සාම්ප්‍රදායික ශ්‍රී ලාංකේය සමාජයේ පියාගේ භූමිකාව බොහෝ විට පවුල නඩත්තු කරන්නා සහ විනය පාලකයා ලෙස සීමා විය. දරුවන් පෝෂණය කිරීමේ සහ චිත්තවේගීයව රැකබලා ගැනීමේ කාර්යය මවට පැවරිණි. එහෙත්, නවීන පර්යේෂණ සහ සමාජීය වෙනස්කම් අනුව, සක්‍රීයව සම්බන්ධ පියෙකු සිටීම දරුවාගේ සමස්ත සංවර්ධනයට අත්‍යවශ්‍ය සාධකයක් බව තහවුරු වී ඇත. දරුවන් ඇති දැඩි කිරීමේදී පියවරුන්ගේ වැදගත්කම සහ ඔවුන්ගේ වැඩි දායකත්වය දිරිමත් කළ යුත්තේ ඇයිද යන්න පිළිබඳව මෙහිදී අවධානය යොමු කෙරේ.
පියවරුන් දරුවන්ගේ ජීවිතයට සපයන දායකත්වය මවකගේ දායකත්වයට වඩා තරමක් වෙනස් නමුත්, එය සමානවම වැදගත් වේ.
- චිත්තවේගීය ආරක්ෂාව සහ විශ්වාසය
තාත්තා සක්‍රීයව දරුවාගේ ජීවිතයේ සිටින විට, දරුවාට වඩාත් ස්ථාවර සහ චිත්තවේගීයව ආරක්ෂිත පදනමක් ලැබේ. තාත්තාගේ සෙනෙහස ලැබෙන දරුවන් ආත්ම විශ්වාසයෙන් ඉහළ වන අතර, කාංසාව (Anxiety) සහ මානසික අවපීඩනය වැනි ගැටලු ඇතිවීමේ ප්‍රවණතාව අඩුය. ඔවුන්ට ජීවිතයේ අභියෝගවලට වඩා පහසුවෙන් මුහුණ දීමට හැකි වේ.
- දැනුම හා භාෂා සංවර්ධනය
පියවරුන් දරුවන් සමඟ සංවාදයේ යෙදෙන ආකාරය, මවුවරුන්ට වඩා වෙනස් විය හැකිය. මෙය දරුවාගේ වාග් විද්‍යාත්මක හා සංජානන හැකියාවන් වර්ධනයට සෘජුව බලපායි. දරුවන් සමඟ කතා කිරීම, පොත් කියවීම සහ ඔවුන්ගේ අධ්‍යාපන කටයුතුවලට සම්බන්ධ වීමෙන්, ඔවුන්ගේ IQ මට්ටම ඉහළ යන බවත්, වඩා හොඳ භාෂා කුසලතා වර්ධනය වන බවත් පර්යේෂණවලින් හෙළි වී තිබේ.
- හැසිරීම් නියාමනය (Self-Regulation)
පියවරුන් බොහෝ විට දරුවන් සමඟ ශාරීරික ක්‍රීඩා (Rough-and-Tumble Play) වල නිරත වේ. මෙමගින් දරුවාට සීමාවන් සහ සමාජ නීති ඉගෙන ගැනීමට අවස්ථාව ලැබේ. ක්‍රීඩා තුළින් ඇතිවන උද්දීපනය කළමනාකරණය කරගැනීමට දරුවා පුහුණු වන අතර, එය පසුකාලීනව කෝපය වැනි හැඟීම් සමාජයට පිළිගත හැකි ආකාරයෙන් නියාමනය කිරීමට උපකාරී වේ. මෙම දරුවන්ට පාසලේදී සහ මිතුරන් අතර යහපත් සමාජ සම්බන්ධතා ගොඩනගා ගැනීමට හැකියාව ඇත.
දෙමාපිය භූමිකාව සමබර කර ගැනීම සඳහා පියාගේ සක්‍රීය දායකත්වය දිරිමත් කිරීමට ගත හැකි ප්‍රායෝගික පියවර කිහිපයක් මෙන්න.
- පියාට අවස්ථාව දෙන්න
මවුවරුන් ලෙස සමහර විට අපි නොදැනුවත්වම පියාගේ දායකත්වයට බාධා කළ හැකිය.
- අම්මාගේ භූමිකාව පසෙකින් තබන්න
දරුවා අඬන විට හෝ යම් දෙයක් අවශ්‍ය වූ විට පියා ළඟ සිටියද, වහාම මව මැදිහත් වීමෙන් වළකින්න. පියාට දරුවා සමඟ තනිව ගැටලු විසඳා ගැනීමට ඉඩ දෙන්න.
- විවේචනයෙන් වළකින්න
පියා දරුවා රැකබලා ගන්නා ආකාරය ඔබට වඩා වෙනස් විය හැකිය (ඩයපර් මාරු කරන ආකාරය). “ඔහොම නෙවෙයි, මෙහෙම කරන්න” කියා විවේචනය කරනවා වෙනුවට, ඔහුට තම ක්‍රමවේදය සොයා ගැනීමට ඉඩ දෙන්න.
- මව පමණක් දන්නවා යන මතය වෙනස් කරන්න
දරුවාගේ ආහාර, සෞඛ්‍ය සහ පාසල් තොරතුරු පියා සමඟ සමව බෙදා ගන්න. පියාටත් දරුවා ගැන මවට තරමටම වගකීමක් සහ දැනුමක් ඇති බව දැනෙන්නට සලස්වන්න.
- සැමවිටම මව සහ පියා එක්ව විනය ක්‍රියාත්මක කරන්න
දරුවන් ඇති දැඩි කිරීමේදී මව පියා දෙදෙනාගේම ඒකාබද්ධ ස්ථාවරයක් තිබීම අත්‍යවශ්‍ය වේ. පවුලේ නීති සහ විනය මාර්ගෝපදේශ එකට තීරණය කරන්න. දරුවා වරදක් කළ විට එක් අයෙකු දඬුවම් කරන විට අනෙකා මැදිහත්වී සහන නොදෙන්න. තාත්තාගෙන් අහන්න යනුවෙන් පවසා, දරුවාගේ හිස තුළ තත්ත්වයන් දෙකක අදහස් ඇති කිරීමෙන් වළකින්න.
- පියාගේ ශක්තීන් යොදා ගන්න
සෑම පියෙකුටම දරුවන් සමඟ සම්බන්ධ වීමට ඇති තමන්ටම ආවේණික වූ හැකියාවන් ඇත. පියා ක්‍රීඩාශීලී නම්, දරුවා සමඟ පිටත ක්‍රීඩා කිරීමටත්, ඔහු තාක්ෂණයට දක්ෂ නම්, දරුවාගේ අධ්‍යාපනික ක්‍රීඩා හෝ පරිගණක භාවිතය අධීක්ෂණය කිරීමටත් යොදා ගන්න. පියාට රැකියාව නිසා දිවා කාලයේ දරුවන් සමඟ සිටිය නොහැකි නම්, සවස් වරුවේ විනාඩි 20 ක ගුණාත්මක කාලයක් (තාක්ෂණයෙන් තොරව කතාවක් කියවීම හෝ ඇඳට යාමට සූදානම් කිරීම) වෙන් කරන්න.
ශ්‍රී ලංකාවේ පියවරුන්ට තම සාම්ප්‍රදායික භූමිකාවෙන් මිදී දරුවන් ඇති දැඩි කිරීමට වැඩි දායකත්වයක් දීම අභියෝගාත්මක විය හැකිය. නමුත් එම වෙනස දැනටමත් ආරම්භ වී ඇත.
- මුදල් ඉපයීමෙන් ඔබ්බට දරුවාගේ දෛනික අවශ්‍යතා (කෑම දීම, ඇඳුම් ඇඳීම, පාසලට සූදානම් කිරීම) සඳහා තාත්තා සම්බන්ධ වීමෙන් මවට ඇතිවන ආතතිය අඩු වන අතර, පවුල තුළ සමබරතාවය ඇති වේ.
- පියා දරුවන් ඇති දැඩි කිරීමට සහ ගෙදර දොරේ වැඩට දායක වීමෙන්, දරුවන්ට සමානාත්මතාවය සහ ගෞරවය පිළිබඳ ප්‍රබල ආදර්ශයක් සපයයි. මෙය ගැහැනු හා පිරිමි දරුවන් දෙදෙනාටම ඉතා වැදගත්ය.
පියවරුන් ලෙස ඔබ දරුවා වෙනුවෙන් ලබා දෙන සෑම සුළු මොහොතක්ම ඔවුන්ගේ අනාගත සාර්ථකත්වයට කරන නිහඬ ආයෝජනයක් බව මතක තබා ගන්න. එම සෙනෙහස සහ අවධානය දරුවාගේ මනසට සහ ආත්මයට ශක්තිය ලබා දෙනු ඇත.
සටහන
දිශාන්ති වෙදගේ
මනෝ උපදේශන ඩිප්ලෝමාධාරීණී
මානසික සෞඛ්‍ය සරසවිය
