යොවුන් විය කියන්නේ ජීවිතයේ වැදගත් අවධියක්. මේ කාලය තුළ දරුවන්ගේ සිතිවිලි, හැසිරීම්, පුරුදු, සිහින සහ අනාගත සැලසුම් වර්ධනය වෙයි. එම නිසා ඔවුන්ගේ කාමරය ඔවුන්ට ගැලපෙන අන්දමට සැලසුම් කිරීම ඉතාම වැදගත් වේ. නිවසේ කාමරය යනු නව යොවුන්වරුන්ට පෞද්ගලිකත්වය, නිශ්චලතාවය සහ නිදහස ලබාදිය හැකි ස්ථානයක් විය යුතුය. එය ඔවුන්ගේ පුද්ගලික අවකාශය වන අතර ඔවුන්ගේ හැඟීම් සහ සිතිවිලි විකාශනය කරන ස්ථානයක්ද වේ.
යොවුන් වියේ දරුවන්ගේ කාමරය ඔවුන්ගේ ආකල්ප, ශික්ෂණ ක්‍රියාවලිය සහ හැසිරීම් බලපාන තැනක් විය හැකිය. නිසි අයුරින් සැලසුම් කරන ලද කාමරයක් ඔවුන්ගේ උගත්තාත්මක දියුණුව, නිවැරදි කාලය කළමනාකරණය කිරීම සහ මනෝසමාධි වර්ධනය කිරීමට උපකාරී වේ. කාමරය සරල, සාමකාමී හා හරිත පරිසරයක් ඇති අයුරින් සැලසුම් කරන්නේ නම් එය දරුවන්ට සිතිවිලි මධ්‍යගත කිරීමට හා නිවැරදි ලෙස ජීවිතය ගත කිරීමට අත්‍යවශ්‍ය වේ.
කාමරය සඳහා වර්ණ තෝරාගැනීම දරුවන්ගේ සිත හා හැසිරීමේ පුරුදු හැඩගැස්වීමේ වැදගත් සාධකයකි. සාමකාමී සහ සන්සුන් වටපිටාවක් සෑදීමට නිල් සහ හරිත වර්ණ තෝරා ගත හැකි අතර එවැනි වර්ණ මගින් මනස තුළ සන්සුන් බව වැඩි කරයි. කහ සහ ලා පැහැ වර්ණ ශක්තිමත් බව හා සාර්ථකත්වය ඇති කරන බව කියැවේ. එසේම දරුවන්ට ඔවුන් කැමති වර්ණ තෝරා ගැනීමට අවස්ථාව ලබාදීම තුළින් ඔවුන්ගේ නිදහස හා පුද්ගලිකත්වය ආරක්ෂා කරයි.
යොවුන් වියේ දරුවන්ට අනිවාර්යෙන්ම ඔවුන් කැමති චරිත, කලා ක්ෂේත්‍රය, ක්‍රීඩා පිළිබඳව කැමැත්තක් ආදරයක් ඇති විය හැක. ඒ නිසාම ඔවුන්ගේ රුචි අරුචිකම් මත කාමරය තුළට ගැළපෙන පෝස්ටර් සහ ජයාරූප යොදා ගැනීම මත දරුවන්ගේ ප්‍රේරණය වැඩි කරන අතර එමගින් ඔවුන්ගේ පුද්ගලික ආකල්ප නිරූපණය කිරීමටද එය වඩාත් උපකාරී වේ. කාමරය යනු දරුවෙකු නිදහසේ සිටින ස්ථානය යැයි පමණක් නොව ඔවුන්ගේ මනස තුළ ධනාත්මක සිතුවිලි උපද වන ඔවුන් අභිප්‍රේරණය කරවන ස්ථානය යැයි සිතා නිර්මාණය කළ යුතු තැනකි.
කාමරයක් තුළ ආලෝකය සහ වතාශ්‍රය මනා ලෙස ගමන් කළ යුතුය. එය ඉතාම වැදගත් වන අතරම ආලෝකය, අධ්‍යයනයේදී බොහෝ සෙයින් උපකාරී වේ. කාමරය අඳුරු වීම නිසා දරුවන්ගේ මනසේ නිරවුල් බව නිදහස් බව නැතිව යා හැකිය. එබැවින් දරුවාගේ කාමරයට හොඳ ආලෝකයක් මෙන්ම වාතාශ්‍රයක් ලැබෙන පරිදි ජනෙල් හා තිර රෙදි සැකසීම වැදගත් වේ.
කාමරය නිසි පරිදි සකස් කර තිබීම හා පරිසරය සුමටව පවත්වා ගැනීම, දරුවන්ගේ ධනාත්මක හැසිරීම් වර්ධනය කරයි. විශේෂයෙන්ම පොත්, ඇඳුම් සහ ක්‍රීඩා උපකරණ වෙන් වෙන්ව තැබීම දරුවන්ට යුරින් තම කාමරය පවත්වා ගැනීමටත් කාමරය තුළ පිරිසිදු බව ආරක්ෂා කර ගැනීමටත් හේතු වේ. දරුවන්ට අවශ්‍ය පරිදි කාමරය සරලව සකසා තිබීම මගින් අවශ්‍ය දේ ඉක්මනින් සොයා ගැනීමට, කාර්යයන් පහසු කිරීම මෙන්ම විවේකීව ගත කිරීමටත් අවස්ථාව සලසා දෙයි.
නව යොවුන් වියේ දරුවන්ට තමන්ගේ පුද්ගලිකත්වය ආරක්ෂා කර ගැනීම අත්‍යවශ්‍ය වේ. ඔවුන්ට තම කාමරය තමන් කැමති ආකාරයට සැකසීමට ඉඩදීම ඔවුන්ගේ චින්තන හැකියාව හා නිදහස වැඩි කරයි. විශේෂයෙන්ම, මවුපියන් ඔවුන්ගේ නිදහසට, පෞද්ගලිකත්වයට ගරු කිරීම අවශ්‍ය වේ. නමුත් අවශ්‍ය අවස්ථාවන්වලදී දෙමාපියන් දරුවාගේ කාර්යයන් පිළිබඳව සොයා බැලීම වැදගත් බවත් එය දරුවාට මානසික පීඩාවක් ගෙන නොදෙන පරිදි කළ යුතු බවත් මතක තබා ගන්න.
නව යොවුන් වියේ දරුවන්ට නියමිත කාලය තුළ අධ්‍යයනයට සහ විවේකයට යාමට ගැලපෙන ස්ථානයක් තිබිය යුතුය. මේ සඳහා කාමරය තුළ අධ්‍යයන මේසයක්, නිසි ආලෝකයක් තිබිය යුතුය. එසේම දරුවන්ට විවේකීව ගත කළ හැකි නිදහස් ස්ථානයක් ද තිබිය යුතුය.
නව යොවුන් වියේ දරුවාගේ කාමරය ඔවුන්ගේ පුද්ගලිකත්වය, අධ්‍යාපනය සඳහා අවැසි වටපිටාව මෙන්ම තම පෞද්ගලික නිදහස නිසි අයුරින් පවත්වා ගත හැකි ස්ථානයක් විය යුතුය. එම නිසා, වර්ණ, ආලෝකය, සංවිධානය, පුද්ගලිකත්වය සහ සරලකම ඇතුළත් අංග සියල්ල සැලකිල්ලට ගනිමින් කාමරයක් සැලසුම් කිරීම වැදගත් කාර්යයකි. මෙමගින් දරුවන්ගේ සතුට වගේම ආකල්පමය වර්ධනයක් ලබාදිය හැකි බව පැහැදිලි ය. එය එසේ වුවද අද වන විට අන්තර්ජාලය සහ ස්මාර්ට් දුරකතන, පරිගණක වැනි උපාංග හේතුවෙන් අධික නිදහස හමුවේ දරුවෙකු නොමග යාමට ඇති ඉඩ කඩ වැඩිය. ඔබේ දරුවා වෙනම කාමරයක නිදහසේ සිටියත් ඔබේ අවධානය ඔවුන් කෙරෙන් ඉවත් නොකිරීමට වගබලා ගත යුතුමය.
Leave feedback about this