ගර්භණීභාවය යනු දින 280ක් පුරා දිවෙන පුදුමාකාර පරිවර්තනයක කාලයකි. මෙම විශේෂිත ගමන නැවත ආවර්ජනය කිරීමට, ඔබේ දරුවාට සහ ඔබට අනාගතයේදී අගනා මතක සටහනක් ලෙස ඉතිරි කර ගැනීමට, මෙම කාලය අලංකාරව සටහන් කර ගැනීම වැදගත්ය. ඡායාරූප, දිනපොත් සටහන් සහ අනෙකුත් සුවිශේෂී මතක සටහන් එකතු කිරීමෙන් මෙම අත්දැකීම සදාකාලික කර ගත හැකිය.
ඡායාරූප යනු ගැබිනි සමයේ ශරීරයේ සිදුවන ආකර්ෂණීය වෙනස්කම් ග්‍රහණය කර ගැනීමට ඇති හොඳම මාර්ගයයි.
වැඩෙන උදරයේ ඡායාරූප (Bump Progression Photos)
- ගැබිනි කාලය පුරාවටම සතියකට වරක් හෝ මසකට වරක් ඡායාරූපයක් ගැනීමට කාලසටහනක් සකස් කරන්න.
- සෑම ඡායාරූපයක්ම එකම ස්ථානයක සිට, එකම පසුබිමක් සහ එකම ආලෝක රටාව යටතේ ගන්න. මෙය ඔබේ උදරය වර්ධනය වන ආකාරය පැහැදිලිව විදහා දක්වයි.
- සෑම විටම එකම ඇඳුම ඇඳීමෙන් වෙනස මනාව දැකගත හැකිය.
- ඔබේ දරුවාගේ ප්‍රමාණය සතියෙන් සතිය පළතුරු හෝ එළවළු සමඟ සංසන්දනය කරමින් එවැනි දේ හෝ කුඩා බබාගේ සපත්තු වැනි උපාංග භාවිතා කිරීමෙන් ඡායාරූප තවත් සුනදර කළ හැකියි.
- ඔබේ උදරයේ හැඩය මනාව පෙන්වීමට, දීප්තිමත් ආලෝක ප්‍රභවයකට මුහුණ දී සිටගෙන සිලුවට් ඡායාරූප ලබා ගන්න.
වෘත්තීය මාතෘ ඡායාරූපකරණය
සාමාන්‍යයෙන් 30 සිට 36 වන සතිය දක්වා කාලය වෘත්තීය ඡායාරූප ගැනීම සඳහා වඩාත් සුදුසුය, මන්ද එම කාලය වන විට උදරය හොඳින් වර්ධනය වී ඇති අතර මවටද යම් සුවපහසුවක් දැනේ.
- සහකරු සහ අනෙකුත් දරුවන් සම්බන්ධ කර ගනිමින් පවුලේ කතාවට මුල පුරන ඡායාරූප නිර්මාණය කරන්න.
- ඔබගේ පෞද්ගලික ජීවන විලාසිතාවට ගැලපෙන ඡායාරූප ශිල්පියෙකු තෝරා ගන්න.
ඡායාරූප දෘශ්‍යමාන කතාව කීවත්, ඔබේ සැබෑ හැඟීම්, බලාපොරොත්තු සහ බිය සටහන් කිරීමට ජර්නල් ඉතා වැදගත්ය. මෙය දරුවාට අනාගතයේදී ලබා දිය හැකි අද්විතීය තෑග්ගකි.
ජර්නලයකට ඇතුළත් කළ යුතු දේ
- ගැබ් ගැනීම ගැන දැනගත් මොහොතේ ඔබේ මුල් ප්‍රතිචාර, ඔබ බිය වන දේ, ඔබ බලාපොරොත්තු වන දේ සහ දිනපතා ඔබේ මනෝභාවයේ වෙනස්කම්
- දරුවාගේ පළමු පයින් ගැසීම දැනුණු දවස, පළමු වතාවට හෘද ස්පන්දනය ඇසීම, පළමු අල්ට්‍රා සවුන්ඩ් පින්තූරය සහ මාතෘ ඇඳුම් ඇඳීමට පටන් ගත් දවස
- ඔබට ඇති වූ අමුතු ආකාරයේ ආහාර රුචි අරුචිකම්, ගඳ සුවඳ ගැන ගැටලු
- ඔබේ අනාගත දරුවාට ලිපි ලියන්න. ඔබ ඔහුට/ඇයට ලෝකයේ පෙන්වීමට බලාපොරොත්තු වන දේ, ඔබ ඔහු/ඇය කෙරෙහි දක්වන අසීමිත ආදරය සහ උපතින් පසු ඔබ ජීවත් වීමට බලාපොරොත්තු වන ආකාරය
- වෛද්‍යවරයා හමුවීමට යාමට පෙර ඔබට ඇසීමට ඇති ප්‍රශ්න ලැයිස්තුව
ජර්නලය පවත්වා ගැනීමේ උපක්‍රම
- සෑම දිනකම දිගු වාක්‍ය ලිවීමට උත්සාහ නොකරන්න. ඔබට වෙලාවක් නොමැති නම් කෙටි වාක්‍ය කිහිපයක් හෝ මූලික කරුණු පමණක් සටහන් කරන්න.
- ජර්නලය තුළ අල්ට්‍රා සවුන්ඩ් ඡායාරූප (එය මැකී යා හැකි බැවින් ඡායාරූපයක් ගෙන මුද්‍රණය කරන්න) හමුවීම් කාඩ්පත් හෝ බබාට මිලදී ගත් පළමු කුඩා සපත්තුවේ ඡායාරූප ඇතුළත් කරන්න.
ඡායාරූප සහ ලිවීම්වලින් ඔබ්බට ගිය, ස්පර්ශ කළ හැකි සුවිශේෂී මතක සටහන් එකතු කිරීම මෙම කාලය වඩාත් අලංකාර කරයි.
- ගැබිනි සමයේදී ඔබේ උදරයේ හැඩය සදාකාලිකව සංරක්ෂණය කිරීම සඳහා ප්ලාස්ටර් අච්චුවක් (Plaster Cast) සාදා ගන්න ඔබට හැකි නම් එය කරන්න. මෙය ඔබට දරුවාගේ කාමරයේ අලංකාර කලා කෘතියක් ලෙස තැබීමට හෝ උපතින් පසු බිළිඳා ඒ තුළ තබා ඡායාරූප ගැනීමට භාවිත කළ හැකිය.
- මතක පෙට්ටියක් සකසා ගන්න. මෙයට ඔබ ගැබ් ගත් බව තහවුරු වූ පරීක්ෂණ තීරුව, වෛද්‍ය කාඩ්පත්, බබාගේ පළමු ඇඳුම් කිහිපය, බේබි ෂවර් එකක් ඔබ පැවැත්වූවා නම් එහි ආරාධනා පත් සහ ගැබිනි සමයේදී ඇඳි විශේෂිත ඇඳුම්වල කොටස් ඇතුළත් කළ හැකිය.
- සෑම මසකම ඔබේ බර වැඩිවීම සහ උදරයේ වටප්‍රමාණය ටේප් එකකින් මැන සටහන් කර තබා ගන්න.
- ගැබිනි සමයේ වැදගත් සිදුවීම් සටහන් කළ දින දර්ශනයක් සුරක්ෂිතව තබා ගන්න.
ගර්භණී සමය සටහන් කර ගැනීමේදී වැදගත්ම දේ වන්නේ සම්පූර්ණත්වය නොව ඔබේ අත්දැකීම් මතකයන් නිවැරදිව සංරක්ෂණය කිරීමයි. මෙම කතාව ඔබගේ පමණක් නොව, ඔබේ දරුවාගේද මුල්ම කතාවයි. ඒ වගේම ඔබේ හැකියාව මත මේ සියල්ල සැලසුම් කිරීමට ඔබට හැකියි. අධික වියදම්වලින් තොරව ඔබේ ගැබිනි සමයේ මතක කැටි කරන්නට ඔබට හැකියි.
Leave feedback about this