ඔබේ නිවස තුළට ජීවය එක්කරන විසිතුරු පැලෑටි මොනවාද?

නූතන නිවාස සැලසුම්කරණයේදී විසිතුරු අභ්‍යන්තර ශාක (Ornamental Indoor Plants) අතිශය ජනප්‍රිය අංගයක් බවට පත්ව ඇත. මේවා හුදෙක් කාමරයක් අලංකාර කිරීමට වඩා වැඩි යමක් ඉටු කරයි. ඒවා ඔබේ ජීවන අවකාශයට ස්වාභාවික සුවයක්, මානසික සන්සුන් බවක් සහ වාතයේ ගුණාත්මක බව එක් කරයි. කාර්යබහුල ජීවන රටාවකට හුරුවී සිටින ශ්‍රී ලාංකිකයන්ට පවා පහසුවෙන් නඩත්තු කළ හැකි, නිවසට සුදුසු විසිතුරු පැලෑටි වර්ග සහ ඒවා තෝරාගැනීමේදී සැලකිලිමත් විය යුතු කරුණු පිළිබඳව අපි සවිස්තරාත්මකව සාකච්ඡා කරමු.

ගෘහස්ථ පැලෑටිවල ඇති විශේෂ ප්‍රතිලාභ

විසිතුරු පැලෑටි නිවස තුළ තැබීමෙන් ලැබෙන ප්‍රධාන වාසි කිහිපයකි. නාසා ආයතනයේ පර්යේෂණවලින් තහවුරු වී ඇත්තේ ඇතැම් ශාක කාමර වාතයේ ඇති විෂ වායු උරාගෙන, පිරිසිදු ඔක්සිජන් නිකුත් කරන බවයි. නිවසේ තීන්ත, පිරිසිදුකාරක හෝ ගෘහ භාණ්ඩවලින් පිටවන රසායනික ද්‍රව්‍ය ඉවත් කිරීමට මේවා උපකාරී වේ.

ගහකොළ දෙස බලා සිටීම ආතතිය අඩු කරන බවත්, මානසික ඒකාග්‍රතාවය සහ අවධානය වැඩි කරන බවත් විද්‍යාත්මකව ඔප්පු වී ඇත. හරිත වර්ණය දෙනෙතට සහ මනසට සන්සුන් බවක් ගෙන දෙයි. තවද ශාක පත්‍ර මගින් ජලය වාෂ්ප වීම නිසා නිවස තුළ ස්වාභාවික ආර්ද්‍රතාවයක් පවත්වා ගනී. විශේෂයෙන් වායුසමීකරණය කළ කාමරවල වියළි බව අඩු කිරීමට මෙය උපකාරී වේ.

නිවසේ ආලෝක තත්ත්වය අනුව ශාක තෝරාගැනීම

ඔබේ නිවසේ කොපමණ ආලෝකයක් ලැබේද යන්න අනුව ශාක තෝරාගැනීම අත්‍යවශ්‍ය වේ.

අඩු ආලෝකයට ඔරොත්තු දෙන ශාක ශ්‍රී ලංකාවේ බොහෝ මහල් නිවාසවලට හෝ ගෙවල්වල අඳුරු කොන් සඳහා ඉතා සුදුසුය.සනේක් ප්ලාන්ට් වැනි ශාක නඩත්තු කිරීමට පහසුම ශාකයක් වන අතර, රාත්‍රී කාලයේදී පවා ඔක්සිජන් නිකුත් කරයි. මාසයකට වරක් පමණක් ජලය දැමීම වුවද ප්‍රමාණවත්ය. තවද සී සී ප්ලාන්ට් ඉතාම අඩු ආලෝකයට සහ අඩු ජල ප්‍රමාණයකට ඔරොත්තු දෙන අතර දිලිසෙන කොළ කාමරයට නවීන පෙනුමක් එක් කරයි. ෆිලෝඩෙන්ඩ්‍රන් මෙය එල්ලෙන ස්වභාවයක් ගන්නා ශාකයකි. කාමරයේ කොන් වල උස රාක්ක මත තැබීමට සුදුසු අතර, සෘජු හිරු එළිය අවශ්‍ය නොවේ.

මධ්‍යස්ථ ආලෝකය අවශ්‍ය ශාක කවුළුවලට යාබදව, නමුත් සෘජු හිරු එළිය නොලැබෙන ස්ථාන සඳහා සුදුසුය. ඇග්ලොනිමා වැනි රතු, රෝස, රිදී වැනි විවිධ වර්ණ රටා සහිත කොළ ඇති බැවින් අලංකරණයට කදිමයි. මධ්‍යස්ථ ආලෝකයේදී එහි වර්ණ වඩාත් දීප්තිමත් වේ. පීස් ලිලී වාතය පිරිසිදු කරන ශාකයක් ලෙස ප්‍රකටය. අලංකාර සුදු මල් පිපෙන අතර, පස වියළෙන විට කොළ එල්ලා වැටීමෙන් ජලය අවශ්‍ය බව සංඥා කරයි. කැලේටියා ශාක කොළ මත ඇති ලස්සන රටා නිසා ඉතා ආකර්ෂණීයයි. ආර්ද්‍රතාවයට ප්‍රිය කරන අතර, අධික හිරු එළියෙන් කොළ පිළිස්සී යාමට ඉඩ ඇත.

ගෘහස්ථ පැලෑටි දිගු කලක් නිරෝගීව තබා ගැනීමට සැලකිලිමත් විය යුතු කරුණු

• අධික ජලය දැමීමෙන් වළකින්න
  ගෘහස්ථ පැල විනාශ වීමට ප්‍රධානතම හේතුව මෙයයි. ජලය දීමට පෙර පසෙහි ඉහළ අඟල් දෙක හොඳින් වියළී ඇත්දැයි පරීක්ෂා කරන්න. ශීත සෘතුවට සමාන ශ්‍රී ලංකාවේ වැසි කාලවලදී ජලය දීම අවම කළ යුතුය.

• නිසි පෝච්චි මිශ්‍රණයක් යෙදීම
  හොඳින් ජලය බැස යන පෝච්චි මිශ්‍රණයක් (කොහුබත්, පස් සහ කොම්පෝස්ට් මිශ්‍රණයක්) භාවිතා කරන්න. පෝච්චියේ යටින් ජලය බැස යාමට නිසි සිදුරු තිබිය යුතුය.

• පත්‍ර පිරිසිදු කිරීම
  කොළ මත තැන්පත් වන දූවිලි ඉවත් කිරීමට තෙත් රෙදි කැබැල්ලකින් මාසිකව පත්‍ර පිරිසිදු කරන්න. මෙය ශාකයට ආලෝකය වඩා හොඳින් අවශෝෂණය කර ගැනීමට උපකාරී වේ.

• සතුන්ට ඇති අවදානම ගැන අවධානය යොමු කිරීම
  ඔබට සුරතල් සතුන් (බල්ලන්/පූසන්) සිටී නම්, Peace Lily හෝ Pothos වැනි ශාක ඔවුන්ට විෂ සහිත විය හැකි බැවින්, එම ශාක ඔවුන්ට ළඟා විය නොහැකි උස් ස්ථානවල තැබීමට වග බලා ගන්න.

නිවසේ එක් එක් ස්ථාන සඳහා විසිතුරු පැලෑටි තෝරා ගන්නේ කෙසේද?

ඔබේ නිවසේ එක් එක් ස්ථානයේ ඇති ආලෝක තත්ත්වය, උෂ්ණත්වය සහ පවතින ඉඩකඩ අනුව, එම ස්ථානයට උපරිම සුන්දරත්වයක් සහ ක්‍රියාකාරීත්වයක් එක් කළ හැකි අභ්‍යන්තර ශාක මොනවාද කියා සොයා බලමු.

• නිදන කාමරය

නිදන කාමරය යනු විවේකය සහ සන්සුන් බව සඳහා වෙන් වූ ස්ථානයකි. මෙහි ශාක තෝරාගත යුත්තේ වාතය පිරිසිදු කරන සහ රාත්‍රියේදී ඔක්සිජන් නිකුත් කරන වර්ගවලිනි. ස්නේක් ප්ලාන්ට්, ලැවෙන්ඩර්, ඕකිඩ්, ගාඩීනියා වැනි ශාක වඩාත් සුදුසු වේ.

පැති මේසය සඳහා ස්නේක් ප්ලාන්ට් කුඩා ප්‍රභේදයක් හෝ පීස් ලිලී ශාකයක් සරල සුදු හෝ අළු පැහැති පෝච්චියක තබන්න. මෙහිදී කොළ වර්ණය සහ බිත්ති වර්ණය අතර වෙනසක් ඇති කිරීමට වගබලා ගන්න.

කවුළුව අසල රාත්‍රියේ මල් පිපෙන ඕකිඩ් වැනි ශාක තැබීමෙන් සන්සුන් සුවඳක් නිදන කාමරයට එක් කළ හැකිය.
කාමරයේ කෙළවරක, සිවිලිමෙන් හෝ උස රාක්කයකින් එල්ලෙන Pothos (පෝතෝස්) ශාකයක් තැබීමෙන් ස්වාභාවික තිරයක පෙනුමක් ලබා දිය හැකිය.

• මුළුතැන්ගෙය

මුළුතැන්ගෙයෙහි සාමාන්‍යයෙන් ආලෝකය හොඳින් ලැබේ. මෙහි ශාක තෝරාගත යුත්තේ සුවඳ සහ ප්‍රයෝජනවත් බව මත පදනම්වයි. කෝමාරිකා, මින්ට්, රෝස්මරී වැනි ඖෂධ පැළෑටි වඩාත් සුදුසුය.

ජනෙල් පඩිය මත මින්ට්, බැසිල් හෝ කොත්තමල්ලි වැනි කුඩා ඖෂධ පැළෑටි තබාගත හැකි කුඩා, සමාන ප්‍රමාණයේ පෝච්චි මාලාවක් තබන්න. අවශ්‍ය වූ විට නැවුම් කොළ නෙළා ගැනීමටත් මෙය පහසුය.

කවුන්ටර් ටොප් එකේ කෙළවරක කෝමාරිකා ශාකයක් තබන්න. එය අලංකරණයක් වනවා සේම, කුඩා පිළිස්සුම් තුවාලවලට ප්‍රථමාධාර ලෙසද භාවිත කළ හැකිය.
මුළුතැන්ගෙයි උදුනෙන් ඈත්ව, ආලෝකය ඇති ස්ථානයක Aglaonema ශාකයක් තැබීමෙන් වර්ණවත් බවක් එක් කළ හැකිය.

• වැඩ කරන මේසය/කාර්යාල කාමරය

වැඩ කරන අවකාශය සඳහා ශාක තෝරාගත යුත්තේ අවධානය වැඩි කරන සහ කුඩා ප්‍රමාණයේ ඒවාය. Succulents, පතොක්, කුඩා ප්‍රමාණයේ ස්නේක් ප්ලාන්ට් ප්‍රෙභ්ද මෙන්ම ZZ Plant මේ සඳහා සුදුසුය.

සරල ජ්‍යාමිතික (Geometric) හැඩැති කුඩා පෝච්චිවල විවිධ හැඩැති Succulents හෝ පතොක් ශාක කිහිපයක් එකට තබන්න. මේවා නඩත්තු කිරීම ඉතා පහසු ශාඛ වර්ගයි.

කුඩා ZZ Plant හෝ Money Plant එල්ලෙන පෝච්චියක තබන්න. හරිත පැහැය නිසා ඇස්වලට විවේකයක් ලැබේ.
කාර්යාල අවකාශයේදී කළු, සුදු හෝ ලෝහමය (Metallic) වර්ණවලින් යුත් පෝච්චි තෝරාගැනීමෙන් වෘත්තීය පෙනුමක් ලබා ගත හැකිය.

• නාන කාමරය

නාන කාමර සාමාන්‍යයෙන් තෙතමනය අධික වන අතර ආලෝකය අඩු විය හැක. ආර්ද්‍රතාවයට ප්‍රිය කරන ශාක මෙහිදී සුදුසුය., Pothos, ඕකිඩ්, Spider Plant වඩාත් සුදුසු වේ.

ජනේලයක් නොමැති නම්, සරල Pothos හෝ Spider Plant ටැංකියට ඉහළින් තබන්න. නාන කාමරයේ ඇති තෙතමනය ඔවුන්ගේ වර්ධනයට ප්‍රමාණවත්ය.
කැඩපත අසල වීදුරු බඳුනක වගා කළ කුඩා ශාක තැබීමෙන් අලංකාර බවක් එක් කළ හැකිය.

ඔබේ නිවසේ ස්ථානය කුමක් වුවත්, නිවැරදි ශාක තෝරාගැනීමෙන් සහ අලංකරණ අංග එකතු කිරීමෙන්, ඔබට ජීවයෙන් පිරි සුවපහසු වාතාවරණයක් නිර්මාණය කරගත හැකිය. විසිතුරු පැලෑටි ඔබේ නිවෙසට එකතු කරන්නේ ජීවය පමණක් නොව, එය ඔබට සොබාදහම සමඟ සම්බන්ධ වීමට ඇති නිහඬ අවස්ථාවකි. අදම ඔබේ නිවසට ගැළපෙන ශාකයක් තෝරාගෙන, එහි හරිත සෞන්දර්යය විඳින්න

---