එදිනෙදා ජීවිතයේදී අපි සාමාන්‍යයෙන් ඇවිදිනවා. ඒ වගේම ව්‍යායාම විදිහටත් ඇවිදීම සිදු වෙනවා. ඇවිදීම එදිනෙදා කටයුතුවලදී සිදු වන සාමාන්‍ය ක්‍රියාවක් වුනත් එය ඔබට ව්‍යායාමයක් විදිහටත් ආදේශ කර ගැනීමට හැකියාව තිබෙනවා. එය ඉතාම සරලයි.
- බස් රථයට, දුම්රියට, වෙළඳපොලට යන විට ඇවිදගෙන යෑම
- කුලී රථයකින් ගමන් කළ හැකි කෙටි දුර ඇවිදීම
- විදුලි සෝපානයක් ඇති විට එය භාවිතා නොකර පඩි පෙළ භාවිතා කිරීම
මේ වෙනුවෙන් තැනක්…
ව්‍යායාමයක් විදිහට ඔබ ඇවිදිනවා නම් ඔබේ ඇවිදින වේගය බාල නොවන පරිදි ඇවිද ගෙන යා හැකි ස්ථානයක් තෝරා ගැනීම වැදගත්. ඇතැම් ප්‍රදේශවල මේ වෙනුවෙන් ඇවිදින මං තීරු පිහිටුවා තිබෙනවා. එවැනි මං තීරු නැතැත් ඔබට ව්‍යායාමයක් වෙනුවෙන් ඇවිදින්න කිසිම බාධාවක් නැහැ. මේ වෙනුවෙන් ඔබට තෝරා ගත හැකි ස්ථාන කීපයක් තිබෙනවා.
- පිට්ටනියක්
- මුහුදු වෙරළක්
- ජනාකීර්ණ නොවන මාර්ගයක් වැනි ඕනෑම ස්ථානයක්
- සැහැල්ලු සිරුරක් – ව්‍යායාමයක් විදිහට ඇවිදින විට ශක්තිය වැය වෙනවා. ඒ නිසා සිරුරේ සංචිත මේදය දිය වීම නිසා තරබාරුව අඩු කර ගැනීම සමග සැහැල්ලු සිරුරක අයිතිය ඔබට ලැබෙනවා.
- සිරුරේ යෝග්‍යතාවය ඉහළ මට්ටමක තබා ගැනීමේ හැකියාව – ව්‍යායාමයක් ලෙස ඇවිදීම නිසා ඔබේ සිරුරේ හෝර්මෝන ක්‍රියාකාරීත්වය ශරීරයේ සෞඛ්‍යට හිතකර පරිදි සිදු වෙනවා. මේ නිසා අධික රුධිර පීඩනය, දියවැඩියාව, අහිතකර කොලස්ටරෝල් මට්ටම අඩු වීම වැනි වාසි බොහොමයක් ඇති වෙනවා.අනිකුත් ව්‍යායාම වගේම ඇවිදීම මගින් අපේ සිරුරේ යෝග්‍යතාවය ඉහළ මට්ටමක තබා ගැනීමේ හැකියාව ලැබෙනවා.
- පරිසරය හා නිදහසේ ගැටීමට අවස්ථාව – ව්‍යායාමයක් විදිහට ඇවිදින විට ඔබ හොඳ වාතාශ්‍රයක් සහිත එලිමහන් ප්‍රදේශයක් තෝරා ගැනීම ඉතාම වැදගත්. එළිමහන් පරිසරය සැබැවින්ම මනසට ප්‍රියයි. මානසික ආතතිය අඩු පුද්ගලයෙකුගේ සිතට නැවුම් සිතුවිලි ගොඩ නගා ගැනීමටත් අවස්ථාවක් ලැබෙනවා.
- සුවදායක නින්දක් – සමහර විට ඔබ ව්‍යායාම ලෙසින් බාස්කට් බෝල්, ටෙනිස් වැනි ක්‍රිඩාවන් තෝරා ගෙන ඇති. ඇවිදීමෙන්ද ඔබට ඉහත ක්‍රිඩාවන්හි නිරත වූවාට සමාන ප්‍රතිලාභ ලැබෙනවා. දිවා කාලයේදී ඔබ යම් වේලාවක් ඇවිදීම නිසා මොළයට ඔක්සිජන් පරිවහනය වීම ඉතා හොඳින් සිදුවීම සමග රාත්‍රි කාලයේ සුවදායක නින්දක් ලැබීම, පෙනහලු කියාකාරීත්වය හොඳින් සිදු වීම තවත් වාසියක් ලෙසින් සඳහන් කරන්න පුළුවන්.
- පියයුරු පිළිකා ඇතිවීමේ අවධානම අවම වීම – ව්‍යායාමයක් විදිහට ඇවිදින කාන්තාවන්ට පියයුරු පිළිකා ඇති වීමේ අවදානමත් ඉතා හොඳින් අවම කර ගත හැකි බවත් දැන් සොයා ගෙන තිබෙනවා.
- ඉනෙන් පහළ කොටස වඩාත් ක්‍රියාකාරී වීමත් සිදු වෙනවා. ඒ නිසා ඔබ ඇවිදින විට වයස අනුව කිලෝ එකක හෝ දෙකක ඩම්බෙල් දෙකක් දෑතට ගෙන සිරුරේ දෙපැත්තෙන් ඉදිරියට පිටුපසට යන ආකාරයෙන් පැද්දෙන සේ ඇවිදීම ඉතා සුදුසුයි. මේ නිසා උඩුකය මාංශ පේශිවලටත් වයායාම ලැබෙනවා. ඔබට ඩම්බෙල් වෙනුවට වතුර පුරවන ලද බෝතල් වැනි සමාන බරක් ඇති දෙයක් දෑතට ගැනීමට පුළුවනි.
- ඇවිදින අතරවාරයේ ටික වේලාවක් සෙමින් දුවන්න. මෙම ක්‍රියාකාරකම් දෙක වෙනුවෙන් සමාන කාලයක් වෙන් කර ගන්න. ඇවිදීමෙන් පසුව බෙල්ල, උරහිස් මාංශපේශි, පිටකොන්ද ආදී ප්‍රදේශ සඳහා ගැලපෙන ව්‍යායාම කීපයක නිරත වීමත් යෝග්‍යයි.
- ඔබට දැන් නිවසේ සිට ඇවිදීමට හැකි ව්‍යායාම උපකරණ වෙළඳපොළේ තිබෙනවා. මෙම උපකරණ මගින් ඇවිදින ආනතිය, වේගය තමන්ට අවශ්‍ය පරිදි සකස් කර ගැනීමට හැකියාව තිබෙනවා. වැඩිදියුණු කරන ලද තාක්ෂණ උපකරණ මගින් දහනය වන කැලරි ප්‍රමාණය පවා පෙන්නුම් කරනවා.
- දවසේ ඇවිදීම වෙනුවෙන් නියමිත කාලයක් වෙන් කර ගන්න
- ඇවිදීමට යෑම සඳහා ඔබව දිරිමත් කළ හැකි මිතුරෙකු තෝරා ගන්න.
- ඇවිදීමේදී තෝරා ගත් පරිසරයේ සෞන්දර්ය විඳිමින් ඇවිදීමට පුරුදු වෙන්න
- ඝෝෂාකාරී නොවන මනස සන්සුන් කරන සංගීතයකට සවන් දෙමින් (i-pod, MP 3 player හෝ ජංගම දුරකථනයක් භාවිත කළ හැක) ඇවිදින්න.
- දිනපතා ඇවිද ගිය දුර ප්‍රමාණය සහ කාලය පොතක සටහන් කරන්න. එය නිතර දකින විට ඇවිදීම පිළිබඳව ආශාවක් සිත තුළ ඇති වීම නිසා මෙම කාර්යය වෙනුවෙන් ඔබ දිරිමත් වෙනු ඇත.
ඔබ ව්‍යායාමක් ලෙසින් තවමත් ඇවිදීම පුරුදු නොකළ පුද්ගලයෙක් නම් එය හෙටට කල් තබන්න එපා. අද දවසේ ව්‍යායාමයක් ලෙස ඔබ ඇවිදිනවා නම් එයින් ඔබේ ජීවිතයට ලැබෙන සෞඛ්‍ය ප්‍රතිලාභ ඔබට නීරෝගී ජීවිතයක් ගත කිරීමේ හිමිකම ලබා දෙනු ඇත.
Leave feedback about this