නියපොතු යනු අපගේ සෞඛ්‍ය තත්ත්වය විදහා දක්වන වැදගත් දර්ශකයකි. ශක්තිමත්, පැහැපත් සහ නිරෝගී නියපොතු පවත්වා ගැනීම රූපලාවණ්‍යමය වශයෙන් මෙන්ම සෞඛ්‍යමය වශයෙන්ද අත්‍යවශ්‍ය වේ. දෛනික ජීවන රටාවේ ඇතැම් පුරුදු හා නිසි සැලකිල්ලෙන් තොරවීම නිසා නියපොතු දුර්වර්ණ වී, කැඩී හෝ ආසාදනවලට ලක්විය හැකිය. ඔබේ නියපොතු ආරක්ෂා කර ගනිමින්, ඒවායේ ස්වභාවික සුන්දරත්වය සහ ශක්තිමත් බව රැක ගැනීමට අවධානය යොමු කළ යුතුමය.
නියපොතු ආසාදනවලට ලක්වීම වළක්වා ගැනීමට පිරිසිදුකම අත්‍යවශ්‍ය වේ.
- නියපොතු පිරිසිදුව හා වියළිව තබා ගැනීම – බැක්ටීරියා සහ දිලීර වර්ධනය වීමට තෙත් පරිසරය ඉතා හිතකරය. එබැවින්, නියපොතු හැමවිටම පිරිසිදුව සහ හොඳින් වියළා තබා ගන්න. විශේෂයෙන්ම, ස්නානය කිරීමෙන් හෝ ජලය යොදා වැඩ කිරීමෙන් පසු නියපොතු අවට ප්‍රදේශය මෘදු ලෙස පිසදමා වියළා ගන්න.
- අධික ලෙස ජලයේ ගිල්වීමෙන් වළකින්න – නිවසේ පිරිසිදු කිරීම් වැනි ජලය හා සබන් දියර නිරාවරණය වන අවස්ථාවලදී ආරක්ෂිත අත්වැසුම් භාවිතා කිරීම වැදගත්ය. සබන් සහ රසායනික ද්‍රව්‍ය නියපොතු වියළීමට සහ බිඳීමට හේතු විය හැක.
- තෙතමනය පවත්වා ගැනීම – නියපොතු වියළී, බිඳෙනසුලු වීම වළක්වා ගැනීමට මොයිස්චරයිසර් වර්ගයක් නියපොතු සහ අවට සමේ ආලේප කරන්න. පොල්තෙල් හෝ ඔලිව් තෙල් වැනි ස්වාභාවික තෙල් වර්ග රාත්‍රියේදී ආලේප කිරීමෙන් නියපොතු වලට අවශ්‍ය තෙතමනය සහ පෝෂණය ලබා ගත හැක.
නියපොතු කැපීමේදී හා ඒවාට හැඩය ලබා දීමේදී නිවැරදි ක්‍රමවේද අනුගමනය කළ යුතුය.
- නිවැරදිව කැපීම – නියපොතු කැපීම සඳහා වඩාත් සුදුසුම කාලය වන්නේ ස්නානයෙන් පසුවය, මන්ද එම අවස්ථාවේදී නියපොතු මෘදු වී තිබෙන බැවිනි. අත් නියපොතු මදක් වක්‍රාකාරව කැපුවත්, පාදයේ නියපොතු හැමවිටම කෙළින් කැපීමට වගබලා ගන්න. මෙය නියපොතු ඇතුළට වැඩීම (Ingrown Nails) වැළැක්වීමට උපකාරී වේ.
- නියපොතු සැපීමෙන් වළකින්න – නියපොතු සැපීම නියපොතුවලට සහ අවට සමට හානි කරනවා පමණක් නොව, ආසාදන ඇතිවීමටද ප්‍රධාන හේතුවක් වේ. මෙම පුරුද්දෙන් වැළකීමට උත්සාහ කරන්න.
- නියපොතු මෙවලම් පිරිසිදුව තබා ගැනීම – නියපොතු කපන උපකරණ (Nail Clippers, Files) නිතිපතා පිරිසිදු කර විෂබීජහරණය කරන්න. කිසිවිටෙක අන් අය සමඟ මෙම මෙවලම් බෙදා නොගන්න.
නිරෝගී නියපොතු සඳහා බාහිර සත්කාර මෙන්ම අභ්‍යන්තර පෝෂණයද වැදගත්ය.
- සමබල ආහාර වේලක් – නියපොතු ප්‍රධාන වශයෙන් කෙරටින් (Keratin) නම් ප්‍රෝටීනයෙන් සෑදී ඇත. එමනිසා ප්‍රෝටීන්, කැල්සියම්, බයෝටින් සහ යකඩ බහුල ආහාර අනුභව කිරීම ඉතා වැදගත්ය. බිත්තර, මස්, මාළු, ධාන්‍ය වර්ග සහ කොළ එළවළු නියපොතු ශක්තිමත් කිරීමට උපකාරී වේ.
- ජලය පානය – ශරීරයේ විජලනය වීම නියපොතු වියළීමට හා කැඩීමට හේතු වේ. දිනකට ප්‍රමාණවත් තරම් ජලය පානය කිරීමෙන් නියපොතු වල තෙතමනය පවත්වා ගත හැක.
- සෞඛ්‍ය ගැටලු හඳුනා ගැනීම – නියපොතුවල ඇතිවන පැහැය වෙනස් වීම් (කහ, නිල් හෝ සුදු පැහැති වීම), රැලි සහිත වීම හෝ ඉරිතැලීම් රක්තහීනතාවය, දිලීර ආසාදන හෝ තයිරොයිඩ් වැනි අභ්‍යන්තර සෞඛ්‍ය ගැටලුවල ලක්ෂණ විය හැකිය. එවැනි වෙනසක් දුටුවහොත් වෛද්‍යවරයකු හමුවන්න.
නියපොතු අලංකාර කිරීමට යොදා ගන්නා නිෂ්පාදනවලදී ප්‍රවේශම් විය යුතුය.
- නිය ආලේපන සහ නිය ආලේපන ඉවත් කරන දියර – නිය ආලේපන නිතර භාවිතා කිරීමෙන් වළකින්න. ඒවා වාතයට නිරාවරණය වීමත් අවශ්‍ය යි. එසේම නිය ආලේපන ඉවත් කරන දියර (Remover) නිතර භාවිතා කිරීම නියපොතු වියළීමට හේතු විය හැකි බැවින්, ඇසිටෝන් රහිත මෘදු රිමූවර් වර්ගයක් තෝරා ගන්න.
- ඇක්‍රිලික් සහ ජෙල් නියපොතු – මෙම කෘතිම නියපොතු යොදන විට නියපොතු මතුපිට සූරා දැමීමෙන් ස්වභාවික නියපොතු තට්ටුවට හානි විය හැක. මෙම සත්කාර ලබා දීමෙන් පසු, නියපොතු යථා තත්ත්වයට පත් වීමට කාලය ලබා දෙන්න.
- ආරක්ෂිත සහ ප්‍රමිතියෙන් යුත් රූපලාවන්‍යගාර තෝරාගන්න – නියපොත් සත්කාර සඳහා යන විට, ඔවුන් පාවිච්චි කරන උපකරණ හොඳින් විෂබීජහරණය කරන සැලෝනයක් තෝරා ගැනීමෙන් දිලීර හෝ බැක්ටීරියා ආසාදන ඇතිවීමේ අවදානම අඩු කර ගත හැකිය.
බොහෝ දෙනා තම නියපොතු ලේබල් ඇලවූ පෘෂ්ඨ සූරා දැමීමට, යමක් විවෘත කිරීමට හෝ සීරීමට භාවිත කරයි. මෙලෙස නියපොතු මෙවලමක් ලෙස භාවිත කිරීමෙන් ඒවා කැඩී යාමට හෝ හානි වීමට ඉඩ ඇත. මේ වෙනුවට සුදුසු උපකරණයක් භාවිත කිරීමට පුරුදු වන්න.
නියපොතු ආරක්ෂා කර ගැනීම යනු දිනක් හෝ දෙකක් සිදු කරන සත්කාරයක් නොව, නිරන්තරයෙන් පවත්වා ගත යුතු හොඳ පුරුදු අතරින් එකක්. මෙම සරල උපදෙස් අනුගමනය කිරීමෙන් ඔබේ නියපොතු ශක්තිමත්ව, නිරෝගීව සහ සුන්දරව පවත්වා ගැනීමට ඔබට හැකි වනු ඇත.
Leave feedback about this