අනාගත ලෝකයේ වැඩියෙන්ම අලෙවි වන දේ ඔබේ දරුවාට ලබා දෙන්න

අද වන විට තාක්ෂණය නොමැතිව ජීවිතය පිළිබඳව සිතීමටවත් නොහැකි තත්ත්වයක් උද්ගතව ඇත. විශේෂයෙන්ම ක්‍රමෝපායිව වර්ධනය වන කෘත්‍රිම බුද්ධිය (AI) සහ තොරතුරු තාක්ෂණය නිසා දැනුම හා තොරතුරු යනු දැන් ඇඟිලි තුඩු මත තිබෙන පහසු දෙයක් පමණි. ඕනෑම කෙනෙකුට අන්තර්ජාලය හරහා ඉතා සුළු වේලාවකින් ලෝකය පුරා පැතිරුණු ඕනෑම විෂයයක් පිළිබඳව දැනුම ලබා ගැනීම හැකි යි. මෙම තත්ත්වය සමග අනාගත රැකියා වෙළඳපොලේ විශාල වෙනස්කම් සිදුවනු ඇති බව විශේෂඥයින් මත පල කරයි. ඒ අනුව බහුතරයක් රැකියා නැති වී යන බව හෝ නව රැකියා බිහිවනු ඇතැයි පැවසිය හැකි නමුත් සැබෑව නම් රැකියාවන් වෙනස් වීම නොව එම රැකියාවන් සඳහා අවශ්‍ය කුසලතා වෙනස්වීමයි.

AI සහ තොරතුරු තාක්ෂණය මඟින් සිදුවන වෙනස්කම්

මිනිසුන් කලින් කළ රැකියා බොහෝමයක් අද වන විට AI තාක්ෂණය මඟින් ස්වයංක්‍රීයව සිදු කරන බව දැක ගත හැක. උදාහරණයක් ලෙස ගණන් කිරීම, වාර්තා සැකසීම, දත්ත ගොනු කිරීම, දත්ත ඇතුළු කිරීම, ගිණුම් තැබීම වැනි කාර්යයන් AI මෘදුකාංග මඟින් ඉතා වේගයෙන් හා නිවැරදිව සිදු කළ හැකිය. ඒ හේතුවෙන් එවැනි සරල කාර්යයන් සඳහා මිනිසුන්ගේ අවශ්‍යතාවයක් නොමැති වන අනාගතයක් උදාවන බව පැවසිය හැක.

එය එසේ වුවත් මෙයින් සිදුවන සැබෑ වෙනස නම් මිනිසාගේ භූමිකාව යළි නිර්වචනය වීමයි. තොරතුරු මෙන්ම ඒවා විශ්ලේෂණය කර භාවිත කිරීම AI මඟින් දැන් සිදු කළ හැකි නිසා මිනිසුන් සඳහා වැදගත් වන්නේ එම තොරතුරු උපයෝගී කර ගැනීමේ හැකියාව සහ ඒ සඳහා වන නව මාර්ග සංවර්ධනය කිරීමයි.

නිර්මාණශීලීත්වය සහ විශ්ලේෂණාත්මක චින්තනයේ වැදගත්කම

මෙම තත්ත්වය තුළ කෘතිම බුද්ධියට අභියෝග කළ හැකි කුසලතා වැඩිදියුණු කිරීම අත්‍යවශ්‍ය වන අතරම ඒ අතරින් ප්‍රමුඛ වන්නේ නිර්මාණශීලීත්වය සහ විශ්ලේෂණාත්මක චින්තනය යි.

• නිර්මාණශීලීත්වය (Creativity)

නිර්මාණශීලීත්වය යනු නව අදහස්, විසඳුම් සහ සංකල්ප ගොඩනගා ගැනීමේ හැකියාවයි. AI යනු පවතින දත්ත මත සිදුවන ක්‍රියාවලියක් වන අතර එයට නව සංකල්ප ගොඩ නැංවීමේ හැකියාවක් නැත. මිනිසුන්ගේ නිර්මාණශීලීත්වය සහ නව නිර්මාණ ගොඩ නැංවීමේ හැකියාව අබිබවා යෑමට කෘතිම බුද්ධියට නොහැකි බැවින් දරුවන් තුළ නිර්මාණශීලී කුසලතාව වඩාත් දියුණු කළ යුතුය.

දරුවන් තුළ නිර්මාණශීලීත්වය වර්ධනය කළ යුත්තේ,

කලාව, සංගීතය, ලිවීම, චිත්‍ර ඇඳීම වැනි කේෂත්‍රයන් තුළ යෙදීමට ඔවුන්ට අවස්ථාව ලබා දෙමින් ඔවුන් තුළ උනන්දුව ඇති කරවීමෙනි.

• විශ්ලේෂණාත්මක චින්තනය (Critical Thinking)

විශ්ලේෂණාත්මක චින්තනය යනු නව තොරතුරු ලබාගනිමින් ඒවා සැලකිලිමත් ලෙස විමර්ශනය කර සැබෑව තීරණය කර ගැනීමේ හැකියාවයි. AI මඟින් දත්ත සැකසිය හැකි වුවද අදාල සන්දර්භය තුළ ඒවා භාවිත කර සැබෑ තීරණ ගැනීමේ හැකියාව ඇත්තේ මිනිසාට පමණි.

දරුවන් තුළ විශ්ලේෂණාත්මක චින්තනය වර්ධනය කළ යුත්තේ,

• පැරණි මතයන් අභියෝගයට ලක් කිරීමට දිරිමත් කිරීම
• නව තොරතුරු ගවේෂණය කර විමර්ශනය කර තීරණ ගන්නා ආකාරය පුහුණු කිරීම
• තොරතුරු වල සත්‍යතාවය පිරික්සීමට උනන්දු කිරීම
• අනාගතයට සුදානම් වන මාර්ග පිළිබඳව අවබෝධයක් ලබා දීම වැනි කරුණු හරහාය.

දරුවන්ගේ අනාගතය සුබවාදීව දකින්නට නම්

• අධ්‍යාපන ක්‍රමවේද වෙනස් කළ යුතුය – පාරම්පරිකව පැවත එන මතකයේ තැන්පත් කිරීමේ ආකාරය වෙනුවට නිර්මාණශීලීත්වය හා ප්‍රායෝගික අධ්‍යාපනයට වැඩි අවධානය යොමු කළ යුතුය.
• නව මෘදු කුසලතා (soft skills) වඩාත් පුහුණු කළ යුතුය – සන්නිවේදන හැකියාවන්, කණ්ඩායම් ක්‍රියාකාරකම්, මානව සබඳතාවන් පදනම් කරගත් දක්ෂතා වැඩි කළ යුතුය.
• දරුවන්ට ප්‍රයෝගික අත්දැකීම් ලබා දිය යුතුය – STEM (Science, Technology, Engineering, Mathematics) ක්ෂේත්‍රයන්ට පමණක් නොව කලාව සහ දරුවන් තුළ පීඩනයකින් තොරව ඉගෙනුම්වල යෙදිය හැකි විෂයයන් කෙරේද අභිප්‍රේරණයක් ඇති කළ යුතුය.
• නව තාක්ෂණ සමඟ එකඟව ජීවිතය ගත කිරීමට මාර්ග සෙවිය යුතුය – AI, Robotics, Data Science, Cording වැනි නව තාක්ෂණය භාවිත කර ඒවා සමඟ දරුවන්ට නව නිර්මාණයන් බිහි කිරීමේ අවස්ථාව ද ලබා දිය යුතුය.

AI සහ තොරතුරු තාක්ෂණය, ලෝකය සම්පූර්ණයෙන්ම වෙනස් කරමින් පවතී. නමුත් එය මිනිසාගේ පසුබැසීමක් වීමට හේතු නොවිය යුතුය. අපේ දරුවන් අනාගත රැකියා වෙළඳපොලට සූදානම් කිරීමට, ඔවුන් තුළ නිර්මාණශීලීත්වය සහ විශ්ලේෂණාත්මක චින්තනය වර්ධනය කර දීමට අවශ්‍ය වටපිටාව සකස් කිරීම අපගේ යුතුකමයි. 

සටහන

කේ.සී. සාරංග