මිනිසෙකුට හිමිවන ජීවිත කාලය ඉතාමත් කෙටි එකකි. එම කෙටි කාලය තුළ අප කෙතරම් නම් වගකීම් ඉටුකරනවාද? ළමා, තරුණ, මහලූ ලෙස බෙදාගත් අවධීන් තුනක් තුළ අප විසින්ම නියම කරගත් වැඩ කොටසක් ඉටු කිරීමට අප සියල්ලෝම උත්සහ ගනිති. මේ අතරින් තරුණ අවධිය යනු වැඩි කතාබහකට ලක්වන කාල පරාසයක් යැයි කීම නිවැරදිය. ජීවිතයට වැදගත්වන සංධිස්තාන රාශියක් එයට ඇතුළත්ය. උසස් අධ්‍යාපන කටයුතු, හොඳ රැකියාවක්, නිවසක්, වාහනයක්, විවාහයක්, දරුවන්, ලස්සන පවුල් ජීවිතයක් ඒ අතර තිබෙන ප්‍රධානම බලාපොරොත්තු බව අමුතුවෙන් පැවසීමක් අවශ්‍ය නොවේ.
විවාහයක් යනු ජීවිතේ නව ගමන් මගක හැරවුම් ලක්ෂයකට දමන අඩිතාලමක් යැයි කීම වඩා නිවැරදිය. නමුත් අද තරුණ වයසේ බොහෝ දෙනෙකුට තරමක සංකීර්ණ කාරණාවක් වන නිසාම මෙම විවාහය සම්බන්ධව තරමක විවෘතව ඔබට ඇමතීම මෙම ලිපියේ අරමුණයි. මෙම කාරණාවේදී අද වනවිට තත්ත්වය තරමක වෙනස් මුහුණුවරක් ගෙන ඇති බව කිව යුතුය. එයට හේතුව වර්තමානය වනවිට තරුණ පරපුරෙන් වැඩි පිරිසක් අවිවාහකව ජීවත් වීමේ වැඩි ප්‍රවණතාවයක් දක්නට ලැබීමයි. අතීතයේදී නම් වැඩිවිය පැමිණුන ගැහැණු දරුවන් දෙමාපියන් විසින් ගෙන එන යෝජනාවකට අනුව විවාහ කරදීම වැඩි වශයෙන් සිදුවිය. නමුත් දිනෙන් දින ඉදිරියට යන ලෝකය තුළ එකී තත්ත්වය සතුටුදායක මට්ටමකින් වෙනස් හැඩයන් ගෙන ඇත. තමන්ට ගැලපෙන සහකරු හෝ සහකාරිය සොයාගැනීමේ හෝ තෝරාගැනීමේ අවස්ථාව බොහෝ විට ඔවුන්ටම හිමිවේ.
නමුත් මෙවන් සමාජ පරිසරයක් තුළ වුවත් තරුණ පරපුර විවාහය මගහරින්නට හා ඔවුන්ට විවාහය අත්හැරෙන්නට හේතු බොහොමයක් සමාජීය වශයෙන් දැක ගැනීමට ලැබේ. වර්තමානය වනවිට පුරුෂ පාර්ශවය මෙන්ම කාන්තා පාර්ශවය ද අධ්‍යාපනික වශයෙන් මෙන්ම වෘත්තීමය වශයෙන් ඒවායේ හිනි පෙත්තටම ගමන් කිරීම, එහිදී හමුවන අභියෝග ජය ගැනීමට මුලිකත්වය දීම, තරගකාරී අධ්‍යාපන රටාව, උසස් රැකියාවක් ලබා ගැනීම, ඉන් නොනැවතී රැකියාවේ උසස්වීම් වෙනුවෙන් කටයුතු කිරීම වැනි සමාජීය තත්ත්වයන් හඳුනාගත හැකිය. මෙවැනි කාරණා රාශියක බලපෑමෙන් ඔවුන්ට නොදැනුවත්වම කාලය ගතව යනවා සේම එකක් පසුපස එකක් ඉලක්ක වෙත හඹා යෑමේදී විවාහය පිළිබඳ තැකීමක් නොකිරීම මීට හේතු ලෙස දැකිය හැක. සියලුම අධ්‍යාත්මික හා භෞතික සාධක සම්පූර්ණ වන තෙක් ඔවුන් බොහෝ දෙනා විවාහය කල් දමන නමුත් අවසානයේ තමන්ගේ ඉලක්ක සපුරාගෙන ජීවිතය දෙස හැරී බලන විට විවාහය ඔවුන්ගේ සිතින්, මනසින් මෙන්ම වයසින් පවා බොහෝ දුර ගොස් හමාරය.
නමුත් එවැනි විටක සිතින් පසුතැවීම අනවශ්‍යය. සමාජය හෝ තම පවුල ඒ පිළිබඳව දරණ අදහස තරමක වෙනස් එකක් වුවත් ඒ ගැන සිතමින් දුක්වීමෙන් පලක් නැත. බොහෝ විට අවිවාහක කාන්තාවන් විවාහක තම මිතුරියන්ගේ පවුල් දැක ඔවුන් කෙතරම් සතුටින්ද යැයි සිතා තම සිත රිද්දා ගන්නා බව සමාජයේ මතයකි. විවාහ නොවූ පිරිමින්ට වඩා කාන්තාවන් ඊර්ශ්‍යාව පිරුණු අය බව තවත් මතයකි. නමුත් තමා විවාහ නොවීම ගැන සිතමින් එලෙස සිතට පීඩා ගෙන දීම අර්ථ ශුන්‍ය ක්‍රියාවක් බව තේරුම්ගත යුතුය. විවාහ වීම ජීවිතය සම්පූර්ණ කරවීමක් හෝ විවාහ නොවීම ජීවිතය අසාර්ථක වීමක් ලෙස කිසිවිටකත් නොසිතන්න. විවාහ ජීවිතය සුන්දර එකක් යැයි ඔබ සිතූ නමුත් විවාහ වූවන්ගේ කතාව ඉන් බොහෝ සංකීර්ණ එකක් විය හැකිය. විවාහය නිසා සතුටින් යැයි ඔබ සිතන බොහෝ කාන්තාවන් දරුවන්ගේ වැඩ, සැමියගේ වැඩකටයුතු නිසා හෙම්බත්ව සිටිනවා විය හැකිය. ඇයගේ නිදහස පවා සීමා සහිතය. තීරණ ගැනීම පවුල මත රඳා පවතින්නකි. නමුත් ඔබ ඉන් වෙනස්ය. නිදහස්ය. අර්ථවත් යමකට යොදවන්න.
වඩා වැදගත් වන්නේ ආත්ම විශ්වාසය ගොඩ නගා ගැනීමයි. එලෙසම යමක් හිමි වන විට තවත් යමක් අහිමි වීම ලෝක ස්වභාවය බව සෑමවිටම තේරුම්ගන්න. ශක්තිමත්ව ජීවිතයට මුහුණ දෙන්න. මැදිහත් ලෙසින් ජීවිතය දෙස බලන්න. ආගමානුකූලව ජීවත්වන්න. ඊර්ෂ්‍යාව ජීවිතයෙන් ඉවත් කර සුහදශීලී බව වර්ධනය කරගන්න. අන් අයට උදව් කරන්න. මිනිසත්කම පිරුණ අයෙක් වෙන්න. එය නිසැකවම ඔබට සුන්දර ජීවිතයක් උරුමකර දෙනු ඇත.
Leave feedback about this