මිනිසා යනු කෙතරම් විශිෂ්ට ජීවියෙකු වුවත් මිනිසත් බවේ උපරිම ඵල නෙළා ගන්නේ කායික මෙන්ම මානසික යහපැවැත්ම පවත්වා ගන්නා පුද්ගලයින්ට පමණි එහෙත් පහසුවෙන් ග්රහණය කරගත හැකි භෞතික ශරීරයේ නිරෝගීභාවය පිළිබඳව මිස මනස සහ එහි නිරෝගී පැවැත්ම පිළිබඳව මිනිසුන්ගේ දැනුවත්භාවය හා අවධානය ඉතා අවම මට්ටමක පවතී. මෙතෙක් මෙලොවට බිහි වූ ශාස්තෘන් වහන්සේලා ද අපරිමිත මානව දයාවකින් යුතුව ඒ පිළිබඳව දේශනා කළද එය ග්රහණය කරගත් පිරිස ඉතා අල්පය. කෙසේ වුවත් නූතන වෛද්‍ය විද්‍යාවේ මනෝ චිකිත්සනය මිනිසාගේ මෙම මානසික නිරෝගී භාවය වෙනුවෙන් නිර්මාණයවී ඇති සැලකිය යුතු මට්ටමේ දියුණු අවස්ථාවකි.
මූලික වශයෙන් යහපත් මානසික තත්ත්වයක සිටින පුද්ගලයන් තමා තමාට මෙන්ම අන් අයට ද ආදරය කරන අතර තම සමීපතයන් සමඟ මෙන්ම අනෙකුත් පරිබාහිර පාර්ශ්වයන් සමඟ ද මනා ලෙස සම්බන්ධතාවයන් පවත්වාගෙන යෑමට හැකි පුද්ගලයන් වේ. ඔවුන් තම හැඟීම් පාලනයට මෙන්ම ප්‍රකාශනයට දක්ෂ වන අතර විවිධ අභියෝග හමුවේ ඉදිරියට යෑමට හැකි ඔරොත්තු දීමේ හා දරාගැනීමේ හැකියාව සහිත අයයි. එසේම එවැනි පුද්ගලයන් සුබවාදී ආකල්ප සහිත වන අතර සමස්තයක් ලෙස සතුටින් සිටින සහ අන් අයට ද සතුටින් සිටීමට උපකාර කරන්නන් වේ. සහානුකම්පාව, කෘතවේදී භාවය, නිතර යමක් ඉගෙන ගැනීමට කැමති වීම, කරුණාවන්ත බව, තෘප්තිමත් භාවය වැනි ගුණාංග මෙවැනි අයගේ වචන හා ක්රියා වලින් පිළිබිඹු වේ.
කිසියම් පුද්ගලයෙකු නිතරම අත් විඳින්නේ දුක, ශෝකය, කනස්සල්ල, තරහව, බලාපොරොත්තු සුන් වූ මානසිකත්වය, වරදකාරී බව ආදී හැඟීම් නම් එවන් නොපහන් සිත් ඇතිව ඔබ දවසේ වැඩි කාලයක් ගත කරනවා නම් නැතහොත් නින්ද නොයන තරමට ඔබ ඔබේ සිතුවිලි නිසා විඩාවට පත් වී සිටී නම් ඔබ පසුවන්නේය යහපත් මානසික තත්ත්වයක නොවිය හැකියි. සාමාන්යයෙන් පහත ආකාරයේ අවස්ථාවල පසුවන පුද්ගලයන් බොහෝවිට මානසික සෞඛ්ය ගැටලුවලට මුහුණ දී සිටින අය විය හැකියි.
- පාලනය කරගත නොහැකි අනිසි බිය- රෝගයක් හෝ යම් කායික ගැටලුවක් පිළිබඳ හෝ ඇසුරු කිරීමට සිදුවන පුද්ගලයන් හෝ සමාජය පිළිබඳ මෙන්ම ජීවිතයේ එළඹෙන කඩඉම් සහ අභියෝගවලට මුහුණදීමට ඇති අනිසි බිය.
- තමා පිළිබඳව හෝ තමන්ගේ පරිබාහිර පුද්ගලයන් පිළිබඳව හෝ අනවශ්‍ය ලෙස ඇතිවන පාලනය කර ගත නොහැකි අධික කෝපය
- පවුල් ජීවිතය තුල හෝ තුළ හෝ සමාජ සම්බන්ධතාවල දී ඇතිවන ගැටලුකාරී තත්ත්වයක් නිසා ඇතිවන බලාපොරොත්තු සුන්වීම, වියෝව හෝ තීරණ ගැනීමේ නොහැකියාව පත්වීම
- දිගින් දිගටම ආර්ථික ගැටලු, සෞඛ්ය ගැටලු හෝ කාර්යබහුල තත්වයන්, ගෘහ ජීවිතයේ ගැටලු සහ කලක් තිස්සේ අධික පීඩනයක් සහිතව කාලය ගත කිරීම නිසා අඳුරු අසුබවාදී මානසික තත්ත්වයන්ට පත්වීම
- මානසික සෞඛ්ය වර්ධනය කිරීම – පුද්ගලයන්ට තම ගැටලුවල ස්වභාවය නිසි ලෙස අවබෝධ කර ගනිමින් තම මනස යම් පාලනයකට යොමු කර ගැනීමටත් තමාගේ ගැටලුවට විසඳුම් සෙවීම සඳහා පැහැදිලි මානසික මට්ටම මට්ටමක් නිර්මාණය කර ගැනීමටත් හැකියාව ලැබේ.
- අධික පීඩාවන් පාලනය කිරීම – එදිනෙදා ජීවිතයේ අධික කාර්යබහුලත්වය හෝ පවුල් ජීවිතය තුළ ඇතිවන ගැටලු නිසා ඇතිවන පීඩාවන් සහ සුළු මානසික විකෘති භාවයන් මග හරවා ගැනීමට මනෝ උපදේශනය උපකාරී වේ
- උසස් ක්‍රමවේද හඳුනා ගැනීමට හැකිවීම – මනසේ අසමතුලිත තාවයන් මගහරවා ගැනීම සඳහා යහපත් මානසික පුරුද, මනස සන්සුන් කරන අභ්‍යාස ආදිය හඳුනා ගැනීමට සහ ඉගෙන ගැනීමට මනෝ උපදේශනය උපකාරී වේ.
- ගතානුගතික වැරදි ප්‍රතිකාර ක්‍රම වලින් නිදහස් වීම – මානසික විපරීත තත්වයන් සුව කිරීම සඳහා අනවබෝධයෙන් සිදුකරන මිත්‍යා ප්‍රතිකාර ක්‍රම, පූජා විධි හා වැරදි ලෙස කරන දේව ඇදහිලි ආදියෙන් බැහැරව පිළිගත් ක්‍රමවේදයන්ට අනුකූලව ගත හැකි ප්‍රතිකාර ක්‍රමයක් ලෙස මනෝ උපදේශනය වැදගත් වේ.
- සුභවාදී මානසික තත්වයක් නිර්මාණය කර ගැනීම – ජීවිතේ නොයෙකුත් අභියෝග, හැරවුම් ලක්ෂ වලට හොඳින් මුහුණ දීමට හැකිවීම සහ යහපත් මානව සම්බන්ධතා පවත්වා ගැනීමට මෙන්ම තම රාජකාරී කටයුතු නිසි මානසික තත්වයක් යටතේ සිදුකර ගැනීමට හැකිවීමෙන් ජීවිතය සාර්ථක සාර්ථකත්වය සඳහා උපකාරී කරගත හැකි වීම.
මෙසේ සලකා බලන විට තමාට තමාව නිසිලෙස අවබෝධ කරගැනීමට මෙන්ම ජීවිතය පිළිබඳ යථාර්ථය සුබවාදී මනසකින් අවබෝධ කරගැනීමට උපකාරී වන මෙම මනෝ චිකිත්සනය මිනිස් දිවියේ සමස්ත යහපැවැත්ම වැඩිදියුණු කරගැනීම සඳහා භාවිත කළ හැකි පිළිගත් වෛද්‍ය විද්‍යානුකූල ආරක්ෂිත ප්‍රතිකාර ක්‍රමයකි.
Leave feedback about this