ආසියානු සමාජයේ පවතින පුරුෂාධිපත්‍ය තුළ තවමත් පියා පවුලේ මුලිකයා . බිරිඳ සහ දරුවන් ඔහු යටතේ සිටින චරිත එක වහලක් යට ජීවත්වුනත් මේ පුංචි සමාජය පිතෘ මූලිකයි. අද දවසේ නම් බොහෝ මව්වරු රැකියාවන්හි නිරත නිසා ඔවුනුත් පවුල වෙනුවෙන් යම් ආදායමක් උපයනවා. ඒ වුනත් මහපොළව සමග ජීවත්වුන කෘෂිකාර්මික ජීවන රටාවේදී පියා පවුලේ ප්‍රධානියා වුනත් නිවස, දරුවන් මුල් කර ගත් වැඩ කටයුතු පමණක් නොවෙයි, කුඹුරේ දවස ගෙවන…හේනේ පැල් රකින සැමියාට අහර පිසිම, රැගෙන යෑම අස්වනු නෙලන කාලයේදී ඒ වෙනුවෙන් දායකත්වය ලබා දීම බිරිඳ හෙවත් පවුලේ අම්මාගේ දායකත්වයෙන් සිදු වුනා. නමුත් කොතැනකවත් කුඹුරේ සිට නිවසට ගෙනෙන අස්වැන්නේ අම්මාගේ දහඩිය රැඳිලා තිබෙන බව පවුලේ කිසිම කෙනක් දන්නේ නැහැ.
ගමට කලින් හිරු මුළුතැන් ගෙට වඩිනා… කියන්නා වගේම අද අම්මා පවුලේ බොහොම කාර්යබහුල චරිතයක්. ඇය රැකියාව කරන අතර නිවස, දරුවන් සැමියා මුල් කර ගෙන සියලු කටයුතු ඉටු කරනවා. පවුලේ තාත්තා රැකියාවේ පැය අටක රාජකාරිය සිදු කළත් අම්මා පැය අටේ රාජකාරියෙන් පසුව නිවසේ රාජකාරිය පටන් ගන්නවා. ඒවා ඇය කරන්නේ බොහොම සතුටින්. අම්මා නිදාගන්නේ පවුලේ හැම දෙනාම නිදා ගත්තාට පසුවයි. මුලින් කී ගීතයේ වගේ ඇය අවදි වෙන්නේ හැම දෙනාම කලින්. අපි හිතන්නේ ආසියානු කාන්තාවන් නිවසේ වැඩ කටයුතුවලදී ඇප කැප වී වැඩ කළත් බටහිර ලෝකයේ අම්මා කියන චරිතය සහ දරුවන් අතර බැඳීමක් නැහැ කියල වුනත් ඒ රටවලත් රාත්‍රියට දරුවා අඬන විට නැගිටින්නේ අම්මා. තාත්තාට ඒ වගකීම නැහැ. තාත්තා බොහොම නිදහස් මානසිකත්වයක චරිතයක්. රාත්‍රියේ නින්දට ගියත් අම්මා හිතෙන් හෙට දවස සැලසුම් කරනවා. හෙට උදේට දරුවන්ට කන්න හදන දේ…රැකියාවට යන සැමියාට…සමහර විට නිවසේ සිටින වියපත් මව..පියා..නැන්දම්මා..මාමා.. මේ සියළු දෙනාගේම ඕනෑ එපාකම් ගැන ඇය සැලසුම් සකස් කරන්න ඕන.
තරුණයෙක් තමන්ගේ සහකාරිය විදිහට කාන්තාවක් තෝරා ගත් විට ඇය මෙහෙකාරිය බවට සහ දරුවන් නිර්මානය කරන මැෂිමක් බවට පත් කළ යුතු නැහැ. දරුවන් නිර්මානයට දෙදෙනාගේම දායකත්වය ලැබෙනවා නම් දරුවන් හදා වඩා ගැනීමේදීත් මව සහ පියා යන දෙදෙනාම දායකත්වය වැදගත්. පවුලක පියා වැදගත් චරිතයක් බවට පත් වෙන විට අම්මා නිවසේ මෙහෙකාරිය බවට පත් වෙනවා. ඇය මෙහෙකාරිය බවට පත් කරන්නේ සැමියා විසින්මයි. අම්මා කියන්නේ හැඳිමිටේ නුවණ ඇති දරුවන්ට බත පිසින කාන්තාවක් පමණක් නොවෙයි, ඇයටත් දරුවන්ගේ අනාගතය ගොඩ නැගීමේදී සුවිශේෂී දායකත්වයක් ලැබෙන බව අමතක කරන්න එපා. ලෝකය ගැන ඇසූ පිරූ තැන් ඇත්තේ තාත්තාට පමණක් නොවෙයි. අම්මාටත් ජීවිතය නැමැති තක්සලාවෙන් ලැබෙන අත්දැකීම් තිබෙනවා. සමහර විට අම්මාගේ නමේ අගට උපාධි නැති වෙන්න පුලුවන්. ඇය මනෝවිද්‍යාව නොදන්නවා විය හැකියි. ඒ වුනත් දරුවන් ලෝකයට බරක් නැතිව හදන සාස්තරය ඇය දන්නවා.
තොටිල්ල පදවන හස්තය ලෝකයක් පාලනය කිරීම පමණක් නොවෙයි, විශ්වයම ජයගෙන කිව්වොත් නිවරැදියි. මේ වෙනුවෙන් බොහෝ උදාහරණ තිබෙනවා. ලෝකයේ ප්‍රථම අගමැතිනිය සිරිමාවෝ බණ්ඩාරනායක, ඉන්දියාවේ ඉන්දිරා ගාන්ධි, ජර්මනියේ ඇන්ජලා මර්කල් වැනි දේශපාලනයේ කිර්තිමත් චරිත…ඒ විතරක් නොවෙයි, නාසා ආයතනයේ අභ්‍යවකාශ නැවතුමේපොලේ පවා කාන්තාවන් සිය සේවා දායකත්වය ලබා දෙනවා. දේශපාලනය, කලාව, තාක්ෂනය, ක්‍රිඩාව යන හැම තැනදීම කාන්තාව බබලන චරිතයක් බවට පත් වුනත් නිවසේදී ඇය සාමාන්‍ය කාන්තාවක් විතරයි. ඇගේ හැකියාවන්ට කිසිම ඇගයිමක් නැහැ. දරුවන් වුනත් හිතන්නේ පවුලට ආර්ථික දායකත්වය ලැබෙන්නේ තාත්තාගෙන් පමණක් බවයි. සැමියා දරුවන්ට ලබා දෙන ආකල්පය වෙන්නෙත් මම හම්බ කරන දෙය අම්මා වැය කරනවා. දරුවන්ට ලබා දෙන සියලු සැප සම්පත් තාත්තාගේ මහිමයෙන් ලැබෙනවා මිසක ලැබෙන මුදලින් අම්මා සපයන මෙහෙය ගැන කිසිම ඇගයීමක් නැහැ.
තාත්තාගේ හාස්කමෙන් පවුල ආරක්ෂා වුනත් හදිසියේ හෝ නොසිතු විපතක් සිදු වුනොත් පවුලේ බර අම්මා කරට ගන්නවා. කොකාගේ සුද පෙනෙන්නේ ඉගිලෙන විට කියන්නා වගේ අම්මා තමන්ගේ වර්ණ පෙන්වන්නේ එතකොටයි. අද බොහෝ චරිතාපදාන කියවන විට මෙවැනි දිරිය මව්වරුන් ගැන ඔබට අසන්න ලැබෙනවා ඇති.
දරුවන් සුමගට යොමු කිරීම අම්මාගේ දායකත්වයෙන් සිදු වෙනවා. නමුත් අපි නොදන්නා සහ නොදකින හේතු නිසා අම්මාගේ මග පෙන්වීමක් නොමැතිව හැදෙන වැඩෙන දරුවන් සිටිනවා. එවැනි අවස්ථාවලදි දරුවාගේ අතීත පසුබිම නොදැනම දොස් නගන්නේ අම්මාට පමණයි. සමහර විට මෙතැන අම්මා එක් හේතුවක් වෙන්න පුලුවන්. ඊටවඩා ප්‍රබල හේතු ගණනාවක් තිබෙන්න පුලුවන්. නමුත් චෝදනාව එල්ල කරන්නේ අම්මාට පමණයි.
පවුලක් තුළ අම්මා කියන චරිතය විශිෂ්ටයි. පවුලක මවක් විසින් දරණ කාර්යභාරය නිසාම ඒ පවුලට ආලෝකයක් ලැබෙනවා. මවකගේ ගුණ ගායනය වචනයෙන් විස්තර කිරීම පවා අපහසුයි. පවුලේ දියුනුවට මව සහ පියා යන දෙදෙනාගේම සහජීවනය අවශ්‍ය වෙනවා. ඔවුනොවුන් අතර ගොඩ නැගෙන සහසම්බන්ධතාවය තරම් ආශිර්වාදයක් පවුලකට තවත් නැති බව කිව්වොත් නිවරැදියි.
Leave feedback about this