන්නා කොටසක් තිබෙනවා. මානසික විද්‍යාඥයින් පෙන්වා දෙන අන්දමට මොළයේ තොරතුරු ගබඩා වෙන්නේ කාණ්ඩ විදිහටයි. මේ නිසා තොරතුරු මතක තබා ගැනීමේදී ඔබ ඒ වෙනුවෙන් වෙන් වෙන් විදිහට තොරතුරු ගොනු කර ගන්න.

මතක තබා ගැනීමේ උපක්‍රම තෝරා ගන්න

පාඩම් කිරීමේදී තොරතුරු මතක තබා ගැනීමට විශේෂ උපක්‍රම භාවිත කරන්න.
සුළු කිරීමේදී අනුගමනය කරන පිළිවෙල පහසුවෙන් මතක තබා ගැනීමට BODMAS යන පදය යොදා ගෙන ඇත. ඒ අනුව මුලින්ම වරහන්, දෙවනුව “ න් ” තෙවනුව බෙදිම, සිව්වෙනුව වැඩි කිරීම, ලෙසින් සරල ගණිත ක්‍රමයක් යොදා ගත හැකිය.
දිශා අට මතක තබා ගැනීමට අපි අදටත් යොදා ගන්නේ උපාලි ඊලග නැවෙන් ගිහින් දම්මි නිදිද බලා වරෙන් යන පදයයි. මෙයින් උතුර ,ඊසාන, නැගෙණහිර, ගිනිකොන, දකුණ, නිරිත, බටහිර, වයඹ ඉතා පහසුවෙන් හඳුනා ගත හැකියි.
ආවර්තිතා වගුව වෙනුවෙන්ද මේ අන්දමින් පද යොදා ගෙන ඇත. ඒවා අධයාපනයේදී හැඳින්වෙන්නේ ස්වෘති උපක්‍රම (mnemonic devices) ලෙසයි.

ඔබ දන්නා තොරතුරු අලුත් තොරතුරු සමග ගලපන්න

අද තොරතුරු ප්‍රසාරනය නිසා මොහොතික් මොහොත එක් වෙන අසීමිත තොරතුරු ගැන ඔබ හඳුනා ගෙන සිටීම ඉතා වැදගත්ය. යාවත්කාලීන වෙන තොරතුරු ගැන දැනුමක් නොමැත්තේ නම් ඔබේ හැකියාවන්ගෙන් ප්‍රයෝජන ගැනීම අපහසුය. මේ නිසා නිතරම අලුත් තොරතුරු ගැන උනන්දු වෙන්න.

උගත් දේ බෙදා ගන්න

අද බොහෝ දරුවන් උගත් දේ බෙදා හදා ගැනීමට වඩා බදා ගෙන සිටීමට උනන්දුවක් දක්වන්නේ අධ්‍යාපනයේ තිබෙන තරගය නිසාය. එහෙත් මේ තත්වය එතරම් ගැලපෙන්නක් නොවේ. තමා උගත් දෙය වෙනත් අය සමග සාකච්ඡා කිරීම හෝ තවත් කෙනෙකුට කියා දීම මගින් ඒ තැනැත්තාගේ ධාරනය තියුණු වේ. ඒත් අද දරුවන් අතර හාස්‍යට මෙන් කියන්නේ, ඇවිදින්න..වතුර බොන්න එපා පාඩම් කරපු දේ හෙලවෙයි…වැටෙයි… මේ අන්දමට හාස්‍ය ලෙසින් කිව්වත් ඇත්තටම දරුවන් අතර එසේ ආත්මාර්ථකාමී බවද නැතුවා නොවේ. මේ නිසා නිතරම දන්නා දේ බෙදා ගන්න. එවිට ඔබ නොදන්නා දේ ගැන කරුණු පහසුවෙන් ඔබට ගබා ගත හැකිය.

මානසික චිත්‍ර මවා ගන්න

භුගෝල විද්‍යාවේ සිතියම් වැනි අංශ ඉතා පහසුවෙන් ලකුණු රැස් කර ගත හැකි වුනත් බොහෝ දෙනෙක් අප්‍රිය කරන්නේද සිතියම් ලකුණු කිරීමයි. ඒත් ඔබ කලු මුහුද , කැස්පියන් මුහුද, රතු මුහුද එහි හැඩහුරුකම අනුව හඳුනා ගන්න. මනසින් මවන චිත්‍රය ඔබට ඉතා පහසුවෙන් සිතියමට ආදේශ කර ගත හැකිය.

පාඩම් කරන වේලාව ඔබ තෝරා ගන්න

අල්ලපුගෙදර සිටින දරුවා රාත්‍රි කාලයේ පාඩම් කරන නිසා ඔබේ දරුවාද අනිවාර්යෙන් රාත්‍රි නිදි මැරීම අවශ්‍ය නැත. දිවා කාලයේ පාඩම් කිරමට කාලය ඇත් නම් රාත්‍රියේ වෙහෙසීම අවශ්‍ය නැත. ඒ තීරණය දරුවාට බාර දෙන්න.

සටහන

පුන්‍යා චාන්දනී ද සිල්වා