සතුටු පවුලක් ගොඩ නගමු ද?

අද දරුවන් සම්බන්ධයෙන් කථා කරන විට ඔවුන් පවුල තුළම හුදෙකලා චරිත බවට පත්ව තිබෙනවා. ඒ බොහෝවිට මව සහ පියා දෙනොම රැකියාවක නිරත වීම, පවුලේ දරුවන් සංඛ්‍යාව අඩු වීම, අසල්වැසි දරුවන් සමග සම්බන්ධතාවයන් පැවත්වීමටත් කාලයක් නොමැති වීම යන කරුණු නිසාය. මේ හුදෙකලා බව පිරිමසා ගැනීමට ඔවුන් විද්‍යුත් මෙවලම් සමග සම්බන්ධතාවය ගොඩ නගා ගන්නා අතර කාලයත් සමග දරුවන් මෙවැනි මෙවලම් වෙනුවෙන් ඇබ්බැහි වීමට තරම් තත්වය දරුණු වෙනවා. එවැනි තත්වයකදී දරුවන් ඇබ්බැහි වීමෙන් මුදවා ගැනීම එතරම් පහසු නැහැ. ඒ වුනත් මෙවැනි තත්වයකට යා නොදී දරුවන්ගේ මනස සුවපත් කරන්නේ කෙසේද යන්න ගැන මව්පියන් දැනුවත්ව සිටීම ඉතාම වැදගත් වනු ඇත.

දරුවන්ගේ සතුට මුළු පවුලේම සතුටයි. අන්න ඒ නිසාම සතුටු පවුලක් වෙනුවෙන් දරුවාගේ ජීවිතය සැලසුම් කිරීමට ඔහුව උනන්දු කරවීම මව්පියන්ගේ වගකීමකි. ඒ වෙනුවෙන් ඔබ පහත කරුණු සම්බන්ධව දරුවා හුරු කිරීම ඉතාම වැදගත් වනු ඇත.

• දවස කළමනාකරණය කරන්න

දවසට පැය විසිහතරක් තිබුනත් ඒ කාලය මැනවින් කළමනාකරනය කර ගැනීම ඉතාම වැදගත්. පමණට වඩා කාර්ය බහුල වීම වගේම පමණට වඩා විවේකයත් මනසට බරක්. ඒ නිසා මව්පියන් විදිහට ඔබ දරුවාට දවසේ කාලය කළමනාකරණය කර ගැනීමට උදව් වෙන්න. ඒ වෙනුවෙන් ඔබේ දායකත්වය ලබා දෙන්න.

• දරුවාගේ අධ්‍යාපන කටයුතු සැලසුම් කරන්න

කුඩා කාලයේ සිටම දරුවා තමන්ගේ අධ්‍යාපන කටයුතු වෙනුවෙන් කාලය යෙදවීම සහ කැපවීම ඉතාම වැදගත්. අද දවස නිකරුනේ ගෙවුනොත් දරුවාගේ හෙට දවස සාර්ථක කර ගැනීම තරමක් අපහසු විමට පුළුවන්. ඒ නිසා දරුවාගේ අධයාපන කටයුතු සාර්ථක ලෙසින් කර ගැනීමට ඔබගේ උදව් ලබා දීම ඉතාම වැදගත්.

• දරුවන්ගේ ආවේගයන් හමුවේ ඔබ වඩාත් කල්පනාකාරී වෙන්න

දරුවන් අතර විවිධ හැසිරීම් රටාවන් තිබෙනවා. සමහර දරුවන් කේන්ති ගැනීමේදී තමන්ගේ සිරුරට පවා හානි කර ගන්නවා. මෙවැනි චරිත ලක්ෂණ ඇති දරුවන් ඉදිරියේ ඔබේ ප්‍රතිචාර බුද්ධිමත් වීම ඉතා වැදගත්. ආවේග සමග ජීවත්වීම තුළ දරුවාගේ පැවැත්මට පවා හානිදායක විය හැකි බැවින් කුඩා කාලයේ පටන්ම ඔවුන්ට ආවේග පාලනය කර ගනිමින් ජීවත් වීමේ මාර්ගය කාරුණිකව කියා දෙන්න.

• ඔබේ දරුවාට ස්වාධීන පුද්ගලයෙකු වීමට සහය වෙන්න

ඔබ දරුවාට ආදරය බව ඇත්ත. ඒ නිසාම දරුවාගේ සියලු කටයුතු ඔබ විසින් කරනවා නම් එය දරුවාට කරන අනර්ථයක් බව අමතක කරන්න එපා. දරුවන් හෙට දවසේ සමාජයේ තමන්ගේ භුමිකාවක් තුළ ජීවත් වෙන චරිත බවට පත් වෙනු ඇත. ඒ නිසා බාල කාලයේ පටන්ම තමන්ගේ කටයුතු ස්වාධීනව කර ගත හැකි පෞරෂයක් ගොඩ නැගීම ඉතාම වැදගත් බව මතක තබා ගනිමින් තම ජීවිතය ස්වාධීන කරගැනීමට දරුවාට සහය වෙන්න.

• දරුවාට වටිනාකමක් ලබා දෙන්න

ඔබේ දරුවා තුළ සැගවුන හැකියාවන් බොහෝ සේ ඇත. ඒවා සමහර විට ඔබ ද නොදන්නවා විය හැක. එහෙත් මෙම හැකියාවන් ඔබ පමණක් නොව දරුවා ද හඳුනා ගැනීම ඉතාම වැදගත්. ඒ නිසා නිතරම දරුවා සමග කථා කරන්න. ඔවුන්ගේ හැකියාවන් හඳුනා ගන්න. ඒවා සමග ඉදිරියට යෑමට කටයුතු කරන්න. ඔබේ දරුවාට කැලයේ පිපුන මලක් මෙන් කැලයේම පරවී යන්නට ඉඩ දිය යුතු නැත. නමුත් මේ කැලෑ මල තනියෙන් පිබිදෙන දිනයකට ඔබගේ ශක්තිය ඔවුන්ට ලබා දෙන්න. ඔබෙන් අත්වැලක් නොලද විට මේ හැකියාවන් උපන් ගෙයිම පර වෙන්නටත් ඉඩ තිබෙන බව අමතක කරන්න එපා.

• සමාජයේ අහන දකින අහිතකර දේවලින් දරුවා බේරාගන්න

අද සමාජය අපි ජීවත් වූ යුගයට වඩා බෙහෙවින්ම අවදානම් සහිතය. එදා සරල සමාජය තුළ නොතිබුන බොහෝ විෂමාචාර කටයුතු අද සමාජයේ රැල්ලක් බවට පත්ව ඇත. සමහර විට ඔබේ දරුවාද මේ රැල්ලට ගොදුරු වීමට ඉඩ තිබෙනවා. ඒ නිසා මත්ද්‍රව්‍ය, මත්වතුර පමණක් නොව වෙනත් විෂමාචාර කටයුතු සහිත සමාජයක් තිබෙන බැව් දරුවාට කියා දෙන්න. අද මව්පියන්, බොහෝ දරුවන් මත්ද්‍රව්‍ය භාවිත කරන බව පවා දැන ගන්නේ එය වලක්වා ගත නොහැකි තැනට පත් වූ විටය. ඔබ දරුවා ගැන අවබෝධයෙන් සිටිනවා නම් මෙවැනි උවදුරු කල් තබා හඳුනා ගෙන දරුවා එයින් මුදවා ගැනීමේ හැකියාව ලබා ගනු ඇත.

• දරුවාගේ හැසිරීම ගැන අවධානය දෙන්න

දරුවන්ටත් විවිධ මානසික ගැටුම් ඇති වෙනවා. ඒ නිසා දරුවාගේ හැසිරීම් ගැනත් උනන්දු වීම වැදගත්. වෙනදා මෙන් සතුටින් නොසිටනවා නම් හෝ හුදෙකලාව ප්‍රියකරනවා නම් නොරිස්සුම් සහිත බවක් පෙනෙනවා නම් දරුවා සමග කථා කරන්න. ඔහුගේ ප්‍රශ්නවලට ඇහුම් කන් දෙන්න. මෙවැනි තත්වයන් මුලින් හඳුනා නොගත හොත් පසුකාලීන මානසික රෝග තත්වයක ගොදුරක් විය හැකි තරමටම ගැටළුව උග්‍ර විය හැක.

• සතුටු පවුලක් ගොඩනගන්න

පවුලක් තුළ සතුට ඉතා වැදගත්. ගැටුම් යනු පවුලක අපි විසින් නොපතන, නොදකින දෙයක් විය යුතුය. හැම දෙනාම එක්ව කථා කරන එක්ව සිනා සෙන එක්ව කන බොන රටාවක් ඇත්නම් එය සැබැවින්ම සතුටු පවුලකි. මේ සතුටු පවුල නිර්මානය කර ගැනීමට නම් මව්පියන් වන ඔබගේ වගකීම සිතට ගැනීම ඉතාම වැදගත් බව සිහිතබාගන්න.

සටහන

පුන්‍යා චාන්දනී ද සිල්වා