අපි හැමෝම දන්නෙ ෂර්ලොක් හෝම්ස් කියන්නේ සාහිත්‍ය ලෝකයේ හමුවන ප්‍රසිද්ධම රහස් පරීක්ෂක චරිතයයි. ඔහුගේ විශේෂ නිරීක්ෂණ හැකියාව සහ තර්ක කිරීමේ කුසලතාවය මගින් අභිරහස් ගැටලු විසඳීම නිසා මනංකල්පිත චරිතයක් වුවත් සාහිත්‍ය ලෝකයේ ඔහු අතිශයින් ප්‍රසිද්ධියට පත් වූවා. ඔහු විශේෂයෙන්ම දක්‍ෂ වූයේ ඉතා කුඩා දත්ත නිරීක්ෂණය කරමින් පරීක්ෂණ සිදු කර නිවැරදි නිගමන ලබා ගැනීමටයි. එවැනි නිරීක්ෂණ මගින් එළැඹෙන නිගමන සැබවින්ම විද්‍යාත්මක ක්‍රමයකට අනුකූල බව කිව හැකියි. ෂර්ලොක් හෝම්ස් හරහා ඉදිරිපත් වූයේ අතිශය තාර්කික වගේම නිවැරදි කරුණු හඳුනා ගැනීමේ කුසලතාවත් නිවැරදිව විග්‍රහ කිරීමේත් ක්‍රමවේදයයි.
ෂර්ලොක් හෝම්ස් විසින් තම පර්යේෂණවලදී යොදාගත් මනා නිරීක්ෂණය, අවධානය, තාර්කික ක්‍රම වගේම විග්‍රහ කිරීමේ හැකියාව දරුවන්ට නිවැරදි මග පෙන්වීමේදී මව්පියන්ටත් බොහෝ සෙයින් වැදගත් වෙනවා. ඒවා දරුවන්ට නිසි මග පෙන්වීමේදී වැදගත් මාර්ගෝපදේශයක් වශයෙන් දෙමාපියන්ට භාවිත කළ හැකි ය.
- නිරීක්ෂණය හා අවධානය
ෂර්ලොක් හෝම්ස්ගේ පරීක්ෂණවල ප්‍රධාන අංගයක් වන්නේ නිරීක්ෂණයයි. මෙය මව්පියන්ට තම දරුවන් හැසිරවීමේදී බොහෝ සෙයින් වැදගත් වනු ඇත. ඔහු ඉතා කුඩා සිදුවීම් සැලකිල්ලට ගනිමින් අදාල කරුණ ඔස්සේ හඹා යයි. මව්පියන් ලෙස ඔබ ද දරුවන්ගේ ඉතා කුඩා සිදු වීම්වලට පවා අවධානයට ලක් කළ යුතුය. ඒ ඔස්සේ තම දරුවන්ගේ හැසිරීම් හෝ සෑම කුඩා ක්‍රියාකාරකමක්ම ඇසුරෙන් දරුවන් වටහා ගනිමින් ඔවුන්ට අවැසි නිසි මාර්ගෝපදේශ ලබා දීමට පහසුය.
හෝම්ස් තර්ක ක්‍රමය භාවිත කළ අතරම ඒ මඟින් සියලු පරීක්ෂණයන් ඉතා සූක්ෂම ලෙස විශ්ලේෂණය කර නිවැරදි නිගමනයකට පැමිණීමට හැකියාව ලැබේ. එම ක්‍රමය දරුවන්ගේ කටයුතු හෝ වැරදි හැසිරීම් හමුවේදීත් අවධානය යොමු කර අවශ්‍ය පරිදි නිවැරදි පියවර ගැනීමට උපකාරී වේ.
- විචාර කිරීම හා ප්‍රශ්න කිරීම
හෝම්ස්ගේ විචාර කිරීම හා ප්‍රශ්න කිරීම හැකියාවද දෙමාපියන්ට දරුවන් නිසි මග යොමු කිරීමට අවශය වේ. එමගින් මව්පියන්ට තම දරුවන්ට නිවැරදි මග පෙන්වමින් අතවැල සැපයීමට ප්‍රයෝජනවත් වනු ඇත. තම දරුවන්ට උදාහරණ මඟින් දැනුවත් කර, ඔවුන්ගේ කටයුතු මෙන්ම හැසිරීම් සැලැස්වීමට අවස්ථාව උදා වේ.
ඔබ, නිරීක්ෂණය කිරීමේ කුසලතාවය වර්ධනය කරන්න
නිරීක්ෂණය කිරීමේ කුසලතාවය වර්ධනය කිරීම සඳහා පහත දැක්වෙන කරුණු ඉතා වැදගත් වනු ඇත.
- සූක්ෂමව බව
වැඩිහිටි ඔබ අවම මැදිහත් වීමක් සමග දරුවන්ගේ වටපිටාව සූක්ෂමව නිරීක්ෂණය කරන්න. වටපිටාව නිරීක්ෂණය කිරීමේදී දරුවන් සම්බන්ධ විවිධ තොරතුරු, හැසිරීමේ රටාව, දරුවන්ගේ ක්‍රියාකාරකම්, මත වාදයන් සහ පසුබැසීම් ආදිය පිළිබඳව අවබෝධයක් ලබා ගත හැක. එමගින් ඔවුන් සම්බන්ධ බොහෝ දේ වටහා ගත හැකි වනු ඇත.
ඔබ නිරීක්ෂණය කරන දේවල් වාර්තා කිරීමෙන් ඒවා මත පදනම්ව විශ්ලේෂණය කිරීමේ හැකියාව වර්ධනය වනු ඇත. ඔබ නිරීක්ෂණය කරන දේ වාර්තා කිරීම යනුවෙන් අදහස් වන්නේ පොත්පත් මත සටහන් කිරීමම නොව, ඔබේ මනසේ එය නිවැරදිය පෙළ ගස්වා ගැනීමයි. ඔබ යමක් නිරීක්ෂණය කිරීමේදී කාරණා පිළිබඳ ප්‍රශ්න සහිතව සිතන්න. කුමක් ද? කොහොමද? කවදාද? මෙමගින් ඔබේ සිතීමේ හැකියාව වර්ධනය වන අතරම තත්ත්වය අවබෝධ කරගැනීමට අවස්ථාව උදා කරයි.
- අනෙක් අය සමග සාකච්ඡා කිරීම හා සංවාද කර ගැනීම
ඔබේ නිරීක්ෂණය පිළිබඳව තවත් අය සමඟ සංවාද කිරීමෙන් ඒ ගැන අලුත් අවබෝධයක් ලබා ගැනීමට හැකිවේ.
- පරීක්ෂා කිරීම
ඔබ විසින් සොයාගත් කරුණු පරීක්ෂා කරන්න. එය දරුවාගේ භෞතික සහ මානසික පරිසරය සමග ගලපා විශ්ලේෂණය කරන්න. මෙම ක්‍රම පිළිබඳව වැඩිපුර පුහුණුව ලබා ගැනීමෙන්, ඔබේ නිරීක්ෂණ සහ විශ්ලේෂණ කුසලතා වර්ධනය වේ.
ෂර්ලොක් හෝම්ස් කිසිවක් පහසුවෙන් විශ්වාස නොකරන අතරම ඔහු එය පරික්ෂා කරයි. නිරීක්ෂණය කරයි. පසුව නිගමනයට එළඹෙයි. දෙමව්පියන් ද මෙවැනි ක්‍රමයක් පිළිපැදිය යුතුය.
උදාහරණයක් ලෙස, ඔබේ දරුවා හදිසියේම පාඩම් නොකර බොහෝ කාලයක් ජංගම දුරකථනය භාවිත කරන බව ඔබ දුටු විට ඔහුට බැනීම හෝ දඬුවම් කිරීමට පෙර ඔහු එය ඇත්තටම කරන්නේ කුමක් නිසාදැයි නිරීක්ෂණය කරන්න. ඔහුට අලුත් මිතුරන් හමුවීද? ඔහු/ඇය කිසියම් කරදරයකට මුහුණ පා ඇතිද? යන මේ හැමදේම නිවැරදිව ගවේෂණය කිරීමෙන් අනතුරුව දරුවාට උපදෙස් ලබාදීම පහසුවෙන් කළ හැකි වනු ඇත.
ෂර්ලොක් හෝම්ස්ට ඉතාම කුඩා දෙයක් වුවද ඉතාම වැදගත් වනු ඇත. අප සෑම දිනකම අපේ දරුවන් ගැන නිරීක්ෂණය කරනවාද? ඔවුන්ගේ හැසිරීම් වෙනස් වී ඇති ද? ඔවුන් අපගේ අවධානය බලාපොරොත්තු වෙනවාද?
දරුවන්ගේ හැසිරීමේ කුඩා වෙනස්කම් නොසලකා හැරීම දෙමාපියන්ගෙන් සිදුවන විශාල වැරැද්දකි. දරුවෙකුගේ සාමාන්‍ය කතා බහ පෙර දිනවලට වඩා අඩු වීම, ආහාර ප්‍රතික්ෂේප කිරීම වැනි දේ දරුවාට යම් ගැටලුවක් ඇති බව කියාපාන වැදගත් සාධකයක් බව කිව යුතුය.
ෂර්ලොක් හෝම්ස්, පසුගිය සිදුවීම් මත පදනම්ව වත්මන් සිදුවීම් වටහා ගනී. දරුවන් පිළිබඳවත් මෙය අදාළ වේ. ඔබේ දරුවා පෙරදී ජීවිතය ඉතාම උද්යෝගයෙන් ගත කළේද? දැන් ඔහු එවැනි උද්යෝගයකින් කටයුතු නොකරන්නේ ද? එසේ නම්, ඔහුගේ පාසල් ගුරුවරුන් හෝ මිතුරන් සමඟ ගැටළුවක් ඇතිවීද යන්න සොයා බලන්න. මෙයට ගැළපෙන උදාහරණයක් වන්නේ, දරුවා සමඟ සාකච්ඡා කරමින්, ඔහුගේ දෛනික ක්‍රියාවලිය නිරීක්ෂණය කරමින් නිවැරදි නිගමනට එළඹීමයි.
ෂර්ලොක් හෝම්ස් බොහෝ විට නිරීක්ෂණ කටයුතුවල යෙදුණේ අපරාධ සම්බන්ධවයි. එහෙත් දෙමව්පියන්, දරුවන්ට කරුණාවන්තව ඔවුන්ව නිරීක්ෂණය කළ යුතුය. දරුවෙකුට යම් යම් අවස්ථාවලදී යම් අයුරකින් හැසිරීමට හේතුවක් තිබිය හැක. ඇතැම් විට කේන්තියෙන් හෝ එසේත් නැතිනම් ආවේගශීලීව හෝ නැතිනම් දුකෙන් හෝ දරුවා සිටිය හැකියි. ඔහුගේ හැසිරීමේ එවැනි වෙනසක් ඇති වූ විට දරුවාට බැන වැදීමෙන් තොරව එසේ හැසිරීමට හේතුව සොයා බලා එය නිවැරදිව තේරුම් ගත යුතුය.
ෂර්ලොක් හෝම්ස් නිරීක්ෂණය කිරීමෙන් පමණක් සීමා නොවෙයි. ඔහු කතා බහ කරයි. ප්‍රශ්න අසයි. දෙමව්පියන් ලෙස ඔබටත් මෙම හැකියාවන් වැඩි දියුණු කළ හැකිය. ඔබේ දරුවන්ට මිතුරන් නැති ද? ඔවුන්ට විශ්වාස කළ හැකි යහපත් ආදර්ශයක් හිමි වන්නේ නැද්ද? ඔවුන්ට සිදුවන්නේ කුමක්දැයි ඔවුන් සමඟ සන්සුන්ව කතා බහ කරන්න.
මව්පියන් ලෙස ඔබ සැමවිටම දරුවන්ගේ ලෝකය පිළිබඳව තේරුම් ගැනීමට උත්සාහ කරන්න. ඔවුන්ගේ මුහුණේ ඇති මනෝභාවය, ඔවුන්ගේ කතාවල ගලා යන්නේ සන්සුන් හෝ බිය හෝ කේන්තිය ද යන වග වැනි ඉතා කුඩා හැසිරීම් රටා පවා අඳුනා ගැනීම දරුවාට සිදුවන්නේ මොනවාද යන්න අනාවරණය කිරීමට උපකාරී වේ.
ෂර්ලොක් හෝම්ස්ගේ නිරීක්ෂණ හැකියාවන් අපේ දෛනික ජීවිතයටද ගැලපේ. විශේෂයෙන්ම දෙමව්පියන් ලෙස, දරුවන්ගේ හැසිරීම් ප්‍රවණතා සහ මනෝභාවයන් නිරීක්ෂණය කිරීම ඔවුන්ගේ ජීවිතය සාමකාමී සහ ආරක්ෂිත කර ගැනීමට උදව් වේ. ඔබේ දරුවා පමණක් නොව බොහෝ විට දරුවාගේ අවට පරිසරයද නිරීක්ෂණය කරන්න. දරුවාගේ මිතුරන්, ආහාරපාන, නවතම රුචි අරුචිකම් මනාව හඳුනා ගැනීමෙන් දරුවන් තුළ දෙමාපියන් කෙරේ විශ්වාසය සහ අවබෝධය ගොඩනඟා ගත හැකි වේ. ඔබේ දරුවා නිවැරදිව නිරීක්ෂණය කිරීමෙන් ඔබට, ඔබේ දරුවන් සඳහා දයාබාර මව්පියන් මෙන්ම සැබෑ මිතුරෙකු, ගුරුවරයෙක් වීමට හැකියාව ලැබේ.
Leave feedback about this