නාගරික කෘෂිකර්මාන්තය තුළ කුඩා ඉඩකඩකින් විශාල අස්වැන්නක් ලබා ගැනීමට උපකාරී වන ඉතා පහසු ක්‍රමවේදයන් කිහිපයක් පවතී. ඒවා අතර, වගා කුළුණු මෙන්ම වගා වළල්ල (Cultivation Ring) සඳහාද හිමි වන්නේ ප්‍රධාන ස්ථානයකි. මෙය ගෙවත්තට අලංකාරයක් එක් කරන, සිරස් අවකාශය තුළ පිහිටුවිය හැකි, වෙනස් හැඩයකින් යුක්ත වගා ව්‍යූහයක් ලෙස හඳුන්වා දිය හැකිය. විවිධ බෝග වර්ග එකට සිටුවීමට (මිශ්‍ර බෝග වගාවකට) මෙය ඉතාමත් යෝග්‍ය වේ.
වගා වළල්ල ස්ථර කිහිපයක් තනි කණුවකට සම්බන්ධ කර නිර්මාණය කර ඇත. මෙම ව්‍යූහය පිහිටුවීම සඳහා බොහෝ විට, භාවිතයෙන් පසු ඉවත දමන ලද ඝන අපද්‍රව්‍ය ක්‍රමවත්ව ප්‍රයෝජනයට ගැනීම සිදුවේ. ගෙවත්තේ ඇති සීමිත ඉඩ ප්‍රමාණයෙන් වැඩිම ප්‍රයෝජනයක් ලබා ගැනීමට මෙය කදිම විසඳුමකි. නිවසේ සාමාජිකයන්ගේ අවශ්‍යතා අනුව, විවිධ බෝග වර්ග කිහිපයක් මෙහි සිටුවා ගත හැක. මෙය නිතර ඇස ගැටෙන තැනක පිහිටුවීම නිසා නඩත්තු කටයුතු පහසු වේ.
වගා වළල්ල ස්ථාපනය කිරීමේදී,
- ස්ථානය තෝරා ගැනීම
ගෙවත්තේ සූර්ය රශ්මිය හොඳින් ලැබෙන ස්ථානයක් තෝරාගෙන, වල් පැළ ඉවත් කර බිම සකස් කරන්න.
- ව්‍යූහය සඳහා අවශ්‍ය ද්‍රව්‍ය
ව්‍යූහය පිහිටුවීම සඳහා ලී හෝ යකඩ කණුවක් අවශ්‍ය වේ. ඒ වගේම, වගා බඳුන් රඳවා තැබීමට ශක්තිමත් ලී පටි හෝ යකඩ කූරු කිහිපයක් සූදානම් කර ගන්න.
- කණුව සිටුවීම
තෝරාගත් ස්ථානයේ කණුව අඩි එකහමාරක් පමණ ගැඹුරට සිටුවන්න. (ඇස් මට්ටමට වඩා පහළින් කණුව සිටුවීමෙන් නඩත්තු කිරීම පහසුයි)
- ආධාරක සවි කිරීම
වගා බඳුන් තැබීම සඳහා කණුව මැදිකර ආධාරක සවි කරන්න. සම්පූර්ණයෙන්ම යකඩ උපයෝගී කරගෙන ව්‍යූහය නිර්මාණය කරන්නේ නම්, යකඩ කණුවට යකඩ කූරු පෑස්සීමට හැකිය.
- බෝග සිටුවීමට ඉවතලන ප්ලාස්ටික් භාජන, බාල්දි, බේසම් වැනි බඳුන් කිහිපයක් එකතු කර ගන්න.
- තෝරාගත් බඳුන්, ආධාරක මත රැඳවීමට හැකි වන සේ අවශ්‍ය ප්‍රමාණයට පතුල සිදුරු කරන්න.
- කම්බි සහ නයිලෝන් නූල් උපයෝගී කරගෙන වගා බඳුන් කණුවේ සවිමත්ව රඳවන්න.
- බඳුන්වල ප්‍රමාණය අනුව, විශාලත්වය වැඩි බඳුන් පහළටත්, කුඩා බඳුන් ඉහළටත් වන සේ රඳවා ගන්න. මෙමඟින් ව්‍යූහයට වඩාත් අලංකාර පෙනුමක් ලැබෙන අතර, බෝග සඳහා හොඳින් හිරු එළිය ලැබේ. වගා බඳුන් විවිධ වර්ණ ගන්වා අමතර ආකර්ෂණයක් ලබා දිය හැක.
මතුපිට පස් සහ කාබනික පොහොර සමාන අනුපාතයකින් ගෙන බඳුන් මිශ්‍රණය සාදා ගන්න. අවශ්‍ය නම් ගොම සහ කොහුබත්ද මෙම මිශ්‍රණයට එක් කළ හැකිය.
- වගා කිරීමට සුදුසු බෝග
- පඳුරු බෝග වර්ග
- ගෝවා වර්ග, නෝකෝල්
- නිවිති, කංකුං, මුකුණුවැන්න
- ඉඟුරු පැළ (ඉහළින් ඇති බඳුන්වල)
- නිවසට අවශ්‍ය වන ඖෂධ පැළෑටි
- අලංකාර මල් පැළ
දේශගුණික තත්ත්වයන් සලකා බලා දිනකට වරක් ජලය සපයන්න. කුඩා බඳුන්වල ඇති පැළ සඳහා අවශ්‍ය අවස්ථාවලදී දිනකට දෙවරක් වුවද ජලය යෙදීමට සිදු විය හැක.
පළිබෝධ පාලනය සඳහා කොහොඹ නිස්සාරණය භාවිත කළ හැකි අතරම සිටුවන බෝග අනුව ඇතිවන රෝග හා පළිබෝධ හානි වෙනස් විය හැකි නිසා වගා ව්‍යූහය නිරන්තරයෙන් නිරීක්ෂණය කළ යුතුයි. රෝග හා පළිබෝධ හානි දුටු වහාම අතින් ඉවත් කරන්න. වල් පැළ ගලවා ඉවත් කරන්න.
- පෝෂක කළමනාකරණය
වගා වළල්ලක, විශේෂයෙන්ම කුඩා බඳුන් වල ඇති පස් ප්‍රමාණය සීමිත නිසා, ඝන පොහොරවලට වඩා දියර කාබනික පොහොර භාවිත කිරීමෙන් ශාකවලට ඉක්මනින් පෝෂණය ලබා දිය හැකියි. සමහර නිර්මාණකරුවන්, බඳුන් මිශ්‍රණයට අමතරව මධ්‍යම කණුව වටා ඇති අවකාශයට කොම්පෝස්ට් වීමට ඉඩ හරින කාබනික ද්‍රව්‍ය (කොළ රොඩු, ගෙඩි පොතු) තට්ටුවක් එක් කරයි. ජලය දැමීමේදී මෙම ද්‍රව්‍ය දිරාපත් වී සෙමෙන් පැළෑටිවලට පෝෂණය මුදා හැරීම සිදුවේ.
- නිවැරදි ජලාපවහනය
වගා වළල්ලක ඇති එක් ප්‍රධාන ගැටලුවක් වන්නේ ජලය එකතැන රැඳී තිබීමයි. සෑම බඳුනකම පතුලේ ප්‍රමාණවත් තරම් ජලාපවහන සිදුරු තිබීම අත්‍යවශ්‍යයි. සිදුරු කුඩා වීම හෝ අවහිර වීම මුල් කුණුවීමට හේතු විය හැක. ජලාපවහනය තවත් හොඳින් පවත්වා ගැනීමට, පස් පිරවීමට පෙර බඳුනේ පතුලට කුඩා ගල් කැබලි, ගඩොල් කැබලි හෝ කැට තට්ටුවක් දැමිය හැකිය.
- උෂ්ණත්වය පාලනය
ප්ලාස්ටික් බඳුන් යොදාගත් විට ප්ලාස්ටික් භාජන හිරු එළියට නිරාවරණය වීමේදී ඉක්මනින් රත් විය හැක. අධික උෂ්ණත්වය නිසා මුල්වලට හානි සිදුවිය හැකිය. බඳුන් වර්ණ ගැන්වීමේදී, සුදු හෝ ලා පැහැති වර්ණ භාවිත කිරීමෙන් හිරු එළිය පරාවර්තනය වී උෂ්ණත්වය පාලනය කර ගැනීමට උපකාරී වේ.
- ස්ථානයේ වෙනස්කම්
ඔබ වගා කරන බෝග (උදා: එළවළු සඳහා වැඩි හිරු එළියක්) අනුව අවශ්‍ය ආලෝකය ලැබෙන සේ වගා වළල්ල ස්ථාපනය කළ යුතුයි. සමහර නිර්මාණ වලදී, කණුව ස්ථීරව සිටුවා, බඳුන් සහිත ආධාරක කොටස කැරකවීමට හැකි සේ සකස් කර තිබේ. මෙය දවසේ විවිධ වේලාවන්හිදී සියලු පැළෑටි වලට හිරු එළිය ලැබීමට උපකාරී වේ.
- තවදුරටත් සුදුසු බෝග
විශාල පත්‍ර සහිත, වැඩි හිරු එළියක් අවශ්‍ය නොවන සහ බිමට බර වන බෝග පහළ ස්ථරවල සිටුවීම සුදුසුයි. රතු ලූනු, සුදු ලූනු වැනි කුඩා බල්බ සහිත බෝග ද මෙහි පහසුවෙන් වගා කළ හැකියි.
සටහන
උදානි ජයසේන
Leave feedback about this