ගර්භණීභාවය යනු කාන්තාවකගේ ජීවිතයේ වඩාත්ම ආකර්ෂණීය හා ප්‍රීතිමත් කාල පරිච්ඡේදයකි. කෙසේ වෙතත්, ශරීරයේ සීඝ්‍රයෙන් සිදුවන වෙනස්කම් සමඟ සමබරව ඇඳුම් තෝරා ගැනීම අභියෝගයක් විය හැකිය. ඇඳුම් ආයිත්තම් කට්ටලය සුවපහසුව, විලාසිතා සහ ආත්ම විශ්වාසය අතර නිවැරදි සමබරතාවයකින් යුතුව සකස් කර ගැනීම වැදගත් වන්නේ එබැවිනි. හොඳින් ඇඳ පැළඳ සිටීමෙන් ලැබෙන ආත්ම විශ්වාසය මානසික සුවයට ද විශාල පිටිවහලක් වේ.
ගැබිනි සමයේදී ඇඳුම් තෝරා ගැනීමේදී සුවපහසුව ප්‍රමුඛ විය යුතුය. ඔබේ ශරීරය වෙනස් වන බැවින්, කලින් ඇඳි තද ඇඳුම්වලින් ඇතිවන පීඩනය ශ්වසන අපහසුතා සහ රුධිර සංසරණ ගැටලු ඇති කළ හැකිය.
ඇදෙන සුලු රෙදි – කපු, ස්පෙන්ඩෙක්ස් (Spandex) අඩංගු මිශ්‍රණ වැනි ස්වභාවික හා ඇදෙන සුලු රෙදි තෝරා ගන්න. මෙම රෙදි සමට සුවපහසු වන අතර දහඩිය දැමීම අවම කරයි.
උදර ආධාරක – ගැබිනි කලිසම් (Maternity Pants), ජීන්ස් සහ ලෙගින්ග්ස් තෝරා ගැනීමේදී උදරය සම්පූර්ණයෙන්ම ආවරණය වන හෝ පහළින් ආධාරකයක් ලබා දෙන ‘බෙලි පැනල්’ (Belly Panel) සහිත ඒවා තෝරා ගන්න. මෙය ඉණ ප්‍රදේශයේ තද වීමකින් තොරව පිටුපසට ආධාරකයක් ලබා දෙයි.
ලිහිල් කැපුම් (Loose Fits) – පපුවට යටින් පටන් ගන්නා (Empire Waist) ගවුම්, මැක්සි ගවුම් (Maxi Dresses) සහ ටියුනික් (Tunic) විලාසිතාවේ ටොප්ස් සුවපහසු මෙන්ම විලාසිතාවක් ද එක් කරයි.
ගැබිනි ඇඳුම් සඳහා අධික ලෙස මුදල් වියදම් කිරීම අවශ්‍ය නොවේ. මන්දයත් ඔබ එම ඇඳුම් අඳින්නේ මාස කිහිපයක් පමණක් වන බැවිනි. වියදම් අවම කර ගැනීමට සහ ඇඳුම් ආයිත්තම් කට්ටලය ඵලදායීව කළමනාකරණය කිරීමට උපක්‍රමශීලී විය යුතුය.
මූලික ඇඳුම් ආයිත්තම් – සුදු, අළු සහ නිල්, රෝ වැනි ඔබ කැමති උදාසීන වර්ණවලින් යුත් මූලික ඇඳුම් කිහිපයක් පමණක් මිලදී ගන්න. මේවා වෙනත් ඕනෑම ඇඳුමක් සමඟ පහසුවෙන් ගලපා ඇඳිය හැකිය.
ඔබගේ සාමාන්‍ය ඇඳුම් භාවිත කරන්න – ඔබේ සාමාන්‍ය කමිස, ජැකට් ලිහිල්ව අඳින්න. මේවා ගැබිනි සමයේ ඔබ තෝරාගත් උඩ ඇඳුම් මතින් විලාසිතාවක් ලෙසට ඇඳිය හැකි අතර, උදරය වර්ධනය වන විට පවා ඔබට ගැලපේ. දිගු මාල, ස්කාෆ් සහ ආකර්ෂණීය කරාබු වැනි උපාංග භාවිත කරන්න. මේවා ඔබේ සරල ඇඳුමට වුවද විලාසිතාවක් එක් කරයි.
ගැබිනි සමයේ ඇඳුම් ඔබගේ සාමාන්‍ය ප්‍රමාණයෙන් (Pre-Pregnancy Size) මිලදී ගැනීමෙන්, ඒවා ගර්භණී සමය පුරාම ඔබගේ වෙනස් වන සිරුරට අනුව සකස් වනු ඇත. මිලදී ගැනීමට පෙර ඇඳුම් ඇඳ බැලීමෙන් එහි සුවපහසුව තහවුරු කරගන්න. ඔබට හැකි නම් සහෝදරියන්ගෙන් හෝ සමීපතම මිතුරියන් ගැබිනි සමයේ භාවිත කළ ඇඳුම් හුුවමාරු කරගත හැකිය.
ගැබිනි සමයේදී ඔබේ සිරුර වෙනස් වුවත්, ඔබේ විලාසිතා පිළිබඳ ඔබේ හැඟීම නැති කර ගැනීමට අවශ්‍ය නැත. විලාසිතා යනු සතුටයි, එබැවින් ඔබේ නව හැඩය විලාසිතාවෙන් විදහා දක්වන්න.
ඔබ, ඔබ ගැන සතුටු වෙන්න – සමහර කාන්තාවන් ලිහිල් ඇඳුම් අඳින අතර තවත් අය කැමති වන්නේ උදරයේ හැඩය හොඳින් පෙනෙන පරිදි ඇදෙන සුලු ඇඳුම් ඇඳීමටයි. ඔබට වඩාත් සුවපහසු සහ ආත්ම විශ්වාසයක් දැනෙන විලාසිතාව තෝරා ගන්න. ඉණ ඉහළින් කැපූ (Empire waist) විලාසිතා සෑම විටම ආකර්ෂණීය පෙනුමක් ලබා දෙයි.
පාදවල සුවපහසුව – උඩ අඩු පැතලි අඩි සහිත සෙරෙප්පු හෝ ස්නීකර්ස් තෝරා ගන්න. ගර්භණී සමයේදී ශරීරයේ බර වැඩි වන බැවින්, පාදවලට හොඳ ආධාරකයක් ලබා දීම අත්‍යවශ්‍ය වේ.
වර්ණය හා රටා – දීප්තිමත් වර්ණ සහ කුඩා රටා සහිත ඇඳුම් ඔබේ පෙනුමට ප්‍රබෝධයක් එක් කරයි.
ස්වයං ආකර්ෂණය – ඇඳුම් තෝරා ගැනීමට අමතරව, ඔබේ හිසකෙස්, සම සහ වේශ නිරූපණය කෙරෙහි අවධානය යොමු කිරීමෙන් ඔබේ ආත්ම විශ්වාසය ඉහළ නැංවිය හැකිය. හොඳින් සූදානම් වී පිටතට යාමෙන් ඔබට ඔබව දැනෙන්නට පටන් ගනී.
ගර්භණී සමයේදී ඇඳුම් මිලදී ගැනීමේදී ඔබගේ අවශ්‍යතා ඉක්මනින් වෙනස් වන බැවින් බුද්ධිමත්ව සහ කල්පනාකාරීව කටයුතු කිරීම ඉතා වැදගත්ය.
මිලදී ගැනීමට පෙර සලකා බැලිය යුතු කරුණු
- දිගුකාලීන භාවිතය සහ බහුකාර්යතාව
ඔබ මිලදී ගන්නා ඇඳුම් කිරිදීම සඳහා පහසුකම් සලසන විවරයන් සහිතදැයි බලන්න. මෙවැනි ද්විත්ව කාරය ඇඳුම් ගර්භණී කාලයෙන් පසුවද භාවිත කළ හැකි අතර මුදල් ඉතිරි කර ගත හැකිය.
ඉණ පටි ලිහිල් කිරීමට හෝ තද කිරීමට හැකි විශේෂාංග (Adjustable Waistbands) සහිත ඇඳුම් තෝරන්න. මෙවැනි ඇඳුම් මුළු ගැබිනි කාලය පුරාම ඔබට සුවපහසුව සලසයි.
- නිවැරදි ප්‍රමාණය තෝරා ගැනීම
බොහෝ මාතෘ ඇඳුම් නිර්මාණය කර ඇත්තේ ඔබගේ ගර්භණී වීමමට පෙර පැවති ප්‍රමාණයට අනුවය. එබැවින් අධික ලෙස විශාල ඇඳුම් මිලදී ගැනීමෙන් වළකින්න. විශාල ඇඳුම් ඇඳීමෙන් ඔබට එල්ලා වැටෙන, අවලස්සන පෙනුමක් ලැබිය හැකිය. එම ඇඳුම ගැබිනි කාලයේ කුමන අවධියක් සඳහා ගැලපෙන්නේද යන්න ලේබලයේ සඳහන් කර ඇත්දැයි පරීක්ෂා කරන්න.
- යට ඇඳුම්
පියයුරු ප්‍රමාණය ඉක්මනින් වෙනස් වන බැවින්, මුල් අවධියේදී බ්‍රා දිගු කරන පටි (Bra Extenders) භාවිතා කරන්න. පසුව හොඳ තත්ත්වයේ මාතෘ සහ කිරි දීමේ බ්‍රා යුගල කිහිපයක් මිලදී ගන්න. සුවපහසු වයර් රහිත මෝස්තර තෝරන්න.
උදරයට හොඳ ආධාරකයක් ලබා දෙන පෑන්ටි (Maternity Panties) හෝ ස්පෑන්ක්ස් (Spanx) වර්ගයේ යට ඇඳුම් මගින් කොන්දේ වේදනාව අවම කර ගැනීමට උපකාරී වේ.
- සාමාන්‍ය ඇඳුම් භාවිතයේ උපක්‍රම
ඔබේ සාමාන්‍ය ජීන්ස් හෝ කලිසම් බොත්තම දැමීමට නොහැකි වූ විට, උදරය වටා බෙලි බෑන්ඩ් එකක් පළඳින්න. මෙය බොත්තම විවෘතව තබාගෙන, උදරය වසා ගැනීමට උපකාරී වේ.
ඔබේ සාමාන්‍ය කාඩිගන්, ජැකට් හෝ බ්ලේසර් විවෘතව තබාගෙන අඳින්න. මෙලෙස ‘ලේයරින්’ කිරීමෙන් ඔබේ පෙනුමට වෘත්තීයමය හා විලාසිතාමය ස්පර්ශයක් එක් කළ හැකිය.
ලිහිල් ටී-ෂර්ට් සහ කමිස නින්දට හෝ නිවසේදී ඇඳීමට ඉතා පහසු සහ මුදල් ඉතිරි කරන ක්‍රමයකි.
- විලාසිතා සහ සිරුරේ හැඩය
ලිහිල් ඇඳුම් පමණක් ඇඳීමෙන් ඔබගේ උදරය විශාල බවක් පෙන්විය හැකිය. එබැවින් සමහර අවස්ථාවලදී ඇදෙන සුලු ලෙගින්ග්ස් සහ උදරය ප්‍රදර්ශනය වන ටොප්ස් ඇඳීමෙන් ඔබට වඩාත් ආත්ම විශ්වාසයක් දැනිය හැකිය.
ගර්භණී සමයේදී කකුල් හෝ අත් ඉදිමීමට ඉඩ ඇති බැවින්, මුදු සහ තද ඔරලෝසු පැළඳීමෙන් වළකින්න. ඒ වෙනුවට විශාල මාල, අත් බෑග් සහ සුවපහසු ස්කාෆ් භාවිතා කරන්න.
ඔබේ සාමාන්‍ය ප්‍රමාණයේ කමිස බොත්තම් දමා පපුව ප්‍රදේශය ආවරණය කිරීමට නොහැකි නම්, ඔබට කමිසයේ පහළ කොටස (උදරයට ඉහළින්) ගැට ගසා විලාසිතාවක් නිර්මාණය කළ හැකිය.
- සුවපහසු පාවහන් අත්‍යවශ්‍යයි:
ගර්භණී සමයේදී ශරීරයේ බර කේන්ද්‍රය වෙනස් වන බැවින් උස් අඩි පාවහන් පැලදීමෙන් සමබරතාවය නැති වී අනතුරු සිදුවිය හැකිය. හොඳ ආධාරකයක් සහිත පැතලි පාවහන්, ස්නීකර්ස් හෝ වෛද්‍ය නිර්දේශිත කුඩා විලුඹක් සහිත පාවහන් තෝරන්න. සිරුරේ ඉදිමීම් ඇති විට පාදවලට සුවපහසු වන පරිදි මෘදු රෙදි සහිත පාවහන් තෝරා ගැනීම වැදගත්ය.
ගර්භණී ඇඳුම් ආයිත්තම් කට්ටල තෝරා ගැනීමේදී සුවපහසුවට මුල් තැන දිය යුතු අතරම, ඔබේ අභ්‍යන්තර ආත්ම විශ්වාසය ඉහළ නංවන විලාසිතා තෝරා ගන්න. මෙය ඔබගේ අලංකාරම කාල පරිච්ඡේදයයි, එය සතුටින් සමරන්න.
Leave feedback about this