දෑස නැතැත් ජීවිතය දිනන ඇය

මග හොඳට තිබේ නම්… යන්න දෑසත් ඇත්නම්.. මං මුලා වූන් සේ බැදිවල යා යුතු නැහැ. දෑස නොපෙනන නමුත් යා යුතු මග නොමග තෝරා බේරා ගෙන තමන්ගේ ජීවිතය ගොඩ නගා ගත් ඇය දිලානි සඳමාලි. ඇය උපතේ පටන්ම දෘශ්‍යාබාධිතයි. කළුතර හල්කඳවල විද්‍යාලයෙන් කලා අංශයෙන් අධ්‍යයන පොදු සහතික පත්‍ර උසස් පෙළ සමත් වෙලා ජයවර්ධනපුර විශ්ව විද්‍යාලයට ඇතුලත් වුන දිලානි කැළණිය විශ්ව විද්‍යාලයේ දෘශ්‍යාබාධිත අයට පරිගණක විද්‍යාව උගන්වන උපදේශිකාවක් විදිහට කටයුතු කළා.

කොහොමද විශ්ව විද්‍යාල ජීවිතය..

සමාජයේදී අපට හැම දෙනෙක්ම උදව් කරනවා. ඒ වුනත් යම් සීමාවක් තිබෙනවා. අපි කා මතවත් යැපෙන්න අවශ්‍ය නැහැ. අපි වගේ දෘශ්‍යාබාධිත අයත් ස්වාධීනව ජීවත් වෙන්න ඕන. ආර් ථික වශයෙන් වුනත් අපිට හයියක් ඕන. ඒ නිසා දෘශ්‍යාබාධිත අය වෙනුවෙන් මම වෙනම ව්‍යාපෘතියක් පටන් ගත්තා. ඇත්තෙන්ම මට රැකියාවක් ලබා ගැනීම එතරම් අපහසු නැහැ. නමුත් මං වගේම තවත් දෘශ්‍යාබාධිත පිරිසක් අපි සමග ජීවත් වෙනවා.

ඉතින් ඔබේ යොමු වීම ගැනත් කිව්වොත්..

මම vision lanka නමින් ආයතනයක් පටන් ගත්තා. දැන් මේ ආයතනය ආරම්භ කරලා වසර දෙකක් වෙනවා. පානදුර පරණ පාරේ අපේ ආයතනය පිහිටා තිබෙනවා. අපි ආයතනය පටන් ගත්තේ එක් සේවිකාවක්ගෙන් . දැන් නිෂ්පාදන අංශයේ සේවකයන් අට දෙනෙක් ඉන්නවා. අලෙවි අංශයේ 15 දෙනෙක් ඉන්නවා. මෙතැන විශේෂත්වය තමයි නිෂ්පාදන කාර්යයයේ පටන් අලෙවිය දක්වා වූ සියලුම අංශවල කටයුතු දෘශ්‍යාබාධිත අය අතින් සිදුවීම.
ඔබේ නිෂ්පාදන ගැනත් කිව්වොත්..

අපි මුලින්ම හඳුන්කුරු නිෂ්පාදනය පටන් ගත්තා. මේ ආයතනයේ තිබෙන විශේෂත්වය නම් අපට සම්බන්ධ හැම දෙනෙක්ම දෘශ්‍යාබාධිතයි. නමුත් අපි ඒ අඩුව මුල් කර ගෙන සමාජයෙන් හුදෙකලා වෙන්නේ නැහැ. මුලින්ම පටන් ගත්තේ හඳුන්කූරු නිෂ්පාදනය කරන්න. මේ වෙනුවෙන් ස්වභාවික අමුද්‍රව්‍ය භාවිතා කරනවා. මේ පැකට් එකක මිල වශයෙන් රුපියල් 30, 50, 100 සහ 120 විදිහට විවිධ මිල ගණන් නියම කර තිබෙනවා.

හඳුන්කුරු මතම සීමා වුනේ නැහැ නේද..?

ඔව්… මම එතැනම නැවතුනේ නැහැ. ඊට පසුව ඉටිපන්දම්, පහන්තිර වගේ තවත් දේවල් නිෂ්පාදනය කරන්න පටන් ගත්තා. මේ විදිහට අපේ vision lanka නිෂ්පාදන විවිධාංගිකරණය වුණා.
අපේ තවත් බලාපොරොත්තුවක් තිබෙනවා. මේ නිෂ්පාදන අතරට සබන් නිෂ්පාදනයත් එකතු කරන්න. නමුත් ඒ වෙනුවෙන් මුල්‍ය ප්‍රතිපාදන තවම අපට නැහැ. ඉදිරියේදී vision lanka වෙතින් සබන් කැටයකුත් එකතු වේවි.

ඔබේ නිෂ්පාදන අලෙවි කර ගන්නේ..

ඔව්.. අපේ නිෂ්පාදන වෙනුවෙන් ඉල්ලුමක් තිබෙනවා. අපි ජංගම විදිහට අලෙවිසැල් පවත්වනවා. බෙල්ලන්විල වගේ විහාරස්ථාන අසල අපි අලෙවිසැල් පවත්වනවා. සාමාන්‍යයෙන් අපි මොරටුව , පානදුර අතර අපේ නිෂ්පාදන අලෙවිය සිදු කරනවා. මේ නිෂ්පාදන අපෙන් අරගෙන තමන්ටත් ලාභයක් තබා ගෙන අලෙවි කිරීමට කැමත්තක් දක්වන අය සිටිනවා නම් 077 33 55 117 වට්ස්ඇප් අංකයෙන් සම්බන්ධ වෙන්න පුළුවන්.

සමාජයෙන් යම් දායකත්වයක් ලබා දෙන්න පුළුවන් වුනොත් ඔබ බලාපොරොත්තු වෙන්නේ මොනවාද..?

අපට පහන්තිර වෙනුවෙන් අවශ්‍ය අමුද්‍රව්‍ය විදිහට ගැනෙන රෙදි නොමිලයේ ලබා දෙන්න පුළුවන් කෙනෙක් හෝ ආයතනයක් සිටිනවා නම් හොඳයි. ඇගළුම් කම්හල්වල්වලින් විශාල වශයෙන් කැපෙන රෙදි ඉවත දමනවා. ඒ වගේ ඉවත දමන රෙදි කැබලි අපට ලබා දෙනවා නම් ලොකු උදව්වක්.
ඒ විතරක් නොවෙයි, අද හැම නිවසකම පහන් පත්තු කරනවා. වාහනවල වුනත් හඳුන්කුරු දල්වනවා. මේ වගේ කටයුතුවලදී අපෙන් මිළදී ගන්නවා නම් ඒක ලොකු පිනක්. අපටත් උදව්වක්.

අපේ සමාජය විශේෂ අවශ්‍යතා ඇති අයට අනුකම්පා කරනවා. ඔවුන් සමාජගත කරන්න උනන්දු නැහැ. ඇත්තටම අපට අවශ්‍ය අනුකම්පාව නොවෙයි. අපිත් සාමාන්‍ය අය වගේම ස්වාධීනව ජීවත් වෙන්න ඕන. මානසික වගේම ආර්ථික මටට්ම දියුනු කරලා ඔවුන් සවිබල ගැන්වීම අපේ ආයතනයේ අරමුණ බව සඳහන් කරන්න ඕන.
එහෙමනම් අත්, පය, ඇස්, කන් හොඳින් තිබියදීත් අනුන් මත යැපෙන සමාජයටවත් ..තමන්ටවත් වැඩක් නැතුව කාලය ගෙවන පුද්ගලයන් අතර නොපෙනෙන ඇස් දෙකෙන් ලෝකය දකින දිලානි සඳමාලි වැනි දිරිය දියණියන් සැබැවින්ම ලෝකයටම ආදර්ශයක්… ඒ වගේම ආශිර්වාදයක්..

ඇස් නොපෙනෙන අය ගැන සමාජයේ වැඩි අවධානයක් දක්වන බව පිටතින් දකින අප හිතනවා. ඔවුන්ගේ ජීවිතයට හයියක් වෙන්න බාහිර පුද්ගලයන්ට යම් තාක් දුරට හැකියාවක් තිබුනත් එය සර්ව සම්පූර්ණයෙන්ම ඉටු වෙන දෙයක් නොවෙයි. ඒ නිසාම ඔවුන් තමන්ගේ ජීවිතයේ හයිය සොයා ගෙන යනවා. ඒ විදිහට ඇසින් නොදකින ආලෝකය තමන්ගේ ස්වාධීනතාවයෙන් ජීවිතයට උපයා ගත් ඇය ගැන මේ කථාව අපි කාගෙත් ජීවිතයට විශේෂ පන්නරයක් ලබා දෙනු ඇති.

සටහන

පුන්‍යා චාන්දනී ද සිල්වා