වයසට කලින් වයස පෙනුමක් ඇවිත්… අකලට හිස කෙස් පැසීම ඔබට ගැටලුවක්ද?

පංච කළ්‍යාණියන්ගේ එකක් වන කේෂ කළ්‍යානය කාන්තාවකගේ රූ සපුවට ගෙන එන්නේ විශාල සුන්දරත්වයක්. ඇත්තටම කිව්වොත් හිස කෙස් කියන්නේ අපේ රුවට ආභරණයක්. විවිධ රට වල විවිධ දේශගුණික තත්ත්වයන් අනුව හිස කෙස් වල වර්ණය වෙනස් වන අතර අපේ රටේ සැමටම ලැබී ඇත්තේ කළු පැහැ හිසකේ ය.
හිසකේ වල අජීවී කොටස වන එනම් දිගට වැඩුණ කොටස හිස කෙස් ලෙස අපි හඳුන්වන කොටසයි. කේශ කුහරය තුළ බල්බය එසේත් නැතිනම් කෙස් ගසේ සජීවී කොටස පිහිටා ඇත. හිසකේ නිෂ්පාදනය වන්නේ එමගිනි. සෛල වේගවත්ව විභේදනය වෙමින් හිසකේ වර්ධනය වේ. මෙසේ වර්ධනය වන හිසකේ වර්ණක සෛල මගින් නිපදවන මෙලනින් අවශෝෂණය කරගනී. එම වර්ණක සෛල මගින් මෙලනින් නිපද වීම නතර වූ විට හිස කෙස් සුදු පැහැ වීමට පටන් ගනී.

අතීතයේ වයසට යාම තහවුරු වූයේ මෙසේ කළු හිසකේ සුදු පැහැ වීමත් සමග වුවද අද වන විට කුඩා දරුවන්ගේ පවා හිසකෙස් සුදු පැහැ වී තිබෙන අයුරු දැක ගත හැකියි. එයට මනසට පීඩාවක් ගෙන දෙන කරුණක් වන නිසාම අකලට හිසකේ සුදු පැහැ වීමට හේතුවත් එය වළක්වා ගැනීමත් ප්‍රතිකාර පිළිබඳවත් අපි සාකච්ඡා කරමු.

හිසකෙස් අකලට පැසීමට හේතු

• ජානමය හේතූන්
• පීනස, රක්තවාත රෝග
• හෝමෝනවල අසමබරතාවය (ඔසප් චක්‍රය අක්‍රමවත් බව හා අධික රුධිර වහනය)
• අසාත්මිකතාවයන්
• රාත්‍රී කාලයේ දී ස්නානය/අධික සීතල පරිසර තත්ත්වයන්ට දිගින් දිගටම නිරාවරණය වීම
• මෙලනීන් අඩුවීම
• මානසික ආතතිය
• නිසි පෝෂණය සහිත සමබල ආහාර වේලක් නොගැනීම
• අධික මත්පැන් භාවිතය හා දුම් පානය
• හිස කෙස් වලට හොඳින් සාත්තු නොකිරීම
• කෘතීම නිෂ්පාදන භාවිතය (ඇතැම් තෙල්, ජෙල්, හෙයා ක්‍රීම්, ඩයි වර්ග, ෂැම්පු වර්ග)

අකලට හිසකේ සුදු පැහැ වීමට ප්‍රතිකාර

• පංචකර්ම ප්‍රතිකාර
• ශීරෝධාර ප්‍රතිකර්මය
• තෙල් වර්ග යොදා හිස සම්භාහනය
• ත්‍රිපලාදී තෙල්, කේශ රංජනී, අම්ලක්‍රී තෙල, භෘංගමාලක, නීල්‍යාදී තෙල්, චන්දනාදී හා පිරිසුදු පොල් තෙල් භාවිතය යෝග්‍යවේ.
• නීලි තෛලය – නිල් ඇවරිය, කීකිරිඳිය කොළ ප්‍රධානව යොදා සැකසූ මෙම තෙල දිනපතා මාසයක් හිසෙහි ආලේප කරන්න.
• කටුකරඬු, වැටකෙයියා අරළු, අංකෙන්ද කොළ පවනේ වේලා කොටා කුඩු සාදා අරළු, බුළු, නෙල්ලි කශාය සිඳ ඒ දෙවර්ගය මිශ්‍ර කර තල තෙල් ස්වල්පයක් දමා හොඳින් රත් කර මසක පමණ කාලයක් පොළොවේ වළලා තබා අකලට ඉදුණු හිස කෙස්වල සහ හිස් කබලේ ගැල්වන්න.
• විශ්ණුක්‍රාන්ති මල් එඬරු තෙල් සමඟ මිශ්‍ර කර සිඳ හිස ගල්වන්න
• නෙල්ලි ඉස්ම, මුකුණුවැන්න ඉස්ම, කීකිරිඳිය, කෝමාරිකා ඉස්ම ආදිය යොදා හිස සම්භාහනය කරන්න.

අකලට හිස කෙස් සුදුවීම පාලනයට ආයුර්වේද පාන වර්ග

• නෙල්ලි තැම්බූ වතුර
• කොළ කැඳ වර්ග
• අමුක්කරා අල, තල සමඟ ගොටුකොළ තැම්බූ කෂාය
• අභයාරිෂ්ඨය (උදේ සහ සවස මේස හැඳි 2 බැගින්)

නිසි ආයුර්වේද වෛද්‍ය උපදෙස් මත හිසකේ අකලට සුදු පැහැ වීම වළක්වා ගත හැකි බව දැන් ඔබට පැහැදිලි වනු ඇත. අවශ්‍ය වන්නේ නිසි ප්‍රතිකාර නිසි අයුරින් නිසි කලට සිදු කිරීම සහ අකලට හිස කේස සුදු පැහැ වීමට බලපෑ හැකි හේතු කාරනාවලින් ඈත් වීම බව මතකයේ රඳවා ගන්න.

දැනුවත් කළේ
ආයුර්වේද වෛද්‍ය W.M.S.M ශිරෝමි විජේසිංහ මහත්මිය
ආයුර්වේද මහ රෝහල
දියතලාව

සටහන

දිශාන්ති වෙදගේ