පුංචි දරුවෙකුගේ උපත කියන්නේ කාන්තාවකගේ ජීවිතයේ උඩු යටිකුරු කරන අත්දැකීමක්. ශාරීරිකව සිදුවන වෙනස්කම්වලට අමතරව එදිනෙදා ජීවිතයට ඇතිවන වෙනස්කම් ද බොහෝමයි. වෙනදා නැති සතුටක්, උද්යෝගයක් වගේම ඒ සියල්ලටම වඩා වෙනදා අත්නොවිඳි ආකාරයේ කලබලකාරී බවක් ජීවිතේට එකතු වෙනවා. ප්‍රමාදයකින් තොරව වගකීමක් සහිතව දරුවා වෙනුවෙන් කළයුතු රාජකාරි බොහෝමයි. ඇත්තම කිව්වොත් අම්මට තමන්වම අමතක වෙන අවස්ථාවක් තමයි මේ. ඒක හරිම ස්වභාවිකයි. නමුත් අම්මගේ මේ කලබලකාරී ජීවන රටාව දිගින් දිගටම ක්‍රියාත්මක වුණොත් තමාගේ සහ පවුලේ අන් අයගේ ජීවිත කෙරෙහි එය කුමන ආකරයේ බලපෑමක් වේවිද? එම නිසා මේ අලුත් වෙනස තමාගේ එදිනෙදා පුරුදු ජීවන කතාවට ගලපගන්න ඇත්තටම අම්මා කෙනෙක් දක්ෂ වෙන්න ඕනේ. එහෙම නොවුනොත් පවුල් ජීවිතය තුළ ඔබ නොසිතන ආකාරයේ ගැටලු බොහොමයක් ඇතිවීමේ ඉඩකඩ තිබෙනවා. ඒ නිසා අලුත උපන් දරුවන් සිටින මව්වරු පහත කාරණා පිළිබඳව සැලකිලිමත් වීම අත්‍යවශ්‍යයි.
අලුත උපන් දරුවෙකු රැකබලා ගන්නා මවකට තමාගේ කායික මානසික යහපැවැත්ම සඳහා ප්‍රමාණවත් නින්දක්, නිසි පෝෂණය, අවශ්‍ය ප්‍රමාණයට ජලය පානය කිරීම, සරල ව්‍යායාම සිදුකිරීම ආදිය වැදගත්. එසේම දරු ප්‍රසූතියෙන් පසුව ඔබ තුළ සිදු වන හෝමෝන වෙනස්කම් නිසා ඇතිවන සියුම් ශාරීරික හා මානසික වෙනස්කම් වලට මුහුණ දීම සඳහා වෛද්‍ය උපදේශ වගේම ඔබෙත් දරුවාගේත් වැඩකටයුතු සිදුකර ගැනීම සඳහා ස්වාමි පුරුෂයාගේත් නිවසේ අන් අයගේත් සහයෝගය ලබාගැනීමට මැලි වන්න එපා. තමාගේ කායික පිරිසිදු බව සහ පෙර පරිදි ඔබ, ඔබේ රූපසොබවය පවත්වා ගැනීම වෙනුවෙන් කළ දේ නැවත ආරම්භ කිරීමත් වැදගත්. සැබැවින්ම ප්‍රසූතියෙන් පසු ශරීරයේ සිදුවන වෙනස්කම් නිසා පෙරටත් වඩා ඔබ, ඔබේ රූප ස්වභාව පිළිබඳව දැන් සැලකිලිමත් විය යුතුයි.
මවක්, දියණියක්, භාර්යාවක්, සහෝදරියක් වේවා ඔබේ සමාජ කාර්යභාරය කෙසේ වුවත් ඔබ තුළ පණ ගැහෙන්නේ සුන්දර ස්ත්‍රී ආත්මයකි. කාන්තාවක් යනු කවදත් පාහේ ආකර්ෂණශීලී ලෙස අඳින්නට, පළඳින්නට, හැසිරෙන්නට, කතාබහ කරන්නට වඩාත් ආශා කරන, කැඩපතක් දුටු තැන තමාගේ රුව වරක් දෙවරක් නොව සියවරක් දකින්නට ඇලුම් කරන, විලාසිතා ආරච්චි බෝරිච්චි වලට නොතිත් ආශාවක් දක්වන, පිරිමින්ට කිසිදා අවබෝධ කර කරගත නොහැකි ළද බොළද ආශාවන් ගොන්නකින් පිරි සොඳුරු ආත්මයකි. ඔබ ද මවක් වුවත් ස්ත්‍රීත්වයට හිමි ඒ සොඳුරු විශේෂ ගුණාංග සහිත අයෙකි. ඒ නිසා, අන් අය වෙනුවෙන් පමණක් නොවේ ඔබට ඔබවම ප්‍රසන්නව ආකර්ෂණශීලී දැක ගැනීම සඳහා පෙර කළ කී සියලු විලාසිතාවන් මවක් වූ පසුත් පවත්වා ගැනීමේ කිසිදු වරදක් නැත. වරද වන්නේ එසේ නොකළ හොත් ය.
මවගේ චරිතයත්, භාර්යාවගේ චරිතයත් ය යන අවස්ථා දෙකම සමබරව පවත්වාගෙන යාම කෙතරම් අභියෝගයක් වුවත් ඔබේත් සැමියාගේත් විවාහ දිවියේ ප්‍රබලතම අඩිතාලම වන්නෙ කායික සබඳතාවයයි. දරුවාගේ වැඩ කටයුතු වලට පමණක් ඔබ සම්පූර්ණ අවධානය යොමු කළහොත් පෙර ඔබ දෙදෙනා ගත කළ සොඳුරු ප්‍රේමනීය අවස්තා මඟහැරී යෑම සිදුවිය හැකියි. ඒ නිසා දරුවා බලාගැනීම සඳහා දෙමව්පියන්ගේ නෑදෑයින්ගේ හෝ මිතුරන්ගේ සහයෝගය ලබාගෙන, තරමක නිදහස් කාලයක් ඔබ දෙදෙනා වෙනුවෙන් වෙන් කර ගැනීමට උනන්දු වන්න. අත් නොහැර, මග නොහැර විවාහ දිවියේ සුන්දරත්වය තවදුරටත් පෙර සේ විඳගන්න.
Leave feedback about this