වර්තමාන යුගයේ යොවුන් දරුවෙකුට ඩිජිටල් උපාංගයක් යනු හුදෙක් විනෝදාස්වාද මාර්ගයක් පමණක් නොව එය ඔවුන්ගේ සමාජ ජීවිතයේ, අධ්‍යාපනයේ සහ පෞද්ගලික අනන්‍යතාවයේ අත්‍යවශ්‍ය අංගයකි. ජංගම දුරකථන, ටැබ්ලට් පරිගණක සහ ලැප්ටොප් වැනි ඩිජිටල් උපාංග හරහා ඔවුන් ලෝකය සමඟ සම්බන්ධ වෙයි. එහෙත්, අධික හා අනිසි භාවිතය නිසා ශාරීරික මෙන්ම මානසික ගැටලු ඇතිවිය හැකිය.
දෙමාපියන් ලෙස අපේ භූමිකාව වන්නේ දරුවාගේ පෞද්ගලිකත්වයට හානි නොවන සේ, ඔවුන්ගේ ආරක්ෂාව සහ වගකීම සහතික කරමින්ම ඩිජිටල් ලෝකය සමඟ කටයුතු කිරීමට ඔවුන්ට මග පෙන්වීමයි. මේ සඳහා හොඳම විසඳුම වන්නේ විවෘත සංවාදයක් හරහා එකඟ වූ, විශ්වාසය මත පදනම් වූ පවුලේ ඩිජිටල් නීති මාලාවක් නිර්මාණය කිරීමයි. එනම් දරුවාගේ ස්වාධීනත්වයට හානි නොවන සේ සෞඛ්‍ය සම්පන්න ඩිජිටල් පුරුදු ගොඩනැගීමට උපකාරී වීමයි.
මෙම නීති මාලාව නිර්මාණය කිරීමේදී දෙමාපියන් මතක තබාගත යුතු ප්‍රධාන කරුණ වන්නේ දරුවා මේ ක්‍රියාවලියට සක්‍රීයව දායක කරගත යුතු බවයි.
නීති පැනවීම වෙනුවට, අපි හැමෝම අපේ තාක්ෂණික භාවිතය කළමනාකරණය කරගන්නේ කොහොමද? වැනි ප්‍රශ්නයකින් සංවාදය ආරම්භ කරන්න. නීති කඩ කිරීමේ ප්‍රතිවිපාක පවා දරුවා සමඟ සාකච්ඡා කර තීරණය කරන්න.
යොවුන් දරුවාගේ වයස සහ ඔවුන් දක්වන වගකීම් සහගත බව අනුව නීති ලිහිල් විය යුතුය. වයසින් වැඩි වන විට ඔවුන්ට වැඩි ස්වාධීනත්වයක් ලබා දීමට හැකි ලෙස නීති මාලාව සූදානම් විය යුතුය.
දරුවාට පනවන නීති දෙමාපියන් වන ඔබත් අනුගමනය කළ යුතුය. රාත්‍රී කෑම මේසයේදී ඔබ ඔබේ දුරකථනය පරීක්ෂා කරන්නේ නම්, දරුවාට එය කිරීම නවත්වන්නට අපහසුය.
ඩිජිටල් උපාංග භාවිතයට සීමා පැනවීම මූලිකම පියවරකි. මෙම සීමා පෞද්ගලිකත්වයට හානි නොවන, නමුත් ආරක්ෂාව සහතික කරන ආකාරයට සකස් කළ යුතුය.
නිවසේ සමහර ස්ථානවලට ඩිජිටල් උපාංග ගෙන ඒම තහනම් කරන්න. උදාහරණ ලෙස පවුලේ සියලුම සාමාජිකයන් කෑම මේසයේදී දුරකථන පසෙකින් තැබිය යුතුය. නිදන කාමරය ඉතාම වැදගත් නීතියකි. නිදිමතට බාධා වීම වැළැක්වීමට සහ රහසිගත සබැඳි ක්‍රියාකාරකම් අවම කිරීමට, දරුවාගේ දුරකථනය පොදු ස්ථානයක තැබිය යුතුය. එසේම පාඩම් කරන විට දුරකථනය ඉවත් කළ යුතුය.
පාසල් වේලාවෙන් පසු විනෝදාස්වාදය සඳහා උපාංග භාවිත කළ හැකි නිශ්චිත කාලයක් එනම් පාසල් දිනවල පැය 2ක් සහ සති අන්තයේ පැය 3ක් වශයෙන් හෝ දරුවා සමඟ එක්ව තීරණය කරන්න. ගෙදර වැඩ හෝ අධ්‍යයන කටයුතු සඳහා තාක්ෂණය අවශ්‍ය නම්, ඒ සඳහා වැය වන කාලය මෙම විනෝදාස්වාද කාල සීමාවට ඇතුළත් නොවන බව පැහැදිලි කරන්න.
යොවුන් දරුවන්ට ඩිජිටල් ලෝකයේදී ඇතිවිය හැකි අවදානම් ගැන ඉගැන්වීම සහ සදාචාරාත්මක මාර්ගෝපදේශ ලබා දීම අත්‍යවශ්‍යයි. කිසි විටෙකත් තම නිවසේ ලිපිනය, පාසලේ විස්තර හෝ පෞද්ගලික මුරපද ඔන්ලයින් නොදන්නා පුද්ගලයන් සමඟ බෙදා නොගත යුතු බවට පැහැදිලි නීති සකස් කරන්න.
සයිබර් සදාචාරය ගැන දරුවාට පහදා දෙන්න. සැමවිටම ගෞරවනීය විය යුතු බවත් අන් අයට හානි කරන, හිරිහැර කරන හෝ අපහාස කරන කිසිවක් ඔන්ලයින් පළ කිරීම හෝ යැවීම තහනම් කළ යුතුය. ඔබ කිසිවිටෙකත් මුහුණට නොකියන දෙයක්, ටයිප් කර යැවීමද නොකළ යුතුය යන උපදෙස දරුවාට අනිවාර්යෙන්ම ලබා දෙන්න. තවද අනිසි හෝ නුසුදුසු ඡායාරූප කිසි විටෙකත් යැවීම හෝ බෙදා හැරීම නොකළ යුතුය. එවැනි ඉල්ලීමක් ලැබුණහොත් වහාම දෙමාපියන්ට පැවසිය යුතු බවට විශ්වාසය ලබා දෙන්න. වයසට සුදුසු නොවන වෙබ් අඩවි, ක්‍රීඩා හෝ යෙදුම් භාවිතයෙන් වැළකිය යුතුය. දෙමාපියන්ගේ අවසරයකින් තොරව යෙදුම් බාගත කිරීම හෝ ස්ථාපනය කිරීම නොකළ යුතු බව දරුවාට දැනුම් දෙන්න.
දෙමාපිය අධීක්ෂණය දරුවාගේ පෞද්ගලිකත්වයට හානි කරන බවක් ඔවුන්ට නොදැනිය යුතුය. එය ආරක්ෂිත මායිමක් බවට ඔවුන්ට අවබෝධ කර දෙන්න.
දරුවාගේ දුරකථනය හෝ පරිගණකය පරීක්ෂා කිරීමේ අයිතිය දෙමාපියන්ට ඇති බවට මුලින්ම එකඟතාවක් ඇති කරගන්න. කෙසේ වෙතත්, මෙම පරීක්ෂාව සිදු කළ යුත්තේ දරුවා ඉදිරියේ සහ ඔවුන්ට දැනුම් දීමෙන් පසුව පමණි. රහසින් ඔත්තු බැලීම විශ්වාසය බිඳ දමයි.
දරුවාගේ පෞද්ගලික මුරපද ඔවුන්ගේ පෞද්ගලිකත්වය ලෙස සලකන්න. කෙසේ වෙතත්, හදිසි අවස්ථාවකදී හෝ නීති කඩ කළහොත් පරීක්ෂා කිරීමේ අවශ්‍යතාවය පිළිබඳව විවෘතව කතා කරන්න. විශ්වාසය පෙන්වීමට, දෙමාපියන්ගේ ලැප්ටොප් හෝ දුරකථන මුරපද දරුවාට දැනුම් දිය හැකිද යන්න පවා සාකච්ඡා කළ හැකිය.
ආරක්ෂාව සඳහා පමණක් දුරකථනයේ Location Sharing විශේෂාංගය භාවිත කිරීමට දෙමාපියන්ට අවසර තිබිය යුතුය. මෙය නිරන්තරයෙන් ඔත්තු බැලීම සඳහා නොව, දරුවා ආරක්ෂිත බව තහවුරු කිරීමට පමණක් බව පැහැදිලි කරන්න.
නීති කඩ කිරීමේදී ප්‍රතිවිපාක අනිවාර්යයෙන්ම තිබිය යුතු අතර, එම ප්‍රතිවිපාකය පැනවිය යුත්තේ දඬුවමක් ලෙසට වඩා ඉගෙනුම් අවස්ථාවක් ලෙසිනි.
නීති කඩ කළහොත්, උපාංග භාවිතය සඳහා වූ විශේෂ වරප්‍රසාදයක් කෙටි කාලයකට අහිමි කිරීම සුදුසුය. උදාහරණයක් ලෙස දින දෙකකට දුරකථනය පවුලේ පොදු ස්ථානයේ තැබීම වැනි දෙයක් දැක්විය හැකිය. දුරකථනය සම්පූර්ණයෙන්ම සහ සදහටම අහිමි කිරීමෙන් වළකින්න. එය ඔවුන්ගේ සමාජ සම්බන්ධතා සහ අධ්‍යාපනයට බාධාවක් විය හැකිය.
දරුවා නීති කඩ කළ පසු, නැවත විශ්වාසය දිනාගැනීම සඳහා පැහැදිලි පියවර උදාහරණයක් ලෙස සතියක් තිස්සේ නීතිවලට අවනත වීම වැනි නීති සකස් කරන්න.
යොවුන් දරුවාට ඩිජිටල් උපාංගයක් ලබා දීම යනු ඔවුන්ට වගකීමක් ලබා දීමකි. මෙම නීති මාලාව නිර්මාණය කිරීමේදී දෙමාපියන්ගේ ප්‍රමුඛතාවය විය යුත්තේ විශ්වාසය පදනම් කරගත් විවෘත සංවාදයක් හරහා දරුවාගේ පෞද්ගලිකත්වයට ගරු කරමින්ම ඔවුන්ව ඩිජිටල් ලෝකයේ අවදානම් වලින් ආරක්ෂා කර ගැනීම බව අවබෝධ කරගන්න.
