දරුවාගේ දත් ගැන වැඩි වගකීම කාටද?

දරුදරුවන් පිළිබඳව මව්පියන්ට ඇති ගැටලු ගත් කළ දත් සම්බන්ධව ඇති වන ගැටලු ගැනද අවධානය යොමු නොකරම බැහැ. දරුවන්ගේ දත් මෝදුවීම ආරම්භ වන්නේ ඔවුන්ට මාස පහක් සහ හයක් අතර කාලවදී වුනත් සෑම දරුවෙකුටම මෙම කාලසීමාවේදීම දත් මෝදු වීම සිදු වන්නේ නැහැ. ඇතැම් දරුවන්ගේ දත් මෝදු වීමට අවුරුද්දක් වුවද ගත වන අවස්ථා හමු වී ඇත. බොහෝ විට දරුවෙකුගේ මුල් කිරි දත මොදු වෙන්නේ යටිහණුවේ ය.

දත් මගින් පුද්ගලයෙකුගේ මුහුණට ලැබෙන්නේ ප්‍රියජනක පෙනුමක්. එයට අමතරව දත් මගින් ආහාර සපා ගැනීම, වචන උච්චාරණ, මුහුණේ හැඩය පවත්වා ගැනීම වැනි තවත් වාසි කීපයක් ඇත.

දත් මෝදු වෙන විට දරුවෙකුට පෙන්නුම් කළ හැකි ලක්ෂණ

• හැඬීම
• ආහාර ප්‍රතික්ෂේප කිරීම‍
• නිතර නිතර මල මුත්‍ර පිටවීම/ අජීර්ණය
• උණ

මේ අන්දමින් ආරම්භ වෙන දත් දෙපල සම්පූර්ණ වෙන විට දරුවාට වයස අවුරුදු තුනක් පමණ වේ. බොහෝ දෙමව්පියන් දරුවන්ගේ කිරි දත් පිලිබඳව එතරම් උනන්දුවක් නොදක්වන්නේ මෙම දත් වැටීමෙන් පසුව ස්ථිිර දත් මෝදු වෙන නිසා වුනත් ඇත්ත වශයෙන්ම ස්ථිිර දත්වලට පාර කියන්නේ කිරිදත් බව බොහෝ අය තුළ දැණුවත් බවක් නොමැත. ශ්‍රි ලංකාවේ වයස අවුරුදු හයට අඩු දරුවන් අතර දත් දිරා යෑම සුලබව දක්නට ලැබෙන්නේ අන්න ඒ නිසාම විය හැකියි.

දරුවාගේ දන්ත සෞඛ්‍යය වෙනුවෙන් අවධානය යොමු කළ යුත්තේ දරුවාගේ පළමු දත මෝදු වුන දිනයේ පටන්ම බව අමතක නොකළ යුතුය. එබැවින් මේ කාලයේ පටන්ම දත් බුරුසුවක් යොදා ගෙන දත් මැදීම ඉතා වැදගත් වේ. එමෙන්ම දරුවන්ට රාත්‍රි කාලයේදී ලබා දෙන කිරි වේල නිසා ඔවුන්ගේ මුඛයේ බැක්ටීරියා වර්ධනය වීම දත් දිරා යෑමට බලපාන හේතුවක් සේ සැලකේ. මේ නිසා සීනි සහිත ආහාර සහ කාබොහයිඩ්ට්‍රේට අඩංගු ආහාර හැකි තරම් සීමා කිරීමද වැදගත් වේ.

දරුවන්ට බොහෝ අවස්ථාවන්හි රාත්‍රි නින්දෙන් කිරි පෙවීමත් නිසා කිරිදත් පවා දිරා යන තත්වයට නොදැනීම පත් වෙනු ඇත. බොහෝ මව්පියන් ගේ අදහස වී ඇත්තේ දන්ත සෞඛ්‍යය පිලිබඳව මව්පියන් උනන්දු විය යුත්තේ කිරිදත් වෙනුවෙන් නොව ස්ථිර දත් වෙනුවෙන් බවයි. එහෙත් දරුවාගේ පළමු කිරිදත මෝදු වුන තැන පටන් දන්ත සෞඛ්‍යය පිලිබඳව යොමු වීම ඉතාම වැදගත් වේ.

මේ නිසා දරුවන්ගේ සීනි සහිත ආහාර මෙන්ම කාබොහයිඩ්ට්‍රේට අඩංගු ආහාර හැකි තරම් සීමා කිරීම ඉතා වැදගත් වේ. දත් මොදු වීමෙන් පසුව රාත්‍රි කාලයේදී ලබා දෙන මව්කිරි පවා දත් දිරා යෑමට හේතු වේ. නින්දෙන් කිරි බෝතලය කටේ තබා ගෙන නිදාගන්නා දරුවන් අප බොහෝ විට දැක ඇත. මේ තත්වයද දත් දිරා යෑමට හේතු වේ.

ප්‍රධාන ආහාර වේලකින් පසුව මෙන්ම පැනිරස ආහාර ගැනීමෙන් පසුව කට සෝදා හැරීමට දරුවා හුරු කරන්න. අද බොහෝ දෙමව්පියන් සමග දරුවන්ට තිබෙන ප්‍රධාන අරගලයක් බවට රාත්‍රි නින්දට පෙරාතුව දත් මැදීම පත්ව ඇත. යුද්ධයකින් වුව දෙමව්පියන් වශයෙන් ඔබ මෙම කටයුත්ත ජයගත යුතුව ඇත. ඊට හේතුව වන්නේ රාත්‍රි කාලයේ දත් නොමැද නින්දට යෑම බැක්ටීරියා වර්ධනයට අවශ්‍ය හිතකරම පරිසරය එහිදී ගොඩ නැගෙන නිසාය. එහෙත් අපි දරුවන් වැසිකිලියට හුරු කරනවා වගේම දත් මැදීමත් සාමාන්‍ය කටයුත්තක් බවට පත්කිරීමෙන් ඔබට මෙම අපහසුතාවය මග හරවා ගත හැකි වේ.

පාසල් වයස්වලදී දරුවන්ගේ කාර්යබහුල ජීවිතය සමග දන්ත සෞඛ්‍ය පිලිබඳව අවධානය මව්පියන්ගෙන්ද ගිලිහී යන නිසා දරුවන් අතර දන්තාබාධ බහුලව දක්නට ලැබේ. එහෙත් දෙමව්පියන් වශයන් ඔබ දරුවාගේ දත් දෙපෙල ආරක්ෂා කිරීමට අවශ්‍ය සහයෝගය ලබා නුදුනහොත් අනාගතයේදී ඔවුන්ට ලස්සන දත් දෙපෙලකින් සිනාසීමට ඇති අයිතිය අහිමි වෙනු ඇත.

මේ නිසා,

• නිතරම දරුවාගේ දන්ත සෞඛ්‍ය ගැන උනන්දු වෙන්න
• මාස හයකට වරක් දන්ත චිකිත්සාගාරයකින් දත් පරීක්ෂා කරන්න
• දන්ත සෞඛ්‍ය රැකෙන පෝෂණීය ආහාර ලබා දෙන්න
• තමන්ගේ දත් දෙපෙල ලස්සනට තබා ගැනීමේ වැදගත්කම දරුවාටත් කියා දෙන්න.

මේ අන්දමට දත් ආරක්ෂා කිරීම යනු තනි අතින් අත්පොලොසන් දීම අපහසුය යන සිද්ධාන්තයට සමාන වේ. එබැවින් දරුවන්ගේ දත් රැක ගැනීමේ කටයුත්ත වෙනුවෙන් මව්පියන් සහ දරුවන් අතර ඉතාම මිත්‍රශීලි සම්බන්ධතාවයක් ගොඩ නගා ගැනීම අත්‍යවශ්‍ය වේ.

සටහන

පුන්‍යා චාන්දනී ද සිල්වා