ලේසර් තාක්ෂණය වෛද්ය ක්ෂේත්රය, රූපලාවණ්ය කර්මාන්තය සහ කාර්මික යෙදීම් ඇතුළු තවත් විවිධ ක්ෂේත්රවල අපගේ ජීවිතය පහසු කරයි. ලේසර් තාක්ෂණය යනු හුදෙක් ආලෝක කදම්භයක් නොවේ. එය නූතන විද්යාවේ සහ ඉංජිනේරු විද්යාවේ විශ්මයජනක ජයග්රහණයකි. රූපලාවණ්ය ප්රතිකාරවලින් පෙනුම වැඩි දියුණු කිරීම, අක්ෂි ශල්යකර්මවලින් පෙනීම යථා තත්ත්වයට පත් කිරීම, අධිවේගී දත්ත සම්ප්රේෂණය මගින් ලෝකය සම්බන්ධ කිරීම සහ කර්මාන්ත ශාලාවල නිරවද්ය නිෂ්පාදන සිදු කිරීම වැනි කටයුතුවලදී ලේසර් තාක්ෂණය අපගේ එදිනෙදා ජීවිතයේ අනිවාර්ය අංගයක් බවට පත්ව ඇත.
ලේසර් (LASER – Light Amplification by Stimulated Emission of Radiation) යනු උත්තේජිත විකිරණ විමෝචනය මගින් ආලෝකය විස්තාරණය කිරීමේ තාක්ෂණයයි. බොහෝ දෙනෙක් ලේසර් ගැන සිතන විට, රූපලාවණ්යාගාරයක සිදු කරන රෝම ඉවත් කිරීම හෝ විද්යා ප්රබන්ධ චිත්රපටවල දැකිය හැකි බලවත් කිරණ ගැන පමණක් සිතුවද, යථාර්ථයේදී ලේසර් තාක්ෂණය අපගේ එදිනෙදා ජීවිතයේ සෑම අංශයක්ම පාහේ විප්ලවීය වෙනසකට ලක් කර ඇත. එහි ඇති නිරවද්යතාව, තීව්රතාව සහ ඒකවර්ණ (Monochromatic) ස්වභාවය නිසා වෙනත් කිසිදු ආලෝක ප්රභවයකින් ලබා ගත නොහැකි සුවිශේෂී ප්රතිඵල ලබා දෙයි.
රූපලාවණ්ය ක්ෂේත්රයේ ලේසර් භාවිතය වඩාත් ජනප්රිය වී ඇත්තේ එහි ඇති දිගුකාලීන සහ සතුටුදායක ප්රතිඵල හේතුවෙනි.
අනවශ්ය රෝම ස්ථිරව ඉවත් කිරීම – ලේසර් තාක්ෂණය රූපලාවණ්ය ක්ෂේත්රයේ වඩාත්ම ප්රචලිත වී ඇති මේ සඳහා බව කිව්වොත් නිවැරදිය. ලේසර් කිරණ මගින් රෝම කූපවල ඇති මෙලනින් වර්ණකය ඉලක්ක කර, රෝම කූප විනාශ කිරීම හෝ ඒවායේ වර්ධනය අඩාල කිරීම සිදු කරයි. මෙම ක්රමය මගින් සාම්ප්රදායික ක්රමවලට වඩා වේදනා රහිතව, විශාල ප්රදේශයක රෝම ස්ථිරවම පාහේ ඉවත් කර ගත හැකිය.
සමට සිදුකරන ප්රතිකාර – ලේසර් ප්රතිකාර මගින් සමේ වයස්ගත වීම, හිරු එළියට නිරාවරණය වීම නිසා ඇති වූ හානි සහ කැළැල් අඩු කළ හැකිය.
ලේසර් තාක්ෂණික ක්රම මගින් සමේ ඉහළ ස්ථරය (Epidermis) ප්රවේශමෙන් ඉවත් කර, සමට යටින් නව කොලජන් (Collagen) නිෂ්පාදනය උත්තේජනය කරයි. මෙයින් සමේ රැළි, කුරුලෑ කැළැල් සහ තද පැල්ලම් සැලකිය යුතු ලෙස අඩු වේ. එසේම ලප කැළැල්, හිරු රශ්මියෙන් ඇති වූ පැල්ලම් (Age Spots) සහ මෙලස්මා (Melasma) වැනි සමේ අසාමාන්ය වර්ණක තත්ත්වයන් නිවැරදි කිරීමටද ලේසර් තාක්ෂණය යොදා ගැනේ. තවද ටැටූ ඉවත් කිරීම සඳහා ඉතා කෙටි, තීව්ර ආලෝක ස්පන්දන භාවිත කර ටැටූවල තීන්ත අංශු කුඩා කැබලිවලට කඩා දමයි. පසුව එම කැබලි ශරීරයේ ප්රතිශක්තිකරණ පද්ධතිය මගින් ඉවත් කරනු ලැබේ.
ලේසර් තාක්ෂණය වෛද්ය විද්යාවට ගෙන ආවේ විප්ලවීය වෙනසකි. එයින් ශල්යකර්ම වඩාත් නිරවද්ය, පැතිරීම අවම කරමින් සහ ඉක්මන් සුවය ලැබිය හැකි මට්ටමට ගෙන ආවේය.
අක්ෂි ශල්යකර්ම (Ophthalmology)
- දෘෂ්ටි නිවැරදි කිරීම (LASIK) – LASIK (Laser-Assisted In Situ Keratomileusis) යනු ලේසර් භාවිතයෙන් දුර දෘෂ්ටිය, ළඟ දෘෂ්ටිය වැනි දෘෂ්ටි දෝෂ නිවැරදි කරන ක්රියාවලියකි. මෙය කණ්ණාඩි භාවිතයෙන් තොරව පැහැදිලි පෙනීමක් ලබා ගැනීමට උපකාරී වේ.
- ඇසේ සුද (Cataract) සැත්කම් – ලේසර් භාවිතයෙන් ඇසේ සුද ඉවත් කිරීමේදී, ශල්ය වෛද්යවරුන්ට වඩාත් නිරවද්ය කැපුම් සිදු කිරීමට සහ කාචය ඉවත් කිරීමේ ක්රියාවලිය පහසු කර ගැනීමට හැකි වේ.
දන්ත වෛද්ය විද්යාව (Dentistry)
දන්ත වෛද්ය විද්යාවේදී ලේසර් භාවිත කරන්නේ විදුරුමස් රෝග සඳහා ප්රතිකාර කිරීමට, දිරාපත් වූ දත් පටක ඉවත් කිරීමට සහ මුඛයේ ඇති අනවශ්ය පටක ඉවත් කිරීමට ය. මේවා සාම්ප්රදායික විදුම් උපකරණවලට වඩා අඩු වේදනාකාරී සහ අඩු ශබ්දයක් ඇති කරන ක්රමවේද වේ.
ශල්යකර්ම සහ පිළිකා ප්රතිකාර
- නිරවද්ය කැපීම – ලේසර් කිරණ මගින් මිනිස් පටක ඉතාමත් නිරවද්යව සහ අවම රුධිර වහනයකින් කපා හැරීමට හැකි වේ. ලේසර් තාපය කැපීම සිදු වන අවස්ථාවේදීම රුධිර වාහිනී මුද්රා තබන නිසා මෙය සැත්කම් සඳහා කදිම විසඳුමකි.
- පිළිකා ප්රතිකාර (PDT – Photodynamic Therapy) – පිළිකා ප්රතිකාරයේදී ලේසර් භාවිත කරනු ලබයි. විශේෂයෙන්ම, ඡායාරූප සංවේදී ඖෂධයක් (Photosensitizer) රෝගියාගේ සිරුරට ඇතුළු කර, පසුව පිළිකා සෛල වෙත ලේසර් ආලෝකය යොමු කරයි. ආලෝකය මගින් ඖෂධය සක්රීය වී, පිළිකා සෛල විනාශ කරයි.
ලේසර් තාක්ෂණයේ වැදගත්කම වෛද්ය විද්යාවෙන් ඔබ්බට ගිය, අපගේ එදිනෙදා ජීවිතයට සම්බන්ධ වන පුළුල් පරාසයක යෙදීම් දක්වා විහිදී යයි.
- තොරතුරු තාක්ෂණය සහ සන්නිවේදනය
තන්තුමය දෘෂ්ය සන්නිවේදනය (Fiber Optics) – ලේසර් ආලෝක කිරණ භාවිතයෙන් දත්ත අධි වේගයෙන් තන්තුමය දෘෂ්ය කේබල් හරහා සම්ප්රේෂණය කරයි. අන්තර්ජාලය, දුරකථන සහ රූපවාහිනී සන්නිවේදනය සඳහා මෙම තාක්ෂණය අත්යවශ්ය වේ.
බාර්කෝඩ් කියවීම (Barcode Scanning) – වෙළෙඳසැල්වල භාණ්ඩ මිලදී ගැනීමේදී භාවිත කරන ස්කෑනරය තුළ ඇත්තේ ලේසර් කිරණකි. එය බාර්කෝඩය කියවා තොරතුරු ක්ෂණිකව පරිගණක පද්ධතියට ලබා දෙයි.
- නිෂ්පාදන සහ කාර්මික යෙදීම්
කැපීම සහ පෑස්සීම – ලේසර් කිරණවල ඇති අධි තීව්රතාව නිසා ලෝහ, ප්ලාස්ටික්, දැව ඇතුළු ඕනෑම ද්රව්යයක් අතිශයින්ම නිරවද්යව කැපීම සහ පෑස්සීම පහසුවෙන් සිදුකරයි. වාහන, ගුවන් යානා සහ ඉලෙක්ට්රොනික උපකරණ නිෂ්පාදනයේදී මෙය අත්යවශ්ය වේ.
ලේසර් මුද්රණ යන්ත්ර – කාර්යාලවල සහ නිවෙස්වල භාවිත කරන ලේසර් මුද්රණ යන්ත්ර, ටෝනර් කුඩු කඩදාසිය මතට ඇඳීම සඳහා ලේසර් කිරණ යොදා ගනී.
- ගබඩා කිරීමේ තාක්ෂණය
CD, DVD සහ Blu-ray – සංගත තැටි (CD), ඩිජිටල් වීඩියෝ තැටි (DVD) සහ බ්ලූ-රේ (Blu-ray) තැටිවල තොරතුරු කියවීමට සහ ලිවීමට ලේසර් කිරණ භාවිත වේ. Blu-ray තැටිවල තොරතුරු ගබඩා කිරීම සඳහා භාවිත කරන්නේ නිල්-වයලට් ලේසර් කිරණයි.
- මිනුම් සහ මට්ටම් කිරීම (Measurement)
ඉදිකිරීම් කර්මාන්තයේදී සහ භූමි මිනුම් කටයුතුවලදී, දුර ප්රමාණය සහ මට්ටම (Leveling) ඉතා නිරවද්යව මැනීම සඳහා ලේසර් මට්ටම් යන්ත්ර (Laser Levels) සහ දුර මැනීමේ උපකරණ භාවිත වේ.
ලේසර් තාක්ෂණය දැනටමත් අපගේ ජීවිතයේ ප්රබල කාර්යභාරයක් ඉටු කරන අතර, අනාගතයේදී මෙම යෙදීම් තව තවත් පුළුල් වනු ඇත. දේශගුණික විපර්යාස කළමනාකරණය, න්යෂ්ටික විලයන පර්යේෂණ සහ ගගන විද්යාව වැනි ක්ෂේත්රවල එහි දායකත්වය අතිමහත්ය. උදාහරණයක් ලෙස සූර්ය බලය පෘථිවියට සම්ප්රේෂණය කිරීමේ සිට අභ්යවකාශයේ සුන්බුන් ඉවත් කිරීම දක්වා ලේසර් තාක්ෂණයේ අනාගත යෙදීම් විහිදී යයි. එහි නිරවද්යතාව, කාර්යක්ෂමතාව සහ බහුකාර්යතාව හේතුවෙන්, ලේසර් තාක්ෂණය නව්යකරණයන්හි ප්රධාන බලවේගයක් ලෙස අඛණ්ඩව ක්රියාත්මක වනු නිසැකය.
අන්තර්ජාලය ඇසුරෙනි
Leave feedback about this